រាជធានីភ្នំពេញ ៖ បុរសម្នាក់ស្រវឹងស្រា ជិះម៉ូតូតែម្នាក់ឯង ហើយបានជែងម៉ូតូក្មេងស្ទាវមួយគ្រឿង ត្រូវក្មេងស្ទាវខឹងដេញធាក់ពីក្រោយបណ្តាលអោយដួលបែកមុខបែកមាត់ ហេតុការណ៍នេះបានកើតឡើងកាលពីវេលាម៉ោង១០និង៣០នាទីយប់ថ្ងៃទី២ ខែឧសភា នៅលើស្ពានអាកាសក្បាលថ្នល់ សង្កាត់ទន្លេបាសាក់…
រាជធានីភ្នំពេញ ៖ បុរសម្នាក់ស្រវឹងស្រា ជិះម៉ូតូតែម្នាក់ឯង ហើយបានជែងម៉ូតូក្មេងស្ទាវមួយគ្រឿង ត្រូវក្មេងស្ទាវខឹងដេញធាក់ពីក្រោយបណ្តាលអោយដួលបែកមុខបែកមាត់ ហេតុការណ៍នេះបានកើតឡើងកាលពីវេលាម៉ោង១០និង៣០នាទីយប់ថ្ងៃទី២ ខែឧសភា នៅលើស្ពានអាកាសក្បាលថ្នល់ សង្កាត់ទន្លេបាសាក់ ខណ្ឌចំការមន ។
ជនរងគ្រោះមិនប្រាប់ឈ្មោះ និងមានមុខរបររត់ម៉ូតូឌុប បានប្រាប់អោយដឹងថា មុនកើតហេតុគាត់ហូបស្រាតិចតួចជាមួយមិត្តភក្តិអ្នករត់ម៉ូតូឌុបដូចគ្នា លុះដល់ពេលស្រវឹងគាត់បានត្រលប់ទៅផ្ទះមុន ដោយជិះមូតូមួយគ្រឿងម៉ាក smash revo ពណ៌ខ្មៅ ពាក់ស្លាកលេខ មណ្ឌលគីរី 1A-1091 តាមបណ្តោយមហាវិថីព្រះនរោត្តម ក្នុងទិសដៅពីជើងទៅត្បូង គោលបំណងត្រលប់ទៅផ្ទះនៅមុខវត្តព្រែកហូរ ក្រុងតាខ្មៅ ខេត្តកណ្តាល លុះមកដល់ជិតស្ពានអាកាសបានបើកជែងកៀកម៉ូតូមួយគ្រឿងម៉ាកអាយខន ជិះគ្នា2នាក់ប្រុសម្នាក់នឹងស្រីម្នាក់ស្របទិសគ្នា ក៏ត្រូវភាគីម៉ូតូជនបង្កនោះស្រែកគំរាមថា (ហ្អែងជិះមិនផុតស្ពានទេ) តែគាត់មិនចាប់អារម្មណ៌ក៏ជិះទៅមុខបន្ត លុះមកដល់កន្លែងកើតហេតុពាក់កណ្តាលស្ពាន ក៏ត្រូវជនបង្កនោះ ជិះតាម និងធាក់ពីក្រោយបណ្តាលអោយដួលបែកមុខបែកមាត់ ស្រាប់តែមានបុរសម្នាក់ទៀតជិះម៉ូតូម៉ាកហុងដាឌ្រីម ពណ៌ខ្មៅ ពាក់ស្លាកលេខភ្នំពេញ 1GK-2383 ធ្វើដំណើរស្របទិសគ្នាមកពីក្រោយ ហើយចាប់ហ្វ្រាំងមិនទាន់បណ្ដាលឱ្យដួលរលាត់ដៃរលាត់ជើង ភ្លាមៗនោះជនបង្កក៏បានបន្ថែមល្បឿនម៉ូតូរត់គេចខ្លួនបាត់ស្រមោល។
ចំណែកភាគីខាងម៉ូតូហុងដាឌ្រីម បានអោយដឹងថាមុនកើតហេតុគាត់បានជិះពីក្រោយម៉ូតូទាំងពីរគ្រឿងនោះហើយម៉ូតូទាំង២ គ្រឿងទាស់សម្តីគ្នាតិចតួច ប៉ុន្តែគាត់មិនដឹងថាពួកគេឈ្លោះគ្នាដោយសាររឿងអ្វីនោះទេ លុះមកដល់កន្លែងកើតហេតុ ស្រាប់តែម៉ូតូម៉ាកអាយខុនជិះដោយបុរសម្នាក់និងស្ត្រីម្នាក់ បានធាក់ម៉ូតូជនរងគ្រោះបណ្ដាលឱ្យដួលពីមុខម៉ូតគាត់ ភ្លាមៗនោះគាត់ចាប់ហ្វ្រាំងមិនទាន់ក៏ជ្រុលទៅបុកម៉ូតូជនរងគ្រោះ បណ្ដាលឲ្យគាត់ដួលរលាត់ដៃរលាត់ជើងនឹងម៉ូតូខូចខាតតិចតួច ហើយជនបង្កបានបន្ថែមល្បឿនបើករត់គេចខ្លួនបាត់ស្រមោល។
ក្រោយកើតហេតុ បុរសជិះម៉ូតូម៉ាកហុងដាឌ្រីម មិនបានដាក់ពាក្យបណ្តឹងទាមទារអ្វីនោះទេ ក៏បើកម៉ូតូចេញទៅតែម្តង ចំណែកឯជនរងគ្រោះជិះម៉ូតូម៉ាក smash revo ក៏មិនបានដាក់ពាក្យបណ្ដឹងអ្វីដែរ គាត់ក៏បានហៅរ៉ឺម៉កម៉ូតូដឹកគាត់ និងម៉ូតូទៅផ្ទះតែម្ដងទៅ ៕
ចែករំលែកព័តមាននេះ