ខេត្តប៉ៃលិន ៖ ប្រជាពលរដ្ឋជាច្រើននាក់រស់នៅជាប់នឹងព្រំដែនកម្ពុជា-ថៃមានការព្រួយបារម្ភយ៉ាងខ្លាំងពីសន្តិសុខប្រចាំថ្ងៃដោយម្នាក់ៗស្ទើរតែមិនហ៊ានចេញទៅធ្វើការរកស៊ីនោះឡើយ ខណៈក្រុមចោរលួចគាស់ទ្វារបង្អួចផ្ទះកាន់តែកើនឡើង ។ ម្យ៉ាងវិញទៀតពួកគាត់ព្រួយបារម្ភពីភូមិ-ឃុំមានសុវត្ថិភាព ខណៈក្រុមចោរមានច្រើនដូចគោហ្វូងដើរគាស់ផ្ទះលួចទ្រព្យសម្បត្តិអស់ជាច្រើន ។
ជាក់ស្តែងកាលពីប៉ុន្មានថ្ងៃជាប់គ្នានេះមានករណីលួចគាស់ផ្ទះប្រជាពលរដ្ឋជាបន្តបន្ទាប់តែម្តង ។ ហេតុការណ៍ចោរលួចគាស់ផ្ទះប្រជាពលរដ្ឋនេះបានកើតឡើងកាលពីវេលាម៉ោង១១និង៣០នាទីយប់ ថ្ងៃទី០១ ខែមេសា ឆ្នាំ២០១៨ ដោយក្រុមចោរបានលួចគាស់ផ្ទះប្រជាពលរដ្ឋមួយកន្លែងនៅចំណុចភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន ខណៈម្ចាស់ចាក់សោរួចចេញទៅធ្វើការកាស៊ីណូ ។
ប្រភពព័ត៌មានបានឱ្យដឹងថា ជនរងគ្រោះមានឈ្មោះ ចាន់ ស្រីមួយ ភេទស្រី អាយុ២៧ឆ្នាំ រស់នៅភូមិ-ឃុំកើតហេតុខាងលើហើយទ្រព្យសម្បត្តិដែលត្រូវជនសង្ស័យលួចយកទៅរួមមានទូរស័ព្ទដៃចំនួន២គ្រឿងម៉ាក Samsung Note3 និងម៉ាក Samsung Galaxy S3 ។ លុះមកដល់វេលាម៉ោង០៨និង២៧នាទីព្រឹក ថ្ងៃទី០២ ខែមេសា ឆ្នាំ២០១៨ ទើបជនរងគ្រោះបានទៅដាក់ពាក្យបណ្ដឹងនៅការិយាល័យនគរបាលព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្តប៉ៃលិនឱ្យជួយអន្តរាគមន៍ផងដែរ ។
ពួកគាត់ពិតជាមានការព្រួយបារម្ភពីការបាត់បង់របស់របរគ្រប់បែបនេះនៅក្នុងផ្ទះ ខណៈក្រុមចោរកំពុងធ្វើសកម្មភាពដើរលួចយ៉ាងគគ្រឹកគគ្រេងហើយបើសិនជានៅតែគាស់ផ្ទះរបស់ទ្រព្យបែបនេះទៀត ពួកគាត់ប្រាកដជាពិបាកក្នុងការចេញទៅធ្វើការរកស៊ីចិញ្ចឹមជីវិតខ្លាំងណាស់ ៕
ចែករំលែកព័តមាននេះ