រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានប្រកាសស្វាគមន៍ចំពោះគណបក្សនយោបាយទាំងអស់ដែលបានចុះបញ្ជីរបស់ខ្លួននៅ គ.ជ.ប ដើម្បីចូលរួមប្រកួតប្រជែងការបោះឆ្នោតជ្រើសតាំងអ្នកតំណាងរាស្ត្រអាណត្តិទី៦រដ្ឋសភា ។ ការប្រកាសរបស់ប្រមុខរាជរដ្ឋាភិបាល…
រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានប្រកាសស្វាគមន៍ចំពោះគណបក្សនយោបាយទាំងអស់ដែលបានចុះបញ្ជីរបស់ខ្លួននៅ គ.ជ.ប ដើម្បីចូលរួមប្រកួតប្រជែងការបោះឆ្នោតជ្រើសតាំងអ្នកតំណាងរាស្ត្រអាណត្តិទី៦រដ្ឋសភា ។ ការប្រកាសរបស់ប្រមុខរាជរដ្ឋាភិបាល និងប្រធានគណបក្សប្រជាជនកម្ពុជានេះស្របពេលដែលគណៈកម្មាធិការជាតិបាននឹងកំពុងទទួលចុះបញ្ជីបេក្ខជនគណបក្សនយោបាយសម្រាប់ប្រកួតប្រជែងការបោះឆ្នោតជ្រើសតាំងអ្នកតំណាងរាស្ត្រអាណត្តិទី៦ រដ្ឋសភា ដែលនឹងប្រព្រឹត្តិទៅនាថ្ងៃទី២៩ ខែកក្កដា ឆ្នាំ២០១៨ ខាងមុខនេះ ។
សម្តេចតេជោបានសរសេលើបណ្តាញសង្គមនៅថ្ងៃទី២ ខែឧសភា ឆ្នាំ២០១៨ ថា «កម្ពុជាមានសន្តិភាព គឺកម្ពុជាកាន់តែរីកចម្រើន ។ ថ្ងៃបោះឆ្នោតជ្រើសតាំងតំណាងរាស្រ្តនីតិកាលទី៦ក៏ជិតមកដល់។ ខ្ញុំសូមស្វាគមន៍ដល់គណបក្សនយោបាយទាំងអស់ដែលបានចុះបញ្ជីគណបក្សខ្លួន ព្រមទាំងបញ្ជីបេក្ខជនឈរឈ្មោះប្រកួតប្រជែងនៅក្នុងថ្ងៃបោះឆ្នោតថ្ងៃទី ២៩ ខែកក្កដា ឆ្នាំ ២០១៨ ខាងមុខនេះ ។ នេះគឺបង្ហាញអោយឃើញច្បាស់ថា កម្ពុជាកំពុងគោរពនិងអនុវត្តន៍នូវលទ្ឋិប្រជាធិបតេយ្យ ដែលគណបក្សនយោបាយតូចធំទាំងអស់ក្នុងប្រទេសមានសិទ្ឋិ និងឱកាសចូលរួមប្រកួតប្រជែងនៅក្នុងការបោះឆ្នោតដោយសេរី ។
កាលពីម្សិលមិញ ខ្ញុំពិតជារីករាយខ្លាំងណាស់ដែលបានចូលរួមអបអរសាទរជាមួយកូនក្មួយកម្មករនៅក្នុងថ្ងៃឈប់សម្រាកនៃទិវាពលកម្មអន្តរជាតិ ១ឧសភា នៅតំបន់សេដ្ឋកិច្ចពិសេសភ្នំពេញ ។ ខ្ញុំរីករាយនៅពេលដែលបានឃើញកូនក្មួយមានសុខភាពល្អ មានការងារធ្វើជាប់លាប់ មានប្រាក់ខែល្អសមរម្យ ព្រមទាំងទទួលបាននូវអត្ថប្រយោជន៍ជាច្រើនទៀតពីក្រុមហ៊ុន ។ ទន្ទឹមនឹងនេះដែរ រាជរដ្ឋាភិបាលក៏បានយកចិត្តទុកដាក់គិតគូយ៉ាងខ្លាំងក្នុងការការពារ និងផ្តល់នូវអត្ថប្រយោជន៍ជាច្រើនថែមទៀតដល់ក្មួយៗកម្មករទាំងក្នុងពេលកំពុងបម្រើការងារ និងក្រោយពេលឈប់សម្រាកចូលរឺត្រែត ដើម្បីកូនក្មួយមានជីវភាពរស់នៅកាន់តែល្អប្រសើរ ។
សូមអរគុណបងប្អូនប្រជាពលរដ្ឋ សមាជិកសមាជិការគណបក្សប្រជាជន និងកូនក្មួយយុវជនទូទាំងប្រទេសដែលមានជំនឿជឿជាក់លើការដឹកនាំរបស់ខ្ញុំ ហើយបន្តបោះឆ្នោតជូន គណបក្សប្រជាជន ដើម្បីខ្ញុំមានឱកាសបន្តអភិវឌ្ឍន៍ប្រទេសជាតិអោយកាន់តែរុងរឿងរីកចម្រើនសំបូរសប្បាយ» ។
ទាក់ទិននឹងការចុះឈ្មោះបេក្ខជនឈរឈ្មោះរបស់គណបក្សនយោបាយសម្រាប់ចូលរួមប្រកួតប្រជែងក្នុងការបោះឆ្នោតនៅពេលខាងមុខនេះដែលមន្ត្រីជាន់ខ្ពស់ គ.ជ.ប បានឲ្យដឹងក្នុងរយៈពេលពីដំបូងនៃការបើកទទួលការចុះបញ្ជីបេក្ខជនគណបក្សនយោបាយនោះ គ.ជ.ប បានទទួលគណបក្សចំនួនបីមកចុះបញ្ជីបេក្ខជនឈរឈ្មោះសម្រាប់ការបោះឆ្នោតគឺ គណបក្សប្រជាជនកម្ពុជា, គណបក្សយុវជនកម្ពុជា និងគណបក្សសញ្ជាតិកម្ពុជា ។ មន្ត្រីដដែលក៏សម្តែងសុទិដ្ឋិនិយមថា សម្រាប់ការបោះឆ្នោតជ្រើសតាំងអ្នកតំណាងរាស្ត្រអាណត្តិទី៦នេះអាចនឹងមានគណបក្សនយោបាយច្រើនចួលរួមប្រកួតប្រជែងសន្លឹកឆ្នោត ។
សូមជម្រាប់ផងដែរថា ការបោះឆ្នោតជ្រើសតាំងអ្នកតំណាងរាស្ត្រអាណត្តិទី៦រដ្ឋសភានឹងព្រឹទ្ធទៅនៅថ្ងៃទី២៩ ខែកក្កដា ឆ្នាំ២០១៨ ។ ចំណែកការចុះឈ្មោះបញ្ជីបេក្ខជនឈរឈ្មោះរបស់គណបក្សនយោបាយបានចាប់ផ្តើមពីថ្ងៃទី៣០ ខែមសា រហូតដល់ថ្ងៃទី១៤ ខែឧសភា ឆ្នាំ២០១៨ ៕
ចែករំលែកព័តមាននេះ