រាជធានីភ្នំពេញ ៖ អ្នកនាំពាក្យទីស្តីការគណៈរដ្ឋមន្ត្រីលោក ផៃ ស៊ីផាន បានបញ្ជាក់ពីការលើកលែងទោសលោក ញឹក ប៊ុនឆៃ ថាជាអំណាចតុលាការមិនពាក់ព័ន្ធនឹងនយោបាយឡើយ ហើយការអំពាវនាវរបស់លោក សម រង្ស៊ី មិនឲ្យពលរដ្ឋទៅបោះឆ្នោតជាជាគំនិតទទ្ទាម ។ ការបញ្ចេញប្រតិកម្មនេះបន្ទាប់ពីមានមតិមួយចំនួនរិះគន់អំពីតុលាការថា ការដោះលែងលោក ញឹក ប៊ុនឆៃ ស្ថិតក្នុងសម្ពាធនយោបាយ ។ ជាងនេះស្របពេលលោក សម រង្ស៊ី អតីតប្រធានគណបក្សសង្គ្រោះជាតិបានអំពាវនាវកុំពលរដ្ឋទៅបោះឆ្នោតនៅពេលខាងមុខនេះ ។
លោក ផៃ ស៊ីផាន បានសរសេលើបណ្តាញសង្គមនៅថ្ងៃទី២ ខែឧសភា ឆ្នាំ២០១៨ នេះបានបញ្ជាក់ថា «ករណីរបស់លោក ញឹក ប៊ុនឆៃ គឺជារឿងនីតិវិធី និងការសម្រេចដោយមានការឯករាជ្យរបស់តុលាការមិនពាក់ព័ន្ធនឹងស្ថាប័នជាតិណាមួយនោះទេ ។ រីឯការលើកឡើងក្នុងទិដ្ឋភាពនយោបាយ អាស្រ័យដោយកម្ពុជាបច្ចុប្បន្នមិនមានស្ថានភាពណាមួយស្ថិតនៅក្នុងវិបត្តិនយោបាយនោះទេលើកលែងតែគណបក្សសង្គ្រោះជាតិ និងមន្ត្រីនយោបាយ១១៨រូបក្នុងគណបក្សនោះត្រូវបានតុលាការកំពូលដាក់ទណ្ឌកម្ម លុបចោលគណបក្សសង្គ្រោះជាតិ និងដកហូតសិទ្ធិនយោបាយចំនួន៥ឆ្នាំតែប៉ុណ្ណោះ» ។
សូមជម្រាបថា លោក ញឹក ប៊ុនឆៃ ត្រូវបានតុលាការសម្រេចដោះលែងឲ្យមានសេរីភាពជាបណ្តោះអាសន្នកាលពីថ្ងៃទី៣០ ខែមេសា ឆ្នាំ២០១៨ ។ បន្ទាប់ពីមានការដោះលែងមកត្រូវបានមតិមួយចំនួនលើកឡើងថា មកពីមានសំពាធនយោបាយពីក្រៅប្រទេស និងដើម្បីស្ថានការណ៍នយោបាយមានភាពល្អប្រសើរ ៕
ចែករំលែកព័តមាននេះ