រាជធានីភ្នំពេញ ៖ មនុស្សភាគច្រើន ជាពិសេសអ្នកស្នេហាវិស័យកីឡាគុនខ្មែរគិតថា
អ្នកប្រដាល់ចាស់វស្សា សេន ប៊ុនថេន បានបោះបង់អាជីពជាកីឡាករប្រដាល់បាត់ទៅហើយ ដោយសារតែគេឃើញលោកធ្វើជាគ្រូបង្វឹកប្រដាល់ និងជាថៅកែហាងបោកអ៊ុតខោអាវធំមួយដែលអ្នកណាក៏ដឹងថា ការងារទាំងអស់នេះធ្វើឱ្យលោករវល់ស្ទើរតែដកឃ្លាមិនរួចក្ដី ។ ទោះបីយ៉ាងណាលោកនៅតែអះអាងថាមិនទាន់បោះបង់អាជីពប្រដាល់ទាំងស្រុងនៅឡើយទេ ដោយលោកនៅតែទទួលយកការប្រដាល់ជាហូរហែ ដោយគ្រាន់តែការប្រដាល់នោះលុះត្រាតែមានលក្ខណៈធំដុំមានតម្លៃខ្លួនខ្ពស់ទើបលោកទទួលយក។
ជាក់ស្ដែងនៅថ្ងៃទី៥ ឧសភា ខាងមុខនេះ កីឡាករ សេន ប៊ុនថេន នឹងឡើងប្រកួតជាមួយកីឡាករបរទេសសាជាថ្មីបន្ទាប់ពីបាត់មុខយូរធ្វើឱ្យអ្នកគាំទ្រភាគច្រើនយល់ថាលោកប្រហែលជាធ្លាក់ដៃទើបឈប់ទទួលប្រកួតចាប់តាំងពីបរាជ័យក្រោមកណ្ដាប់ដៃកីឡាករបរទេសកាលពីលើកពីមុន ។ ការវិលត្រឡប់មកទទួលយកការប្រកួតនៅខេត្តបាត់ដំបងជាថ្មីនៅថ្ងៃទី៥ ខែឧសភា ខាងមុខនេះ កីឡាករចាស់វស្សា សេន ប៊ុនថេន ថា មិនទាន់ដឹងលទ្ធផលផ្លែផ្កាឬយ៉ាងណានោះទេដោយសារតែលោកទោះបីពេលនេះដើរតួជាគ្រូបង្វឹក ប៉ុន្តែក៏ខានឡើងប្រកួតយូរក្រែលដែរ ទើបមិនទាន់ប្រាកដថានឹងធ្វើឱ្យអ្នកគាំទ្រយើងទទួលយកបានឬអត់ ។ ការប្រកួត Kmen Top Fighter នោះត្រូវលោកបញ្ជាក់ថា ធ្វើឡើងរៀងរាល់១ខែម្ដង ដោយការប្រកួតក៏ត្រូវផ្លាស់ប្ដូរតាមខេត្តផ្សេងៗផងដែរ ដើម្បីឱ្យអ្នកគាំទ្រមានឱកាសបានទស្សនាដោយផ្ទាល់។
សេន ប៊ុនថេន បានថ្លែងប្រាប់ថា លោករាល់ថ្ងៃរវល់ខ្លាំងណាស់ជាមួយហាងបោកអ៊ុតខ្នាតធំ នៅភូមិឫស្សីស្ទឹងមានជ័យ ដោយសារមុខជំនួញមួយនេះកាក់កបយ៉ាងខ្លាំងដែលអាចនិយាយបានថា បើទោះជាលោកឈប់ប្រដាល់ ក៏លោកនៅតែរស់បាន ។ ប៉ុន្តែលោកនៅតែស្ដាយការប្រដាល់ទើបមិនអាចដកខ្លួន ហើយនៅតែបន្តទទួលយកការផ្គូផ្គងដើម្បីរួមចំណែកលើកស្ទួយវិស័យប្រដាល់នៅកម្ពុជាផង ។ លោកថា មិនចោលការប្រដាល់នោះទេ បើទោះជាពេលខាងមុខមុខរបររបស់លោកកាន់តែរីកធំ ក៏លោកនៅតែបន្តការប្រកួតក្នុងលក្ខខណ្ឌដូចរៀបរាប់ខាងលើជាក់ស្ដែងដូចជាការប្រកួតនៅខេត្តបាត់ដំបង នាដើមខែឧសភា នេះជាដើម ។
លោកទទួលស្គាល់ការប្រដាល់បើខានប្រកួតយូរ គឺមិនខុសពីធ្វើឱ្យកម្លាំងរបស់ខ្លួនធ្លាក់ចុះនោះទេ ប៉ុន្តែលោកក៏មិនបណ្ដោយឱ្យសមត្ថភាពរបស់ខ្លួនធ្លាក់ចុះដល់ថ្នាក់ឡើងរេញមិនកើតនោះដែរ ដោយសារតែលោកនៅស្រឡាញ់ការប្រដាល់ និងមិនចង់បាត់មុខពីក្រសែភ្នែកមហាជនដែលធ្លាប់តែគាំទ្រលោក ។ លោកទទូចកុំឱ្យមានការមាក់ងាយថាលោកឡើងរេញដើម្បីតែលុយ និងកុំឱ្យមានការលើកឡើងថាលោកប្រកួតមិនកើតជាដើមនៅពេលលោកប្រកួតចាញ់ ដ្បិតរាល់ពីការប្រកួតដែលលោកទទួលយកម្ដងៗ គឺលោកប្រឹងណាស់ មិនមែនឡើងប្រកួតលំៗ ហើយចាញ់ទាំងរងការអាម៉ាស់នោះទេ៕
ចែករំលែកព័តមាននេះ