ខេត្តស្វាយរៀង ៖ ជនល្មើសគួរឱ្យចាប់អារម្មណ៍ និងធ្វើឱ្យមានការហួសចិត្តគ្រប់គ្នានោះ គឺស្ត្រីចិត្តស្លុយម្នាក់បានលួចកាច់សោ.កម៉ូតូគេទាំងថ្ងៃបានសម្រេច រួចជិះពីក្រុងបាវិតមកលក់នៅផ្សារជីភូ តែភ្លាត់ស្នៀតពេលអ្នកទិញសួររកកាតគ្រីគ្មានឯកសារ ទើបគេសង្ស័យប្តឹងសមត្ថកិច្ចចាប់ឃាត់ខ្លួនតែម្ដង ។ ស្រីចិត្តស្លុយនេះត្រូវចាប់ខ្លួន នៅវេលាម៉ោង០៥ និង៣០នាទីល្ងាច ថ្ងៃទី៣០ មេសា នៅផ្សារជីភូ ។
បើតាមសមត្ថកិច្ចនគបាលប៉ុស្តិ៍រដ្ឋបាលសង្កាត់ព្រៃអង្គញ់បានឱ្យដឹងថា ក្រោយពីនគរបាលប៉ុស្តិ៍រដ្ឋបាលព្រៃអង្គញ់បានទទួលព័ត៌មានពីប្រជាពលរដ្ឋរាយការណ៍តាមទូរស័ព្ទថា មានស្រី្តម្នាក់ជិះម៉ូតូដើរលក់គ្មានឯកសារសំគាល់នៅផ្សារជីភូ ទើបសមត្ថកិច្ចចុះទៅដល់កន្លែងកើតហេតុ ហើយក៏ធ្វើការឃាត់ខ្លួនយកមកសួរនាំ ។
សមត្ថកិច្ចនគរបាលសង្កាត់ព្រៃអង្គញ់បានឱ្យដឹងទៀតថា ស្ត្រីសង្ស័យមានឈ្មោះ ថាច់ ស្រី អាយុ៣១ឆ្នាំ មុខរបរមិនពិតប្រាកដ មានទីលំនៅភូមិប្រាសាទ សង្កាត់ប្រាសាទ ក្រុងបាវិត ។ នៅចំពោះមុខសមត្ថកិច្ចជនសង្ស័យបានសារភាពថា ខ្លួនបានលួចកាច់សោ.កម៉ូតូនៅបាវិត ។ តាមរយៈនៃការត្រួតពិនិត្យម៉ូតូសមត្ថកិច្ចបានរកឃើញ មានឯកសារសៀវភៅប័ណ្ណចុះឈ្មោះធានារ៉ាប់រងក្នុងកែបម៉ូតូ ដែលមានលេខទូរសព្ទ័ ទើបសមត្ថកិច្ចបានទំនាក់ទំនងក៏ជួបម្ចាស់ម៉ូតូបានតបមកវិញថា ម៉ូតូរបស់ខ្លួនត្រូវចោរលួចបាត់កាល
វេលាម៉ោង២រសៀលថ្ងៃទី៣០ មេសា ម៉ូតូម៉ាកហុងដាឌ្រីមធុន សេ១២៥ ពណ៌ខ្មៅ ស៊េរី២០១៦ ពាក់ផ្លាកលេខស្វាយរៀង១I-៧២៧១ ដែលបញ្ឈរទុកនៅខាងមុខផ្ទះ ស្ថិតក្នុងភូមិបាវិតកណ្តាល សង្កាត់បាវិត ក្រុងបាវិត ។
ក្រោយពីរកម្ចាស់ឃើញ សមត្ថកិច្ចបានឱ្យម្ចាស់ម៉ូតូឈ្មោះ សូ ចន្នី ភេទស្រី អាយុ២៧ឆ្នាំ មុខរបរលក់ដូរ មកពិនិត្យមើលម៉ូតូ ។ នៅចំពោះមុខសមត្ថកិច្ច ម្ចាស់ម៉ូតូបានឆ្លើយថា ម៉ូតូនេះពិតជារបស់ខ្លួនពិតប្រាកដមែន ហើយសមត្ថកិច្ចក៏បានប្រគល់ម៉ូតូនេះ ឱ្យម្ចាស់ខាងលើនេះវិញភ្លាមៗដែរ ៕
ចែករំលែកព័តមាននេះ