កុលាលភាជន៍សម័យអង្គរត្រូវស្ថានទូតអាមេរិកប្រគល់ជូនអាជ្ញាធរជាតិអប្សរា
- សៀមរាប
ខេត្តសៀមរាប ៖ ពិធីប្រគល់កុលាល ភាជន៍ចំនួន៦៤នៅស្ថានទូតសហរដ្ឋអាមេរិក កាលពីពេល ថ្មីៗកន្លងមករវាងលោកបណ្ឌិត អ៊ា ដារិទ្ធ និងលោកធី សេរីវុឌ្ឍ…
ខេត្តសៀមរាប ៖ ពិធីប្រគល់កុលាល ភាជន៍ចំនួន៦៤នៅស្ថានទូតសហរដ្ឋអាមេរិក កាលពីពេល ថ្មីៗកន្លងមករវាងលោកបណ្ឌិត អ៊ា ដារិទ្ធ និងលោកធី សេរីវុឌ្ឍ តំណាងអាជ្ញាធរជាតិអប្សរា និងលោកស្រី Monica Davis តំណាងស្ថានទូតអាមេរិក ។
នេះជាលើកទី១ ហើយដែលកុលាលភាជន៍ ដ៏ច្រើនបែបនេះត្រូវបានប្រគល់ជូនអាជ្ញាធរជាតិអប្សរាយកទៅរក្សាទុក ។
កុលាលភាជន៍ចំនួនប្រាំកេស ស្មើចំនួន៦៤វត្ថុ ដែលប្រគល់ជូនអាជ្ញាធរជាតិអប្សរានេះមានដូចជា៖ ចាន ក្រឡ ដន្លាប់ ខួច មានស្រទាប់រលោងពណ៌បៃតង និងពណ៌ត្នោត ត្រូវបានប្រគល់ជូនអាជ្ញាធរជាតិអប្សរាដោយវិទ្យាស្ថាន Smitsonian តាមរយៈស្ថានទូតសហរដ្ឋអាមេរិក ដើម្បីរក្សាទុក អភិរក្ស និងសិក្សា ។ កុលាលភាជន៍ទាំងនេះផលិតនៅសម័យអង្គរ មានប្រភពមកពីខេត្តបុរីរម្យប្រទេសថៃ ។
អនុប្រធានមជ្ឈមណ្ឌលអន្តរជាតិស្រាវជ្រាវនិងតម្កល់ឯកសារអង្គរ អ្នកតំណាងអាជ្ញាធរជាតិអប្សរា គឺលោកបណ្ឌិត អ៊ា ដារិទ្ធ ក្នុងការទទួលកុលាលភាជន៍ទាំងនេះឱ្យដឹងថា ប្រវត្តិនៃវត្ថុទាំងនោះត្រូវអ្នកស្រឡាញ់វត្ថុបុរាណជនជាតិជប៉ុន និងអាមេរិកប្រមូលទិញពីខេត្តបុរីរម្យ យកទៅសហរដ្ឋអាមេរិកក្នុងទសវត្សឆ្នាំ១៩៧០ ហើយបន្ទាប់មកបានប្រគល់ជូនវិទ្យាស្ថាន Smithsonian ។ ដោយមានកិច្ចសហការល្អជាមួយអាជ្ញាធរជាតិអប្សរា វិទ្យាស្ថាន Smithsonian ក៏បានប្រគល់កុលាលភាជន៍ទាំងនេះឱ្យអង្គភាពកុលាលភាជន៍អង្គរជាអ្នកមើលការខុសត្រូវ ។
ទាក់ទងនឹងភាជន៍ទាំងអស់ ចំពោះភាជន៍មួយចំនួនដែលល្អៗ អាជ្ញាធរជាតិអប្សរានឹងយកទៅតាំងពិព័រណ៍បង្ហាញជាសាធារណៈ ព្រោះអាជ្ញាធរជាតិអប្សរាមានគម្រោងតាំងពិព័រណ៌វត្ថុបុរាណដែលស្រាវជ្រាវបានជាង២០ឆ្នាំពីតំបន់អង្គរ ។ លើសពីនោះ វត្ថុទាំងនោះនឹងត្រូវរក្សាទុកដើម្បីសិក្សាប្រៀបធៀបពីសម័យកាល បច្ចេកទេស និងគុណភាព រវាងកុលាលភាជន៍ដែលមានប្រភពពីបុរីរម្យ និងតំបន់អង្គរព្រោះកុលាលភាជន៍អាចឆ្លុះបញ្ចាំងពីសម័យកាលមួយនៃប្រវត្តិសាស្ត្រខ្មែរ និងបង្ហាញពីជីវភាពរស់នៅរបស់ប្រជាជនសម័យអង្គរ ថា តើខ្មែរយើងមានលទ្ធភាពផលិតភាជន៍បានល្អកម្រិតណា ។ នាសម័យបុរាណ ភាជន៍ត្រូវបានគេប្រើប្រាស់ប្រចាំថ្ងៃ ធ្វើជាគ្រឿងតាំងលម្អក្នុងផ្ទះ និងសម្រាប់ប្រើក្នុងពិធីសាសនា ផ្សេងៗ ដូចជាពិធីសែនព្រេន និងបួងសួងជាដើម ។
អាជ្ញាធរជាតិអប្សរាសំណូមពរដល់អ្នកដែលរើសបានវត្ថុបុរាណ សូមកុំរក្សាទុក ឬលក់ដូរខុសច្បាប់ សូមយកប្រគល់ជូនអាជ្ញាធរជាតិអប្សរា ដើម្បីរក្សាទុក អភិរក្ស និងសិក្សាពីប្រវត្តិនៃវត្ថុសិល្បៈទាំងនោះ ដើម្បីចងក្រងជាឯកសារសម្រាប់ឱ្យអ្នកជំនាន់ក្រោយបានយល់ដឹងអំពីបុរាណវត្ថុខ្មែរ ។
ដោយមានកិច្ចសហការល្អជាមួយអាជ្ញាធរជាតិអប្សរា វិទ្យាស្ថាន Smithsonian ក៏ធ្លាប់បានរៀបចំសិក្សាសាលាមួយស្តីអំពីថ្មនិងកុលាលភាជន៍ (Petrography workshop) ចាប់ពីថ្ងៃទី៥ ដល់ថ្ងៃទី៩ ខែមីនា ឆ្នាំ២០១៨កន្លងទៅ នៅអាជ្ញាធរជាតិអប្សរា មានអ្នកចូលរួម១៦នាក់មកពីប្រទេសអាស៊ីអាគ្នេយ៍ ដែលក្នុងនោះអ្នកជំនាញជនជាតិខ្មែរមានចំនួន៨នាក់ ។ ក្រៅតែពីបានប្រគល់កុលាលភាជន៍ដ៏ច្រើន វិទ្យាស្ថានSmithsonian ក៏បានផ្តល់ជូននូវសម្ភារមួយចំនួនដូចជា ម៉ាស៊ីនមីក្រូទស្សន៍ សម្ភារមន្ទីរពិសោធន៍ និងសៀវភៅស្តីពីការវិភាគថ្ម និងកុលាលភាជន៍ផងដែរ ៕
ចែករំលែកព័តមាននេះ