រាជធានីភ្នំពេញ ៖ ថ្នាក់ដឹកនាំជាន់ខ្ពស់របស់គណបក្សប្រជាធិបតេយ្យមូលដ្ឋាន ហៅកាត់ថា (គបម/GDP) បានដាក់ចេញនូវគោលនយោបាយ «ស៥» ដើម្បីប្រកួតប្រជែងនឹងគណបក្សនយោបាយផ្សេងទៀត សម្រាប់ការបោះឆ្នោតជ្រើសតាំងតំណាងរាស្ត្រដែលនឹងប្រារព្ធធ្វើនៅថ្ងៃទី២៩ ខែកក្កដា…
រាជធានីភ្នំពេញ ៖ ថ្នាក់ដឹកនាំជាន់ខ្ពស់របស់គណបក្សប្រជាធិបតេយ្យមូលដ្ឋាន ហៅកាត់ថា (គបម/GDP) បានដាក់ចេញនូវគោលនយោបាយ «ស៥» ដើម្បីប្រកួតប្រជែងនឹងគណបក្សនយោបាយផ្សេងទៀត សម្រាប់ការបោះឆ្នោតជ្រើសតាំងតំណាងរាស្ត្រដែលនឹងប្រារព្ធធ្វើនៅថ្ងៃទី២៩ ខែកក្កដា ឆ្នាំ២០១៨ ខាងមុខ ជាពិសេសគោលនយោបាយមួយដែលសំខាន់ក្នុងចំណោមគោលនយោបាយសំខាន់ជាច្រើនរបស់គណបក្សមួយនេះ គឺចាស់ជរាម្នាក់ៗ នឹងទទួលបានការឧបត្ថមពីរដ្ឋចំនួន១៥ ម៉ឺនរៀលក្នុងមួយខែ បើសិនគណបក្សនេះឈ្នះឆ្នោតដឹកនាំរាជរដ្ឋាភិបាល ។
ថ្លែងនៅឯសមាជបោះឆ្នោតរើសបេក្ខជនតំណាងរាស្ត្រចំនួន១២រូប ដែលចូលរួមប្រកួតប្រជែងលំដាប់លេខរៀង ដើម្បីរៀបចំបញ្ជីសម្រាប់ការចុះបញ្ជីគណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះជាមួយគណៈកម្មាធិការជាតិរៀបចំការបោះឆ្នោត (គ.ជ.ប) លោកបណ្ឌិត យ៉ង សាំងកុមារ ប្រធានគណៈកម្មាធិការនាយកគណបក្សប្រជា ធិបតេយ្យមូលដ្ឋាន (គបម/GDP) កាលពីថ្ងៃទី០១ ខែឧសភា ឆ្នាំ២០១៨ នៅតាកែវបានសំណូមពរអង្គបោះឆ្នោត ទាំងបេក្ខជន ទាំងអ្នកគាំទ្រ ពេលត្រឡប់ទៅវិញឲ្យជួយផ្សព្វផ្សាយបន្តថា មាន «គណបក្សប្រជាធិបតេយ្យមូលដ្ឋាន ដែលជាជម្រើសថ្មី» គណបក្សដែលមានបេក្ខជនឈរឈ្មោះ ប្រកូតប្រជែងដណ្តើមអាសនៈ ១២៥ នៅរដ្ឋសភាឆ្នាំ២០១៨នេះ ។
លោកបណ្ឌិត យ៉ង សាំងកុមារក៏បានផ្តាំផ្ញើបេក្ខភាពពីគណបក្សរបស់លោកថា ៖ «សុំជួយជម្រុញលើកទឹកចិត្តឲ្យអ្នកស្រុក អ្នកភូមិយើងទៅបោះឆ្នោតឲ្យបានគគ្រឹកគគ្រេង ហើយបោះគូសឲ្យចំសញ្ញាត្រីកោណ៣ជ្រុងនេះ គណបក្សប្រជាធិបេតយ្យមូលដ្ឋាន ។ កាលណាយើងគូសឲ្យចំគណបក្សប្រជាធិបតេយ្យមូលដ្ឋាន យើងបាននូវគោលនយោយបាយ ស៥ នេះ» ដែលមានដូចជា កសិករទទួលបានទឹកទីផ្សារ ស្ត្រីជាម្តាយទទួលបានមតេ្តយ្យសាលាល្អ សម្រាប់កូនចៅរបស់យើង កម្មករទទួលបានការឧបត្ថមពេលឥតមានការងារធ្វើរយៈពេលខ្លីណាមួយ គឺទទួលបានប្រាក់ឧបត្ថម ទម្រាំរកការងារថ្មីបានធ្វើ ប្រជាពលរដ្ឋទូទៅទទួលបានគ្រូពេទ្យល្អ ធ្វើម៉េចជួយកូនចៅយុវជនទទួលបានការងារធ្វើ «ជាពិសេសឪពុក-ម្តាយ ជីដូន-ជីតារបស់យើងដែលជាចាស់ជរា នឹងទទួលបានការឧបត្ថមពីរដ្ឋ១៥ម៉ឺនរៀល ក្នុងមួយខែ» ដែលនេះជាគោលនយោបាយដែលយើងជាបេក្ខជនទាំងអស់ថា គណបក្សនឹងដាក់ចូលប្រកូតប្រជែងក្នុងការបោះឆ្នោតជាតិខាងមុខនេះ ។
ពេលយើងជាប់ឆ្នោត យើងនឹងខិតខំធ្វើការយ៉ាងម៉េចឲ្យបានរដ្ឋាភិបាលថ្មីមួយ ដែលអនុវត្តគោលនយោបាយសំខាន់ៗ ហើយសង្ឃឹមថា គណបក្សយើងនឹងទទួលបានជោគជ័យ និងការគាំទ្រច្រើននាពេលបោះឆ្នោតខាងមុខ» ៕
ចែករំលែកព័តមាននេះ