តាមរយៈការលើកពាន Euro ឆ្នាំ២០១៦ ដោយយកឈ្នះក្រុមម្ចាស់ផ្ទះបារាំងក្នុងលទ្ធផល១ទល់នឹង០ដ៏គួរឱ្យភ្ញាក់ផ្អើលរួចមក ព័រទុយហ្គាល់ ហាក់បង្ហាញពិភពលោកឱ្យឃើញកាន់តែច្បាស់ថា ពួកគេមិនមែនជាក្រុមដែលត្រូវមើលរំលងនោះទេ ។ ក្រុមជម្រើសជាតិដែលកំពុងក្តោបក្តាប់តំណែងលេខ៣ក្នុងតារាងចំណាត់ FIFA…
តាមរយៈការលើកពាន Euro ឆ្នាំ២០១៦ ដោយយកឈ្នះក្រុមម្ចាស់ផ្ទះបារាំងក្នុងលទ្ធផល១ទល់នឹង០ដ៏គួរឱ្យភ្ញាក់ផ្អើលរួចមក ព័រទុយហ្គាល់ ហាក់បង្ហាញពិភពលោកឱ្យឃើញកាន់តែច្បាស់ថា ពួកគេមិនមែនជាក្រុមដែលត្រូវមើលរំលងនោះទេ ។
ក្រុមជម្រើសជាតិដែលកំពុងក្តោបក្តាប់តំណែងលេខ៣ក្នុងតារាងចំណាត់ FIFA បានចូលរួមប្រកួតក្នុងព្រឹត្តិការណ៍ World Cup នៅឆ្នាំ១៩៦៦ ប៉ុន្តែពួកគេខកខានវិញអស់ជាច្រើនរដូវកាល ។ មកទល់ពេលនេះ ក្រុមដែលមានរហស្សនាម “បញ្ចខែល” បង្ហាញខ្លួននៅក្នុងព្រឹត្តិការណ៍ដ៏ធំនេះជាលើកទី៧ ដោយពីមុនមកពួកគេមានឱកាសឡើងទៅដល់វគ្គពាក់កណ្តាលផ្តាច់ព្រ័ត្រចំនួន២លើក ប៉ុន្តែត្រូវហាលអាវទាំង២លើកអំឡុងឆ្នាំ១៩៦៦ និង២០០៦ ។ ចំពោះវត្តមានចុងក្រោយក្នុងព្រឹត្តិការណ៍នេះកាលពីឆ្នាំ២០១៤ ព័រទុយហ្គាល់បានត្រឹមឡើងដល់វគ្គចែកពូលប៉ុណ្ណោះ ។
ក្តីរំពឹង ៖ ថ្វីដ្បិតតែទំព័រប្រវត្តិសាស្ត្រព័រទុយហ្គាល់មិនទាន់បានចារពីភាពជោគជ័យច្រើនរបស់ខ្លួនក៏ពិតមែន ប៉ុន្តែក្រុមជម្រើសជាតិខាងលើ ហាក់បង្ហាញភាពលេចធ្លោគួរឱ្យកត់សម្គាល់នាប៉ុន្មានឆ្នាំចុងក្រោយនេះ ស្របពេលដែលសមត្ថភាពកូនក្រុមនីមួយៗរីកចម្រើនកាន់តែខ្លាំង ។ ព័រទុយហ្គាល់ដែលស្ថិតនៅពូល B អាចនឹងត្រូវប្រឈមបញ្ហាខ្លះៗ ដោយសារតែក្នុងនោះមានអេស្ប៉ាញជាគូប្រកួតខ្លាំង ប៉ុន្តែម៉ារ៉ុក និងអុីរ៉ង់អាចជាឈ្នាន់សម្រាប់ក្រុមបញ្ចខែលដើម្បីមានឱកាសឆ្លងផុតវគ្គចែកពូល ។
គ្រូបង្វឹក ៖ ក្រោយដឹកនាំក្រិកឱ្យស្គាល់រសជាតិ World Cup លើកដំបូងនៅរដូវកាលឆ្នាំ២០១៤ វគ្គ១៦ក្រុមចុងក្រោយរួចមក លោក Fernando Santos ត្រូវបានព័រទុយហ្គាល់តែងតាំងរូបលោកជាគ្រូបង្វឹកក្រុមជម្រើសជាតិនៅឆ្នាំដដែលនោះ ។ ក្រោមការដឹកនាំរបស់គ្រូបង្វឹកវ័យ៦៣ឆ្នាំរូបនេះ បានជួយឱ្យព័រទុយហ្គាល់មានមុខលើឆាកអន្តរជាតិបន្ទាប់ពីឈ្នះពានរង្វាន់យូរ៉ូឆ្នាំ២០១៦ និងកាន់តំណែងលេខ៣នៃការប្រកួតពានរង្វាន់ FIFA Confederations Cup ២០១៧ ។
កីឡាករ Super Starប្រចាំក្រុម ៖ Cristiano Ronaldo នៅតែជាកីឡាករឆ្នើមមួយរូបទាំងនៅក្លិប Real Madrid និងក្រុមជម្រើសជាតិ ។ ខ្សែប្រយុទ្ធស្រស់សង្ហាម្នាក់នេះ បានចូលរួមជាមួយឈុតធំនៅឆ្នាំ២០០៣ ដោយប្រកួតបានចំនួន១៤៩ប្រកួត និងស៊ុតបាន៨១គ្រាប់ ។ ជ័យជម្នះនៅយូរ៉ូឆ្នាំ២០១៦ បានធ្វើឱ្យ Ronaldo មានជំនឿចិត្តថា នឹងអាចជ្រោមជ្រែងឱ្យក្រុមប្រទេសខ្លួនឡើងដល់វគ្គផ្តាច់ព្រ័ត្រ World Cup រដូវកាលនេះ ។
បញ្ជីឈ្មោះសមាសភាពកីឡាករសរុប (បណ្តោះអាសន្ន) ៖
-អ្នកចាំទី ៖ Patrício (Sporting CP), Anthony Lopes (Lyon), Beto (Göztepe) ។
-ខ្សែការពារ ៖ Bruno Alves (Rangers), Rolando (Marseille), Luís Neto (Fenerbahçe), Guerreiro (Dortmund), José Fonte (Dalian Yifang), Mário Rui (Napoli), Soares (Southampton), Cancelo (Inter), Nélson Semedo (Barcelona), Pepe (Besiktas) ។
-ខ្សែបម្រើ ៖ João Moutinho (Monaco), Joao Mario (West Ham), Bernardo Silva (Man City), Rúben Neves (Wolver), Carvalho និង Bruno Fernandes (Sporting CP), André Gomes (Barcelona), Manuel Fernandes (Lokomotiv Mos), Adrien Silva (Leicester), Pizzi (Befica) ។
-ខ្សែប្រយុទ្ធ ៖ Cristiano Ronaldo (Real Madrid), André Silva (Milan), Gonçalo Guedes (Valencia), Gelson Martins (Sporting CP), Quaresma (Besiktas), Nani (Lazio), Eder (Norwich), Rony Lopes (Monaco), Bruma (Leipzig) ៕
ចែករំលែកព័តមាននេះ