ខេត្តសៀមរាប ៖ ចោរស្ទើរភ្លើងលួចរថយន្តបានសម្រេច បានប៉ុន្មានម៉ោងពីស្រុកបន្ទាយស្រី ជាប់អន្ទាក់ប៉ូលិសស្រុកស្វាយលើ រួចបញ្ជូនមកកាន់ការិយាល័យជំនាញនៃស្នងការនគរបាលខេត្ត ដើម្បីរៀបចំកសាងសំណុំរឿងបញ្ជូនទៅតុលាការ បន្ទាប់ពីមានពាក្យបណ្តឹងរបស់ជនរងគ្រោះ ដែលបានបាត់រថយន្ត១គ្រឿង ម៉ាកTiger ពណ៌ត្រាវ ស៊េរីឆ្នាំ១៩៩៩ មួយបាំងកន្លះ ពាក់ស្លាកលេខ បាត់ដំបង ២A-១៤៣៩ និងលុយ ,មាស មួយចំនួនធំ កាលពីថ្ងៃទី៣០ ខែមេសា ឆ្នាំ២០១៨ ស្ថិតនៅមុខវត្តនាគគូរ ក្នុងភូមិកកោះជ្រុំ ឃុំខ្នារសណ្តាយ ស្រុកបន្ទាយស្រី ខេត្តសៀមរាប។ ហេតុការណ៍ឃាត់ខ្លួនបានជនសង្ស័យលួចឡាននោះ កើតឡើងនៅវេលាម៉ោង៤ និង១៦នាទីល្ងាច ថ្ងៃទី៣០ ខែមេសា ឆ្នាំ២០១៨ ស្ថិតនៅចំណុចផ្លូវគ្រោះក្រហម ភូមិខ្នារក្រៅ ឃុំកន្ទួត ស្រុកស្វាយលើ ខេត្តសៀមរាប។
បើតាមការអះអាងពីលោកឧត្តមសេនីយ៍ត្រី ភឹង ចិន្តារ៉េត ស្នងការរងទទួលបន្ទុកផែនកណ្តាលយុត្តិធម៌ នៃស្នងការដ្ឋាននគរបាលខេត្ត បានប្រាប់នៅថ្ងៃទី១ ខែឧសភា ឆ្នាំ២០១៨នេះថា យោងតាមពាក្យបណ្តឹងរបស់ជនរងគ្រោះដែលបានបាត់រថយន្ត និងទ្រព្យសម្បត្តិ ឈ្មោះ សាង ង៉ន ភេទប្រុស អាយុ៣៨ឆ្នាំ មានមុខរបរលក់ដូរ រស់នៅភូមិព្រៃគុយ ឃុំអំពិល ស្រុកប្រាសាទបាគង ខេត្តសៀមរាប បានជិះឡានទៅទិញបន្លែ នៅភូមិអូរម្នាស់ ក្នុងស្រុកបន្ទាយស្រី ខេត្តសៀមរាប ទើបលោក បានឱ្យកម្លាំងក្រោមឱវាទ ចុះសហការជាមួយកម្លាំងអធិការតាមស្រុក ស្វែងរកជនល្មើស ទើបឈានដល់ធ្វើការឃាត់ខ្លួនបានជនសង្ស័យភ្លាមៗផងដែរ បន្ទាប់ពីលួចបានប៉ុន្មានម៉ោង ក្នុងថ្ងៃទី៣០ ខែមេសាឆ្នាំ២០១៨ថ្មីៗនេះ។ លោកបានបញ្ជាក់ថា ជនសង្ស័យឈ្មោះ រ៉ាក
ណារី ភេទប្រុស អាយុ២១ឆ្នាំ រស់នៅ
ភូមិលាងដៃ ឃុំលាងដៃ ស្រុក
អង្អរធំ ខេត្តសៀមរាប។
អង្គហេតុ ជនរងគ្រោះខាងលើ បានបើករថយន្ដ១គ្រឿង ចេញពីផ្ទះ ក្នុងភូមិព្រៃគុយ ដើម្បីទៅទិញបន្លែ នៅភូមិអូរម្នាស់ ក្នុងស្រុកបន្ទាយស្រី ពេលជិះដល់កន្លែងលក់ដំឡូង ខាងជើងផ្លូវចូល វត្តនាគគូរ ភូមិកកោះជ្រុំ ឃុំខ្នារសណ្តាយ ស្រុកបន្ទាយស្រី ខេត្តសៀមរាប គាត់ក៏ឈប់រថយន្ត ហើយទុកសោនៅនឹងរថយន្ត រួច ចុះរកទិញកាំបិត ពេលនោះគាត់បានឃើញ មនុស្សប្រុសម្នាក់ អាយុប្រហែលជាង២០ឆ្នាំ កម្ពស់ប្រហែល ១.៦០ម៉ែត្រ ពាក់អាវពណ៌ប្រផេះ ស្លៀកខោខ្លី ត្រឹមជង្គង់ ពណ៌មិនចាំ ដើរជក់បារី តាមផ្លូវមកពីទិសខាងជើងមកដល់ដើរឡើងរថយន្តរបស់គាត់ហើយបើកចេញតាមផ្លូវ៦៧ ទៅទិសខាងជើងបាត់តែម្តង។
លោកបានបញ្ជាក់បន្ថែមថា
ការបាត់បង់ដែលត្រូវចោរលួច របស់ជនរងគ្រោះនោះមាន៖ រថយន្តមួយគ្រឿង ម៉ាកTiger ពណ៌ត្រាវ ស៊េរីឆ្នាំ១៩៩៩ មួយបាំងកន្លះ ពាក់ស្លាកលេខ បាត់ដំបង ២A-១៤៣៩ ដែលជាកម្មសិទ្ធរបស់ឈ្មោះ
សាង ង៉ន ភេទប្រុស អាយុ៣៨ឆ្នាំ រស់នៅភូមិព្រៃគុយ ឃុំអំពិល ស្រុកប្រាសាទបាគង ខេត្តសៀមរាប និងលុយរៀលមួយលានរៀល លុយដុល្លារ២០០ដុល្លារ ខ្សែកមាស១តម្លឹង ខ្សែដៃមាស១តម្លឹង កាតគ្រីរថយន្ត១ ប័ណ្ណបើកបរ២ និងទូរស័ព្ទមួយគ្រឿង ម៉ាកhuawei ពណ៌ខ្មៅ មានលេខ 088 33 96 006។ បច្ចុប្បន្នជនសង្ស័យ ត្រូវបានកម្លាំងជំនាញ រៀបចំកសាងសំណុំរឿង បញ្ជូនទៅតុលាការខេត្ត ដើម្បីចាត់ការតាមនិតិវិធីច្បាប់។ ចំណែកវត្ថុតាង ដែលដកហូតបានពីជនរងគ្រោះ ប្រគល់ឱ្យម្ចាស់ដើមវិញ៕
ចែករំលែកព័តមាននេះ