រាជធានីភ្នំពេញ ៖ លោក ញ៉ែម អេន អតីតអ្នកថតរូបប្រចាំនៅមន្ទីរ (ស២១) ឬគុកទួលស្លែង ក្នងរបបខ្មែរក្រហមបានក្លាយជាអគ្គលេខាធិការរងនៃគណបក្សខ្មែរសាធារណរដ្ឋ ដែលដឹកនាំដោយកូនប្រុស លោក លន់ នល់ គឺលោក លន់ ឫទ្ធិ។ ក្នុងវ័យជាង៥០ឆ្នាំលោក ញ៉ែម អេន បានថ្លែងថា លោកធ្លាប់ឆ្លងកាត់របបប៉ុលពត ឬកម្ពុជាប្រជាធិបតេយ្យ ដឹកនាំដោយលោក សាឡុត ស ហៅប៉ុល ពត និងជាអ្នកថតរូបនាសម័យនោះ ប្រចាំនៅមន្ទីរ(ស២១) ឬគុកទួលស្លែង ដើម្បីថតរូបអ្នកទោសទាំងអស់ដែលបានចាប់ចូលទីនោះ។ លោក ញ៉ែម អេន លើកឡើងថា រូបលោកបានរត់ទៅកាន់ជាយដែនជាមួយមេដឹកនាំខ្មែរក្រហមមួយចំនួនបន្ទាប់ពីរបបអាវខ្មៅប៉ុល ពតបានដួលរលំនាថ្ងៃ៧ ខែមករា ឆ្នាំ១៩៧៩។
បន្ទាប់ពីសមាហរណកម្មនាទសវត្សទី៩០ លោកក៏បានទទួលតួនាទីជាអភិបាលរងស្រុកអន្លង់វែង នៃខេត្តឧត្តរមានជ័យ។ ក្នុងបទសម្ភាសន៍មួយកាលពីថ្ងៃទី៣០ ខែមេសា ជាមួយនឹងតួនាទីជាអគ្គលេខាធិរងនៃគណបក្ស ខ្មែរសាធារណរដ្ឋ និងបេក្ខជនតំណាងរាស្ត្រមណ្ឌលសៀមរាបលោកបានបង្ហាញពីក្តី សង្ឃឹមរបស់លោកថា គណបក្សខ្មែរសាធារណរដ្ឋ អាចមានសង្ឃឹមទទួលបានការគាំទ្រខ្លះ ឬទទួលបានអាសនៈខ្លះ។ លោកបានលើកឡើងថា «ខ្ញុំពិតជាមានក្តីសង្ឃឹមថា គណបក្សខ្មែរសាធារណរដ្ឋនេះនឹងមានការគាំទ្រ។
ព្រោះពលរដ្ឋខ្មែរច្រើនណាស់ដែលបានស្គាល់ ពីរបបសាធារណរដ្ឋខ្មែរដឹកនាំដោយសេនាប្រមុខ លន់ នល់ ដែលជាឪពុកលោកប្រធាន លន់ ឫទ្ធិ»។ លោក ញ៉ែម អេន បានអះអាងថា លោកបានធ្លាប់ចូលប្រឡូកក្នុងឆាកនយោបាយជាមួយ បក្សសង្គ្រោះជាតិ បក្សអំណាចខ្មែរ និងបង្កើតគណបក្សសាមគ្គីខ្មែរ តែដោយសារតែគណបក្សរបស់លោក មិនមានឯកសារ និងសកម្មភាពនយោបាយគ្រប់គ្រាន់ត្រូវបានរំលាយ ទើបលោកបានដឹកនាំមន្ត្រីរបស់ លោកមួយចំនួនមកចូលរួមសកម្មភាពនយោបាយជាមួយគណបក្សខ្មែរសាធារណរដ្ឋវិញ៕
ចែករំលែកព័តមាននេះ