តាម​ប្រភព​ព័ត៌មាន ESPN បាន​ឲ្យ​ដឹង​ថា ក្លិប​អ្នកមាន​បារាំង Paris Saint- Germain បាន​ប្រកាស​​ថា ជើង​ខ្លាំង​ប្រចាំ​ក្លិប Neymar នឹង​ចូល​លេង​ឲ្យ​ក្លិប​វិញ​នៅ​ប៉ុន្មាន​ស​ប្តា​ហ៍​ខាង​មុខ​នេះ​បន្ទាប់​ពី​រង​របួស​សម្រាក​អស់​ពេល​ជា​ច្រើន​ខែ ។

កីឡាករ​អាយុ​២៦​ឆ្នាំ Neymar ត្រូវ​បាន​ខក​ខានមិនបាន​ប្រកួត​តាំងពី​ត្រូវ​រង​របួស​បាក់ឆ្អឹង​បាត​ជើង​​ខាងស្តាំ​នៅ​ក្នុង​ការ​ប្រកួត​ជាមួយនឹង Marseille កាលពី​ចុងខែ​កុម្ភៈ ។ រូបគេ​បាន​ធ្វើការ​វះកាត់​នៅ​ប្រទេស​ប្រេ​ស៊ី​ល​ដែល​ជា​ស្រុក​កំណើត​អស់​ពេល​ជា​ច្រើន​ខែ ។

ក្លិប​អ្នកមាន​បារាំង PSG បាន​ប្រកាស​ថា «​នៅ​ក្នុង​ការ​ពិនិត្យ​ទៅ​លើ​សុខភាព Neymar កាលពី​ថ្ងៃ​សៅរ៍ ដោយ​វេជ្ជបណ្ឌិត​របស់ PSG លោក Eric Rolland និង វេជ្ជបណ្ឌិត​របស់​ក្រុម​ជម្រើសជាតិ​ប្រេ​ស៊ី​ល​លោក Rodrigo Lasmar បាន​រក​ឃើញ​ថា​របួស​របស់ Neymar មានការ​វិវត្តន៍​ទៅ​រក​ភាព​ប្រសើរ​លឿន ដែល​អាច​ឲ្យ​ដោះ​ឧបករណ៍​ជំនួយ​ចេញ​ដោយ​គ្មាន​បញ្ហា ។ Neymar នឹង​ត្រូវ​ហាត់រៀន​ដើរ​បន្ថែម​នៅ​ប្រេ​ស៊ី​ល​ហើយនឹង​នៅ​កន្លែង​ហ្វឹកហាត់​របស់ PSG» ។

ចំពោះ Neymar ផ្ទាល់​ក៏​បាន​បង្ហើប​ជា​សាធារណៈ​ថា រូបគេ​រំពឹង​ថា នឹង​អាច​ចូល​លេង​វិញ​នៅ​ថ្ងៃ​ទី​១៧ ខែឧសភា ដែល​អាច​នឹង​ជា​ការ​ប្រកួត​វគ្គ​ចុង​ក្រោយ​របស់ PSG សម្រាប់​រដូវ​កាល​នេះ មុន​ពេល​ត្រូវ​ទៅ​ត្រៀមខ្លួន​ប្រកួត World Cup សម្រាប់​ក្រុម​ជម្រើសជាតិ​ប្រេ​ស៊ី​ល ៕