ខេត្តស្ទឹងត្រែង ៖ ម៉ូតូស៊េរីទំនើបមួយគ្រឿង ត្រូវបានគេប្រទះឃើញសល់តែគ្រោងឆ្អឹង ក្នុងគុម្ពឫស្សីដែលដុះនៅមាត់អូរក្បែរទីប៉ាឆា ស្ថិតនៅភូមិលើ សង្កាត់ស្រះឫស្សី ក្រុងស្ទឹងត្រែង កាលពីព្រឹកថ្ងៃទី២៩ មេសា ដែលសង្ស័យថា ចោរលួចយកមកលាក់ទុក ហើយត្រូវភ្លើងឆេះ ។
ប្រភពព័ត៌មានឱ្យដឹងថា កាលពីវេលាម៉ោងជាង២រំលងអធ្រាត្រឈាន ចូលថ្ងៃទី២៩ មេសា ប្រជាពលរដ្ឋរស់នៅក្បែរទីប៉ាឆា បានឃើញភ្លើងឆេះគុម្ពឫស្សីដ៏ធំមួយ ដុះអមមាត់អូរគ្មានទឹក ដោយមិនដឹងមូលហេតុ ។ លុះព្រឹកឡើងទៅមើល ឃើញម៉ូតូមួយគ្រឿងឆេះហ្មត់សល់តែគ្រោងឆ្អឹង ក៏រាយការណ៍ទៅនគរបាលប៉ុស្តិ៍សង្កាត់ស្រះឫស្សីចុះទៅពិនិត្យ ។ លោក ប៊ុន រតនា នាយប៉ុស្តិ៍នគរបាលសង្កាត់ស្រះឫស្សីក្រុងស្ទឹងត្រែងឱ្យដឹងថា កាលពីវេលារំលងអធ្រាត្ រឈានចូលថ្ងៃទី២៩ ខែមេសា បុរសម្នាក់ឈ្មោះ សុខ សាអែម អាយុ២៣ឆ្នាំ បានរាយការណ៍អំពីការបាត់ម៉ូតូមួយគ្រឿង ម៉ាកឌ្រីមស៊េរី ឆ្នាំ២០១៨ ខណៈទុកនៅមុខផ្ទះ ដោយមិនបានដកសោចេញ ។ លោកបន្តថា លុះព្រឹកឡើង ទើបឮប្រជាពលរដ្ឋរស់នៅក្បែរទីប៉ាឆារាយការណ៍តាមទូរស័ព្ទថា បានប្រទះឃើញម៉ូតូមួយគ្រឿងត្រូវភ្លើងឆេះនៅសល់តែគ្រោងឆ្អឹង ដែលទំនងចោរយកមកលាក់នៅក្នុងគុម្ពឫស្សី ។ ពេលទៅពិនិត្យជាក់ស្តែង ក៏បានហៅម្ចាស់ម៉ូតូដែលបាត់កាលពីយប់ទៅផ្ទៀងផ្ទាត់លេខតួ និងលេខម៉ាស៊ីនទើបដឹងថា ជាម៉ូតូដែលបាត់កាលពីយប់ ។
តាមការសន្និដ្ឋានរបស់នគរបាលព្រហ្មទណ្ឌកម្រិតស្រាលឱ្យដឹងថា ម៉ូតូនោះក្រោយពីចោរលួចបានហើយក៏យកទៅលាក់ទុកនៅក្នុងអូរមានដុះដើមឫស្សី ក្បែរទីប៉ាឆាស្ថិតនៅភូមិលើ សង្កាត់ស្រះឫស្សី ក្រុងស្ទឹងត្រែង ។ បន្ទាប់មក ក៏ត្រូវភ្លើងឆេះស្លឹកប្ញស្សីចាស់ៗ ដែលជ្រុះបង្កឲ្យរាលដាលឆេះដល់ម៉ូតូដែលលាក់ទុកទីនោះ លុះវេលាម៉ោងជាង៤ទៀបភ្លឺ ទើបធ្លាក់ភ្លៀង តែម៉ូតូត្រូវភ្លើងឆេះហ្មត់មុនពេលធ្លាក់ភ្លៀងទៅហើយ ។
លោក ហោ វុទ្ធី នាយការិយាល័យនគរបាលព្រហ្មទណ្ឌកម្រិតស្រាល បានបញ្ជាក់កាលពីព្រឹកថ្ងៃទី២៩ ខែមេសាថា ក្រោយពីមានសេចក្តីរាយការណ៍ពីប្រជាពលរដ្ឋទៅនគរបាលប៉ុស្តិ៍សង្កាត់ស្រះឫស្សី កម្លាំងការិយាល័យព្រហ្មទណ្ឌកម្រិតស្រាលក៏បានចុះពិនិត្យរួមជាមួយនគរបាលប៉ុស្តិ៍ និងម្ចាស់ម៉ូតូ ក្រោយមកទើបនាំមកស្នងការដ្ឋាននគរបាលខេត្ត ធ្វើការប្រគល់ជូនម្ចាស់ដើមវិញ ៕
ចែករំលែកព័តមាននេះ