អូស្ត្រាលី ៖ យោងតាមក្រុមអ្នកស្រាវជ្រាវនៅប្រទេសអូស្ត្រាលីបានឱ្យដឹងថា សត្វពីងពាងដែលអាយុកាលបានបំបែកឯតទគ្គកម្មអស់រយៈពេល៤៣ឆ្នាំ និងល្បីល្បាញបំផុតនៅលើពិភពលោកបានស្លាប់ បន្ទាប់ពីត្រូវបានស្រាំងទិចជាច្រើនទ្រនិច ។ នេះបើយោងតាមការផ្សាយរបស់គេហទំព័រ msn ។…
អូស្ត្រាលី ៖ យោងតាមក្រុមអ្នកស្រាវជ្រាវនៅប្រទេសអូស្ត្រាលីបានឱ្យដឹងថា សត្វពីងពាងដែលអាយុកាលបានបំបែកឯតទគ្គកម្មអស់រយៈពេល៤៣ឆ្នាំ និងល្បីល្បាញបំផុតនៅលើពិភពលោកបានស្លាប់ បន្ទាប់ពីត្រូវបានស្រាំងទិចជាច្រើនទ្រនិច ។
នេះបើយោងតាមការផ្សាយរបស់គេហទំព័រ msn ។ ប្រភពដដែលបានបញ្ជាក់ថា Agence France-Press បានរាយការណ៍ថា សត្វពីងពាងដែលត្រូវបានគេស្គាល់ ជាពីងពាងលេខ16 ដោយអ្នកវិទ្យាសាស្ត្រជនជាតិអូស្ត្រាលីនោះ គឺជាពីងពាងញីមួយក្បាលដែលរស់នៅក្នុងតំបន់កណ្តាល Wheatbelt នៃប្រទេសអូស្ត្រាលីភាគខាងលិច ។ ក្រុមអ្នកស្រាវជ្រាវបាននិយាយកាលពីថ្ងៃចន្ទថា សត្វពីងពាងមិនបានស្លាប់ដោយសារអាយុចាស់នោះទេ ប៉ុន្តែត្រូវបានសម្លាប់ដោយសារស្រាំងទិចជាច្រើនទ្រនិច ។
យោងតាមការសិក្សាមួយដែលបានចេញផ្សាយកាលពីខែមករា នៅទស្សនាវដ្តីជីវសាស្ត្រអភិរក្សជីវៈប៉ាស៊ីហ្វិកបានឱ្យដឹងថា សត្វពីងពាងនេះ គឺមានអាយុវែង និងបានឈ្នះនូវកំណត់ត្រាចាស់ពីសត្វពីងពាងមុន ដែលមានឈ្មោះថា tarantula អាយុ 28 ឆ្នាំនៅម៉ិកស៊ិក ។ ពីងពាងលេខ16 ត្រូវបានគេរកឃើញក្នុងអំឡុងពេលសិក្សាពីស្ថិតិពីងពាងឆ្នាំ1974 ហើយត្រូវបានតាមដានដោយអ្នកស្រាវជ្រាវតាំងពីពេលនោះមក ។
លោក Leanda Mason អ្នកនិពន្ធនាំមុខនៅក្នុងការសិក្សាបានថ្លែងថា «សម្រាប់ការយល់ដឹងរបស់យើង គឺពីងពាងនេះជាសត្វមានវ័យចាស់បំផុតដែលធ្លាប់កត់ត្រាកន្លងមក ហើយជីវិតដ៏សំខាន់របស់ពីងពាងញីមួយនេះ បានអនុញ្ញាតឱ្យយើងសិក្សាបានដឹងលើឥរិយាបថរបស់សត្វពីងពាង និងកម្លាំងចលកររបស់វា» ។ លោក Mason បាននិយាយថា ក្រុមលោកពិតជា «ពិបាក» ទទួលយកលើការស្លាប់របស់ពីងពាងញីមួយក្បាលនេះ ។
សត្វពីងពាងត្រចៀក (Trapdoor spiders) ជាទូទៅត្រូវបានប្រទះឃើញរស់នៅទូទាំងប្រទេសអូស្ត្រាលី និងអាចត្រូវបានរកឃើញនៅក្នុងព្រៃក៏ដូចជា នៅក្នុងតំបន់លំនៅដ្ឋានដែលជាធម្មតាវាមានជីវិតរស់នៅរវាង៥ ដល់២០ ឆ្នាំ ។ ពីងពាងញីភាគច្រើនរស់នៅស្ទើរតែទាំងអស់ក្នុងជីវិតរបស់ពួកគេនៅក្នុងរូង និងមិនត្រូវបានចាត់ទុកថា មានគ្រោះថ្នាក់ចំពោះមនុស្សទេ
ចែករំលែកព័តមាននេះ