ទីក្រុងសេអ៊ូល ៖ តាមទិន្នន័យបឋមដែលបានបង្ហាញកាលពីថ្ងៃព្រហស្បតិ៍សប្ដាហ៍មុនថា សេដ្ឋកិច្ចកូរ៉េខាងត្បូងសម្រេចបាន១,១%ក្នុងរយៈពេល៣ខែដំបូងនៃឆ្នាំនេះ ធៀបនឹងត្រីមាសចុងក្រោយឆ្នាំមុន ដោយសារការនាំចេញដ៏ខ្លាំងក្លានៃផលិតផលអេឡិចត្រូនិក និងកំណើនវិនិយោគលើវិស័យសំណង់ ។
ធនាគារកណ្ដាលកូរ៉េបាននិយាយថា ផលិតផលក្នុងស្រុកសរុប(GDP) របស់ប្រទេសនេះសម្រេចបានកំណើន១,១%ក្នុងអំឡុងរយៈពេល៣ខែដើមឆ្នាំនេះ ។ កាលពីឆ្នាំមុន កូរ៉េខាងត្បូងបានក្លាយជាប្រទេសសេដ្ឋកិច្ចលំដាប់ទី៤នៅអាស៊ី ជាមួយកំណើន២,៨% ។
ក្នុងសន្និសីទសារព័ត៌មានមួយដែលធ្វើឡើងកាលពីថ្ងៃព្រហស្បតិ៍ លោកChung Kyu-il នាយកផ្នែកស្ថិតិសេដ្ឋកិច្ចរបស់ធនាគារ បាននិយាយថា ៖« ការកើនឡើងនេះ គឺដោយសារផលប៉ះពាល់ជាមូលដ្ឋាននៃកំណើនអវិជ្ជមានកាលពីត្រីមាសមុន » ។
លោកបន្ដថា ការនាំចេញដែលបានវាស់វែងដោយបរិមាណនៅក្នុងផលិតផលក្នុងស្រុកសរុបបានកើនឡើង៤,៤% ក្នុងត្រីមាសចុងក្រោយ។ ការវិនិយោគហេដ្ឋារចនាសម្ព័ន្ធបានកើនឡើង៥,២% បើធៀបនឹងត្រីមាសមុន ខណៈពេលការវិនិយោគលើលំនៅឋាន បានកើនឡើង២,៨% ក្នុងកំឡុងពេលនេះ ។
ក្រុមហ៊ុនSamsung ជាផ្នែកមួយយ៉ាងសំខាន់ដែលបានជួយឲ្យការនាំចេញរបស់ប្រទេសនេះមានកំណើនខ្ពស់ ។ ក្រុមហ៊ុនអេឡិចត្រូនិកមួយនេះ គឺជាអ្នកផ្គត់ផ្គង់ឈីបនាំមុខគេលើពិភពលោក និងទទួលបានប្រាក់ចំណេញខ្ពស់ផងដែរក្នុងរយៈពេល១ត្រីមាសនេះ ។
ជាមួយគ្នានេះ លោក Chung Kyu-il បានលើកឡើងផងដែរថា ភាពប្រសើរឡើងនៃទំនាក់ទំនងអន្តរកូរ៉េ នឹងផ្ដល់ប្រយោជន៍យ៉ាងច្រើនបន្ថែមទៀតដល់កំណើនសេដ្ឋកិច្ចនៃកូរ៉េទាំងពីរ ។
លោកថា ៖« បើសិនជាមានកិច្ចសហប្រតិបត្តិការសេដ្ឋកិច្ចជាមួយកូរ៉េខាងជើងកាន់តែច្រើននោះ វានឹងផ្តល់នូវបណ្តាញជាច្រើនសម្រាប់ប្រទេសកូរ៉េខាងត្បូងដើម្បីរំពឹងថា នឹងមានផលប៉ះពាល់ជាវិជ្ជមានទៅលើសេដ្ឋកិច្ច » ។
លោកបន្ថែមថា ការកាត់បន្ថយហានិភ័យ «ភូមិសាស្ត្រនយោបាយ» រវាងកូរ៉េទាំងពីរអាចជំរុញការវិនិយោគ និងពង្រីកការចំណាយរបស់អ្នកវិនិយោគក្នុងវិស័យឯកជន ៕
ចែករំលែកព័តមាននេះ