ទីក្រុងប៉េកាំង៖ ប្រទេសចិនបានអំពាវនាវឱ្យប្រទេសនានានៅលើពិភពលោកកុំលូកដៃចូលបញ្ហាហុងកុងដែលចិនចាត់ទុកជាកិច្ចការផ្ទៃក្នុងរបស់ខ្លួន។ ការថ្លែងដូច្នេះបន្ទាប់ពីប្រទេសខ្លះរិះគន់ការកាត់ទោសសកម្មជនដែលប្រឆាំងនឹងរដ្ឋាភិបាលចិន លោកជីមីឡៃ (Jimmy Lai)។ លោកជាសេដ្ឋី និងជាអតីតចាងហ្វាងសារព័ត៌មានអនឡាញអេផល ដេលី (Apple…
ទីក្រុងប៉េកាំង៖ ប្រទេសចិនបានអំពាវនាវឱ្យប្រទេសនានានៅលើពិភពលោកកុំលូកដៃចូលបញ្ហាហុងកុងដែលចិនចាត់ទុកជាកិច្ចការផ្ទៃក្នុងរបស់ខ្លួន។ ការថ្លែងដូច្នេះបន្ទាប់ពីប្រទេសខ្លះរិះគន់ការកាត់ទោសសកម្មជនដែលប្រឆាំងនឹងរដ្ឋាភិបាលចិន លោកជីមីឡៃ (Jimmy Lai)។ លោកជាសេដ្ឋី និងជាអតីតចាងហ្វាងសារព័ត៌មានអនឡាញអេផល ដេលី (Apple Daily)។ លោកជាប់ចោទពីបទសមគំនិតជាមួយបរទេស និងបទចោទជាច្រើនករណីទៀត។
អ្នកនាំពាក្យចិន លោកគួចាឃុន (Guo Jiakun) ថ្លែងថាដំណើរការកាត់ក្ដីនេះ (លោកជីមីឡៃ) ជាកិច្ចការផ្ទៃក្នុងរបស់ហុងកុងសុទ្ធសាធ។ យើងសូមជំរុញឱ្យបណ្ដាប្រទេសនានាគោរពអធិបតេយ្យភាពជាតិរបស់ប្រទេសចិន, ប្រព័ន្ធនីតិរដ្ឋនៅទីក្រុងហុងកុង និងជៀសវាងការចេញសេចក្ដីថ្លែងការណ៍ដែលនិយាយឱ្យតែរួចពីមាត់គ្មានការទទួលខុសត្រូវចំពោះការអនុវត្តប្រព័ន្ធយុត្តាធិការរបស់ទីក្រុងហុងកុង ឬរបស់ប្រទេសចិនទោះនៅក្នុងទម្រង់ណាក្ដី។
នៅក្នុងសេចក្ដីសង្ខេបព័ត៌មានកាលពីល្ងាចមិញនោះ អ្នកនាំពាក្យចិនមិនបានបញ្ចេញឈ្មោះប្រទេសណាថាជាអ្នកជ្រៀតជ្រែកកិច្ចការផ្ទៃក្នុងរបស់ខ្លួនទេ។ សូមរំលឹកថាកាលពីព្រឹកមិញ តុលាការទីក្រុងហុងកុងរកឃើញថាសកម្មជនគាំទ្រលទ្ធិប្រជាធិបតេយ្យ លោកជីមីឡៃ មានទោសពីបទរួមគំនិតក្បត់ជាមួយកម្លាំងបរទេសដោយយោងទៅតាមបទបញ្ញត្តិនៃច្បាប់ស្ដីពីសន្តិសុខជាតិ។
ទោសនេះធ្ងន់ធ្ងរណាស់ លោកជីមីឡៃអាចនឹងជាប់ពន្ធនាគារមួយជីវិត។ ប្រទេសចិនក៏បានសម្ដែងការខកចិត្តយ៉ាងខ្លាំងផងដែរដែលប្រទេសខ្លះរិះគន់សេចក្ដីសម្រេចរបស់តុលាការដែលរកឃើញថាលោកជីមីឡៃមានទោស។ ប្រទេសចិនសូមប្រឆាំងនឹងការលាបពណ៌ និងការបង្កាច់បង្ខូចទៅលើប្រព័ន្ធយុត្តិធម៌នៅទីក្រុងហុងកុង។ នេះបើតាមការផ្សាយរបស់រ៉យទ័រ និងប្រភពដទៃទៀត៕
ចែករំលែកព័តមាននេះ