ទីក្រុងបាងកក៖ ប្រទេសថៃត្រៀមរៀបចំការបោះឆ្នោតជ្រើសតាំងអ្នកតំណាងរាស្ត្រឡើងវិញនៅថ្ងៃទី៨ ខែកុម្ភៈ ឆ្នាំ២០២៦ខាងមុខនេះ។ នេះបើយោងតាមការបញ្ជាក់របស់គណៈកម្មការរៀបចំការបោះឆ្នោតនៅក្នុងសេចក្ដីប្រកាសរបស់ខ្លួន។ បើដូច្នេះមែន វាជាគម្រោងរៀបចំការបោះឆ្នោតដែលឆាប់រហ័សជាងការរំពឹងទុកព្រោះនាយករដ្ឋមន្ត្រីថៃ លោកអនុទីន នៅសុខៗស្រាប់តែស្នើសុំរំលាយសភាតែម្ដង។
ប្រភពខ្លះបង្ហើបឱ្យដឹងថាការសម្រេចចិត្តរំលាយសភាព្រោះអនុទីនមើលក្រឡាទៅហាក់ដូចជាមិនអាចអង្គុយកៅអីនាយករដ្ឋមន្ត្រីបានតទៅទៀតទេបន្ទាប់ពីគណបក្សប្រជាជនបានដើរចេញពីសម្ព័ន្ធភាពនយោបាយ។ សូមរំលឹកថយក្រោយបន្តិចថាលោកអនុទីនសព្វថ្ងៃនេះជារដ្ឋាភិបាលសំឡេងភាគតិចតែប៉ុណ្ណោះ។ គាត់អាចឡើងកាន់អំណាចបានដោយទទួលបានសំឡេងគ្រប់គ្រាន់ពីសភាក៏ដោយសារការបោះឆ្នោតគាំទ្រពីអ្នកតំណាងរាស្ត្ររបស់គណបក្សប្រជាជន។
ប្រជារាស្ត្រថៃនឹងបោះឆ្នោតជ្រើសរើសអ្នកតំណាងរាស្ត្រចំនួន៥រយនាក់ដើម្បីធ្វើជាតំណាងរបស់ខ្លួន។ ក្នុងនោះ ៤រយនាក់បោះឆ្នោតជ្រើសរើសនៅតាមមណ្ឌលដែលខ្លួនឈរឈ្មោះ។ ចំណែក១រយនាក់ទៀតបានមកពីការបែងចែកកូតាទៅតាមចំនួនអាសនៈដែលគណបក្សនីមួយៗទទួលបាន។ បក្សណាបានសន្លឹកឆ្នោតច្រើនជាងគេនឹងទទួលបានអ្នកតំណាងរាស្ត្រនៅក្នុងចំណោម១រយរូបនោះច្រើនជាងគេ។
យោងតាមច្បាប់ស្ដីពីការបោះឆ្នោតនៅប្រទេសថៃ គណបក្សនយោបាយនីមួយៗមានសិទ្ធិស្នើបេក្ខភាពរបស់ខ្លួនរហូតដល់បីរូបទៅគណៈកម្មការរៀបចំការបោះឆ្នោត។ ចាប់តាំងពីប្រទេសថៃរៀបចំការបោះឆ្នោតឆ្នាំ២០២៣ លោកអនុទីនជានាយករដ្ឋមន្ត្រីទីបីរបស់ប្រទេសនេះ។ នៅក្នុងលក្ខខណ្ឌព្រមព្រៀងរវាងលោកអនុទីន និងគណបក្សប្រជាជនកាលពីខែកញ្ញា លោកសន្យារំលាយរដ្ឋសភានៅចុងខែមករា និងសន្យាធ្វើវិសោធនកម្មរដ្ឋធម្មនុញ្ញ។ ជាថ្នូរត្រឡប់មកវិញ អ្នកតំណាងរាស្ត្ររបស់គណបក្សប្រជាជនយល់ព្រមបោះឆ្នោតឱ្យគាត់ធ្វើជានាយករដ្ឋមន្ត្រី។
អ្នកណាឡើងធ្វើជានាយករដ្ឋមន្ត្រីថ្មីមិនទាន់ដឹងនៅឡើយទេ។ លទ្ធផលស្ទង់មតិបង្ហាញថាគណបក្សប្រជាជនកំពុងមានប្រជាប្រិយភាពខ្ពស់ជាងគេ។ ប៉ុន្តែនៅក្នុងប្រព័ន្ធនយោបាយថៃ គណបក្សណាឈ្នះឆ្នោតមិនសំខាន់ទេ សំខាន់ត្រូវរកឱ្យបានសំឡេងគាំទ្រគ្រប់ចំនួនពីអ្នកតំណាងរាស្ត្រ។ មែនទែនទៅ គណបក្សឈ្នះឆ្នោតច្រើនតែមិនសូវបានឡើងកាន់អំណាច។
ជាក់ស្ដែង កាលពីពេលបោះឆ្នោតឆ្នាំ២០១៩ គណបក្សភឿថៃទទួលបានអាសនៈច្រើនជាងគេ។ ប៉ុន្តែអ្នកធ្វើជានាយករដ្ឋមន្ត្រីគឺលោកប្រាយុទ្ធចាន់អូចាមកពីគណបក្សផាឡាំងប្រឆារ៉ាត់។ ក្រោយមកនៅក្នុងការបោះឆ្នោតឆ្នាំ២០២៣ គណបក្សឆ្ពោះទៅមុខ (ដែលត្រូវបានរំលាយហើយ ហើយអ្នកតំណាងរាស្ត្ររបស់គណបក្សនេះមកជ្រកក្រោមគណបក្សប្រជាជន) ទទួលបានអាសនៈច្រើនជាងគេ។ ប៉ុន្តែអ្នកធ្វើជានាយករដ្ឋមន្ត្រីគឺបេក្ខភាពរបស់គណបក្សភឿថៃ។ នេះបើយោងតាមការផ្សាយរបស់រ៉យទ័រ និងប្រភពដទៃទៀត៕
ចែករំលែកព័តមាននេះ