ក្រុមម្ចាស់ផ្ទះ Real Madrid បានត្រៀមខ្លួនរួចជាស្រេចក្នុងការស្វាគមន៍សត្រូវចាស់ Bayern នៅក្នុងជំនួបឆេមពានលីគវគ្គពាក់កណ្តាលផ្តាច់ព្រ័ត្រជើងទី២នារាត្រីនេះ(ម៉ោង១និង៤៥នាទីរំលងអធ្រាត្រ) ។ Real Madrid ដែលជាក្រុមជើងឯកចាស់ពានរង្វាន់នេះ…
ក្រុមម្ចាស់ផ្ទះ Real Madrid បានត្រៀមខ្លួនរួចជាស្រេចក្នុងការស្វាគមន៍សត្រូវចាស់ Bayern នៅក្នុងជំនួបឆេមពានលីគវគ្គពាក់កណ្តាលផ្តាច់ព្រ័ត្រជើងទី២នារាត្រីនេះ(ម៉ោង១និង៤៥នាទីរំលងអធ្រាត្រ) ។
Real Madrid ដែលជាក្រុមជើងឯកចាស់ពានរង្វាន់នេះ នៅតែរក្សាទម្រង់លេងដ៏ខ្លាំងក្លារបស់ខ្លួនក្នុងការប្រកួតព្រឹត្តិការណ៍ធំៗបើទោះជាមានបញ្ហាខ្លះពេលលេងនៅក្នុងលីគក្តី ។ ក្រុម Real Madrid ហាក់ស្គាល់ពីប្រព័ន្ធលេង និងចំណុចខ្សោយរបស់ Bayern កាន់តែច្បាស់បន្ទាប់ពីប៉ះគ្នាក្នុងជំនួបជើងទី១កាលពីសប្តាហ៍មុនរួចមក ។
ទន្ទឹមនឹងនេះ Ronaldo គឺជាកីឡាករដែលស្ទើរតែអាចរកគ្រាប់បាល់ជូនក្រុមគ្រប់ការប្រកួត ដែលជាហេតុធ្វើឱ្យគូសត្រូវពិបាកនឹងតាមបិទ ។ ដូច្នេះ Real Madrid នឹងមិនញញើតក្នុងការបើកទ្វារទទួល Bayern នៅទឹកដីខ្លួនឯងឡើយ ស្របពេលកូនក្រុមរបស់ខ្លួន ពុំមានកីឡាករសំខាន់រូបណាអវត្តមាននោះទេ ។
គួរបញ្ជាក់ថា Real Madrid គ្រាន់តែទប់ត្រឹមស្មើប៉ុណ្ណោះក៏ពួកគេមានឱកាសឡើងទៅវគ្គផ្តាច់ព្រ័ត្រដែរ ។ ម្យ៉ាងទៀត ក្រុមស្តេចសនឹងកាន់តែខំប្រឹងដើម្បីអាចបន្តក្តីស្រមៃលើកពានឱ្យបានបីរដូវកាលជាប់ៗគ្នា ។
ក្រុម Bayern ដែលស្ថិតក្រោមការដឹកនាំរបស់លោក Heynckes នៅតែមិនមែនជាដៃគូតទល់ជាមួយ Real Madrid ដដែលនារដូវកាលនេះ ។ ជាក់ស្ដែងការបង្ហាញខ្លួននៅឆេមពានលីគ៤ឆ្នាំចុងក្រោយចាប់តាំងពីរដូវកាល ២០១៣-២០១៤ ដល់ ២០១៥-២០១៦ ក្រុមដែលមានរហស្សនាមថាតារារះទិសខាងត្បូងមួយនេះសុទ្ធតែបានឡើងមកដល់វគ្គនេះ៣ដងជាប់គ្នា ប៉ុន្តែមិនទទួលបានជ័យជម្នះឡើងទៅវគ្គបន្តនោះទេ ខណៈរដូវកាលមុនពួកគេត្រូវហាលអាវត្រឹមវគ្គ៨ក្រុមក្រោមថ្វីជើងក្រុម Real Madrid ផងដែរ ។ ការប្រកួតជើងទី២យប់នេះ Bayern ត្រូវការឈ្នះយ៉ាងហោចណាស់២គ្រាប់ទល់នឹង០ ដើម្បីសម្រេចគោលដៅរបស់ខ្លួន ប៉ុន្តែវាមិនមែនជារឿងងាយស្រួលនោះទេ ។
ទន្ទឹមនឹងនេះ Bayern អាចនឹងលេងដោយអវត្តមានកីឡាករសំខាន់ៗជាច្រើនដូចជា៖ Jerome Boateng, Kingsley Coman, និង Arturo Vidal ខណៈ David Alaba និង Arjen Robben កំពុងស្ថិតក្នុងភាពមន្ទិលនៅឡើយ ។ ការប្រកួតជើងទី២នារាត្រីនេះត្រូវបានគេហទំព័រទស្សន៍ទាយកីឡាសន្និដ្ឋានថា ក្រុមម្ចាស់ផ្ទះមានសមត្ថភាពគាបសង្កត់គូប្រកួតរបស់ខ្លួនទាំងពីរតង់ ថែមទាំងអាចយកឈ្នះដោយលទ្ធផល ២ទល់នឹង០ទៀតផង ៕
ចែករំលែកព័តមាននេះ