តើប្រេស៊ីលជំនាន់២០០២ពិតជាបានរស់ឡើងវិញមែនទេ ? ក្រុមជម្រើសជាតិដែលមានរហស្សនាម «សាំបា» បច្ចុប្បន្នស្ថិតនៅចំណាត់ថ្នាក់លេខ២ក្នុងតារាង FIFA Ranking ធ្លាប់បាត់បង់ឱកាសឡើងទៅវគ្គផ្តាច់ព្រ័ត្រ៣រដូវកាលជាប់គ្នាចាប់តាំងពីឆ្នាំ២០០៦, ២០១០ និង២០១៤ ។
យ៉ាងណាមិញ នៅរដូវកាលថ្មីនេះ ក្រុមជម្រើសជាតិដែលមកពីទ្វីបអាមេរិកខាងត្បូងមួយនេះ បានបង្ហាញទម្រង់លេងដ៏អស្ចារ្យរបស់ខ្លួនតាមរយៈការប្រកួតវគ្គជម្រុះបឋមក្នុងតំបន់ ថែមទាំងបានកក់កៅអីឡើងមកដល់វគ្គចែកពូលមុនគេទៀតផង ។ ជាក់ស្តែង ប្រេស៊ីលជាប្រទេសចំណាស់មួយដែលបានប្រឡូកក្នុងព្រឹត្តិការណ៍លំដាប់ពិភពលោកមួយនេះតាំងពីឆ្នាំ១៩៣០មកម្ល៉េះ ។ មកទល់ពេលនេះ ប្រេស៊ីលបង្ហាញខ្លួននៅ World Cup ជាលើកទី២១ ខណៈការប្រកួតនាពេលកន្លងមកពួកគេបានឡើងដល់វគ្គពាក់កណ្តាលផ្តាច់ព្រ័ត្រចំនួន១១លើក ប៉ុន្តែមានឱកាសឆ្លងទៅវគ្គផ្តាច់ព្រ័ត្រ៧លើកប៉ុណ្ណោះ ។ ប្រេស៊ីលបានក្លាយជាក្រុមជម្រើសជាតិដែលគ្រងជាម្ចាស់ជើងឯកWorld Cupច្រើនជាងគេក្នុងប្រវត្តិសាស្ត្រ ដោយកាន់កាប់ពានចំនួន៥សម័យកាលនាឆ្នាំ១៩៥៨, ១៩៦២, ១៩៧០, ១៩៩៤ និងឆ្នាំ២០០២ ។ ក្រោមការដឹកនាំរបស់គ្រូបង្វឹកថ្មី ព្រមទាំងវត្តមានកីឡាករក្មេងៗជាច្រើនរូបដែលពោរពេញទៅដោយសមត្ថភាពខ្ពស់ ធ្វើឱ្យប្រេស៊ីលមានសន្ទុះប្រយុទ្ធកាន់តែខ្លាំងនាពេលបច្ចុប្បន្ន ។
ក្តីរំពឹង ៖ ស្រមោលឈឺចាប់ដែលនៅដិតដាមក្នុងចិត្តអស់រយៈពេល៣រដូវកាលជាប់ៗគ្នាមកទល់ពេលនេះ មិនបានធ្វើឱ្យប្រេស៊ីលបាក់កម្លាំងចិត្តនោះទេ ។ ផ្ទុយទៅវិញ គេសង្កេតឃើញថា ក្រុមជម្រើសជាតិខាងលើបាននិងកំពុងវិវត្តខ្លួនកាន់តែខ្លាំងដូចសម័យកាលវីរបុរស Ronaldo របស់ពួកគេ ។ ដ្បិតកីឡាករជើងចាស់ចូលនិវត្តន៍អស់ ក៏នៅមានគ្រាប់ពូជថ្មីៗជាច្រើននាក់ទៀតដែលកំពុងបង្ហាញភាពប៉ិនប្រសប់របស់ខ្លួនលើឆាកអន្តរជាតិតាមរយៈការលេងក្នុងក្លិបធំៗនៅអឺរ៉ុប ។ ស្ថិតក្នុងពូល E ជាមួយស្វ៊ីស កូស្តារីកា និងស៊ែប៊ី ពុំមានបញ្ហាចោទអ្វីនោះទេសម្រាប់ប្រេស៊ីល ។
គ្រូបង្វឹក ៖ ដោយមើលឃើញពីទេពកោសល្យដ៏ឆ្នើមរួមជាមួយនឹងបទពិសោធន៍ដឹកនាំជាច្រើនឆ្នាំរួចមក ប្រេស៊ីលក៏សម្រេចតែងតាំងលោក Adenor Leonardo Bacchi ដែលត្រូវបានគេហៅថាលោក «Tite» ជាគ្រូបង្វឹកក្រុមជម្រើសជាតិអំឡុងឆ្នាំ២០១៦ ។ ក្នុងវ័យ៥៦ឆ្នាំ លោក Tite មិនទាន់បានសាងស្នាដៃធំធេងជូនប្រេស៊ីលនៅឡើយទេ ប៉ុន្តែភាពជោគជ័យដ៏គួរឱ្យគត់សម្គាល់ក្រោមការដឹកនាំរបស់លោកនាពេលកន្លងមក គឺជួយឱ្យក្រុមជម្រើសជាតិមួយនេះ ឡើងមកដល់វគ្គចែកពូលយ៉ាងងាយ ។
កីឡាករ Super Star ប្រចាំក្រុម ៖ តារាវ័យក្មេងដែលកំពុងបញ្ចេញពន្លឺខ្លាំងក្នុងពិភពបាល់ទាត់នាមួយរយៈពេលចុងក្រោយ និងជាកីឡាករឈ្នះមេដាយមាសអូឡាំពិកផងនោះ Neymar នឹងបង្ហាញខ្លួនលើកទី២នៅ World Cup ជាមួយនឹងភាពជឿជាក់ខ្ពស់ថានឹងអាចដឹកដៃប្រេស៊ីលឡើងទៅវគ្គផ្តាច់ព្រ័ត្រ ។
Neymar ស៊ុតបាន៥៣គ្រាប់ឱ្យក្រុមជម្រើសជាតិក្នុងការប្រកួតចំនួន៨៣លើក ។ ប្រេស៊ីលមិនត្រឹមតែមាន Neymar ខ្លាំងតែម្នាក់ប៉ុណ្ណោះទេ នៅមានកីឡាករវ័យក្មេង និងឆ្នើមជាច្រើនរូបទៀតដូចជា Coutinho, Willian និង Gabriel Jesus ជាដើម ។
បញ្ជីឈ្មោះសមាសភាពកីឡាករសរុប(បណ្តោះអាសន្ន) ៖
-អ្នកចាំទី ៖ Alisson (Roma), Ederson (Man City), Neto (Valencia) ។
-ខ្សែការពារ ៖ ប្រធានក្រុម Dani Alves, Marquinhos និង Thiago Silva (Paris SG), Marcelo (Real Madrid), Miranda (Inter), Fagner (Corinthians), Rodrigo Caio (São Paulo), Pedro Geromel (Grêmio), Ismaily (Shakhtar) ។
-ខ្សែបម្រើ ៖ Willian (Chelsea), Paulinho និង Coutinho (Barcelona), Fernandinho (Man City), Renato Augusto (Beijing Sinobo), Casemiro (Real Madrid), Fred (Shakhtar), Talisca (Besiktas) ។
-ខ្សែប្រយុទ្ធ ៖ Douglas Costa (Juventus), Roberto Firmino (Liverpool), Gabriel Jesus (Man City), Taison (Shakhtar), Willian Jose (Sociedad) ៕
ចែករំលែកព័តមាននេះ