ទីក្រុងប៉េកាំង ៖ យោងតាមនាយកដ្ឋានរដ្ឋបាលសម្រាប់ការគ្រប់គ្រងទីផ្សារ បានឲ្យដឹងថា គិតត្រឹមខែមីនា ឆ្នាំនេះ ចិនមានអង្គភាពអាជីវកម្មចំនួន១០០,២៤លានកន្លែងនៅទូទាំងប្រទេស បូករួមទាំងសហគ្រាស និងអាជីវកម្មផ្ទាល់ខ្លួន ។ តួលេខនេះ បានធ្វើឲ្យប្រទេសមហាយក្សសេដ្ឋកិច្ចលំដាប់ទី២មួយនេះស្ថិតនៅលំដាប់លេខ១ ដែលមានអង្គភាពអាជីវកម្មច្រើនជាងគេបំផុតលើពិភពលោក ។ នេះបើយោងតាមការចេញផ្សាយពី chinadaily.com.cn ។
នាយកដ្ឋានបានបញ្ជាក់ថា ក្នុងចំណោមអង្គភាពអាជីវកម្មខាងលើ ៧០%គឺជាអាជីវកម្មផ្ទាល់ខ្លួន ។ បរិមាណអាជីវកម្មបានកើនឡើងក្នុងអំឡុង៥ឆ្នាំមុន គ្រាដែលរដ្ឋាភិបាលចាប់ផ្ដើមធ្វើកំណែទម្រង់ និងរឹតបន្ដឹងលើការចុះឈ្មោះអាជីវកម្មស្របច្បាប់ ។ អង្គភាពអាជីវកម្មបានកើនឡើង៧០%ក្នុងចន្លោះពីឆ្នាំ២០១២-២០១៧ ក្នុងនោះអង្គភាពថ្មីៗប្រមាណ៥ម៉ឺនកន្លែងបានចុះបញ្ជីក្នុង១ឆ្នាំៗ ។
លោក He Xin ប្រធាននាយកដ្ឋានត្រួតពិនិត្យទីផ្សារ បាននិយាយថា កំណើននេះគឺជាលទ្ធផលនៃកិច្ចខិតខំប្រឹងប្រែងធ្វើកំណែទម្រង់របស់រដ្ឋាភិបាល ។
លោកថា ៖« ប្រទេសចិនបានបន្ធូរបន្ថយទីផ្សារយ៉ាងទូលំទូលាយ ដែលអនុញ្ញាតឲ្យប្រជាជនបង្កើតអាជីវកម្មផ្ទាល់ខ្លួនរបស់ពួកគេ ជាមួយនឹងផលិតផលប្រហែល៨៧%ត្រូវបានអនុម័ត » ។
ក្នុងអំឡុងពេល៥ឆ្នាំមុន ឧស្សាហកម្មបច្ចេកវិទ្យា គឺជាសក្ខីភាពនៃកំណើនដ៏ឆាប់រហ័ស ហើយក្រុមហ៊ុនផ្ដល់សេវាថ្មីៗជាច្រើនត្រូវបានចុះក្នុងបញ្ជី ។ ក្នុងនោះ អាជីវកម្មឯកជនបានក្លាយជាទីផ្សារធំជាងគេ ដែលបានបង្កើតការងារថ្មីៗដល់តំបន់ជាយក្រុងប្រមាណ៤០% ។
យោងតាមទិន្នន័យធនាគារពិភពលោក បានបង្ហាញថា ប្រទេសចិនផ្ដល់ភាពងាយស្រួលច្រើនក្នុងបរិយាកាសធ្វើអាជីវកម្ម ក្នុងនោះ១៨ចំណុចបង្ហាញពីភាពងាយស្រួលក្នុងការធ្វើអាជីវកម្មរយៈពេល៥ឆ្នាំកន្លងមកនេះ និង៦៥ចំណុចបង្ហាញពីភាពងាយស្រួលក្នុងការបង្កើតអាជីវកម្ម ៕
ចែករំលែកព័តមាននេះ