ប្រទេសចិន ៖ រដ្ឋបាលគយទូទៅរបស់ប្រទេសចិន (GACC) បានប្រកាសលើគេហទំព័រផ្លូវការរបស់ខ្លួនថា ផ្លែទុរេនស្រស់ពីប្រទេសឡាវ នឹងត្រូវបានអនុញ្ញាតឱ្យនាំចូលមកកាន់ប្រទេសចិន ប្រសិនបើបំពេញតាមតម្រូវការអនាម័យ។ នេះបើតាមប្រភពពីសារព័ត៌មានវៀតណាម Znews…
ប្រទេសចិន ៖ រដ្ឋបាលគយទូទៅរបស់ប្រទេសចិន (GACC) បានប្រកាសលើគេហទំព័រផ្លូវការរបស់ខ្លួនថា ផ្លែទុរេនស្រស់ពីប្រទេសឡាវ នឹងត្រូវបានអនុញ្ញាតឱ្យនាំចូលមកកាន់ប្រទេសចិន ប្រសិនបើបំពេញតាមតម្រូវការអនាម័យ។ នេះបើតាមប្រភពពីសារព័ត៌មានវៀតណាម Znews បានចេញផ្សាយនៅថ្ងៃទី១៦ ខែធ្នូ ឆ្នាំ២០២៥។
តាមរយៈការប្រកាសចិត្តនេះ ប្រទេសឡាវក្លាយជាប្រទេសទី ៦ ដែលត្រូវបានអនុញ្ញាតឱ្យនាំចេញផ្លែទុរេនស្រស់មកកាន់ប្រទេសចិន បន្ទាប់ពីប្រទេសថៃ វៀតណាម ហ្វីលីពីន ម៉ាឡេស៊ី និងកម្ពុជា។
បច្ចុប្បន្ន ប្រទេសឡាវមានចម្ការទុរេនជាង ២ ម៉ឺនហិកតា ភាគច្រើនជាពូជម៉ាន់ថង។ ចាប់តាំងពីឆ្នាំ ២០២១ បណ្តាវិនិយោគិនមកពីចិន វៀតណាម និងម៉ាឡេស៊ី បានជំរុញការដាំដុះទុរេនក្នុងប្រទេសឡាវយ៉ាងខ្លាំង ដោយតំបន់ដាំដុះឥឡូវនេះបានរីកសាយភាយពាសពេញតំបន់ភាគខាងជើង កណ្តាល និងភាគខាងត្បូង។ ម្យ៉ាងវិញទៀត ឡាវមានព្រំដែនជាមួយប្រទេសចិន និងត្រូវបានតភ្ជាប់ដោយផ្លូវដែក «ចិន-ឡាវ» ដែលនេះនឹងផ្តល់អត្ថប្រយោជន៍យ៉ាងសំខាន់ សម្រាប់ការដឹកជញ្ជូន។ ថ្លៃដើមផលិតកម្ម និងការដឹកជញ្ជូនក្នុងប្រទេសឡាវ ក៏ទាបជាងនៅប្រទេសថៃផងដែរ។
លើសពីនេះ បណ្តាវិនិយោគិនចិនត្រូវបានរំពឹងថានឹងលើកកម្ពស់ស្តង់ដារកសិកម្មនៅក្នុងប្រទេសឡាវ តាមរយៈការអនុម័តវិធីសាស្ត្រគ្រប់គ្រងថ្មី។ ដូចនេះ ប្រសិនបើប្រទេសឡាវបង្កើនផលិតភាព និងគុណភាពផ្លែទុរេនរបស់ខ្លួន នោះពួកគេអាចប្រកួតប្រជែងដោយផ្ទាល់ជាមួយនឹងទុរេនថៃ ព្រមទាំងអាចដាក់សម្ពាធបន្ថែមទៀតលើតម្លៃទីផ្សារ។
បច្ចុប្បន្ន បណ្តាចម្ការដែលមានគម្រោងនាំចេញផ្លែទុរេនស្រស់ទៅកាន់ប្រទេសចិន ត្រូវតែបង្កើតប្រព័ន្ធគ្រប់គ្រងគុណភាព និងការតាមដានយ៉ាងម៉ត់ចត់ ប្រកាន់ខ្ជាប់នូវការអនុវត្តកសិកម្មល្អ និងវិធានការគ្រប់គ្រងសត្វល្អិតរួមបញ្ចូលគ្នា ក៏ដូចជារក្សាអនាម័យចម្ការដាំដុះដោយធានាថា គ្មានប្រភពចម្លងរោគ ការបេះផ្លៃរលួយ ឬជ្រុះចេញជាបន្ទាន់ និងការបោះចោលផលិតផលខូចគុណភាព។
ស្របពេលដំណើរការវេចខ្ចប់ផ្លែទុរេននាំចេញទៅកាន់ប្រទេសចិន ឆ្លងកាត់ដំណាក់កាលដូចជា ការសម្អាត ការតម្រៀប ការចាត់ថ្នាក់ និងការដកផ្លែខូចចេញ ដើម្បីធានាថា ការដឹកជញ្ជូនមិនមានសត្វល្អិត សត្វពីងពាង ផ្លែឈើរលួយ មែកឈើ ស្លឹកឈើ ឫស ឬដី។ បើចាំបាច់ ការគ្រប់គ្រងសត្វល្អិតអាចត្រូវបានអនុវត្តនៅកន្លែងវេចខ្ចប់ថែមទៀត។ លើសពីនេះ ដំណើរការវេចខ្ចប់ទាំងមូលត្រូវតែអនុវត្តតាមបទប្បញ្ញត្តិសុវត្ថិភាពចំណីអាហាររបស់ចិន ច្បាប់ជាតិពាក់ព័ន្ធ បទប្បញ្ញត្តិ និងស្តង់ដារនានា ហើយការបន្ថែមសារធាតុមិនត្រូវបានអនុញ្ញាតត្រូវបានហាមឃាត់យ៉ាងតឹងរ៉ឹងជាទីបំផុត៕
ចែករំលែកព័តមាននេះ