ខេត្តកំពង់ធំ ៖ បុរសម្នាក់ត្រូវបានគេប្រទះឃើញដួលស្លាប់នៅក្នុងដីឡូត៍មួយកន្លែង បានបង្កឲ្យមានការភ្ញាក់ផ្អើលមួយ កាលពីវេលាម៉ោង១៤និង៣៥នាទីរសៀល ថ្ងៃទី១៩ ខែមេសា ឆ្នាំ២០១៨ ស្ថិតនៅភូមិបល្ល័ង្កលិច សង្កាត់ដំរីជាន់ខ្លា ក្រុងស្ទឹងសែន ខេត្តកំពង់ធំ ។
សមត្ថកិច្ចនគរបាលបានឲ្យដឹងថា ជនរងគ្រោះឈ្មោះ ឌុច វណ្ណា ភេទប្រុស អាយុ៣១ឆ្នាំ ជនជាតិខ្មែរ រស់នៅភូមិកំពង់រទេះ សង្កាត់កំពង់រទះ ក្រុងស្ទឹងសែន បានដួលដេកស្លាប់នៅចំណុចដីឡូត៍ចាក់ថ្មីមួយកន្លែងខាងលើ ។
បើយោងតាមការពិនិត្យសពដោយមានការចូលរួមពីបុគ្គលិកមន្ទីរពេទ្យបង្អែកខេត្ត ផ្នែកជំនាញនគរបាលក្រុង និងប៉ុស្តិ៍នគរបាលរដ្ឋបាលដំរីជាន់ខ្លា ឃើញថា សពមានស្លាកស្នាមរបួសបាតជើងខាងស្តាំ ទំនងជាពងជើង ហើយរយះស្បែកបាតជើង និងចំស្មងជើង ជង្គង់ទាំងពីរមានស្នាមរបួសរលាត់ស្បែកតូចៗជាច្រើនកន្លែង ជាស្លាកស្នាមមុត និងគំនរគ្រួសថ្មនៅពេលដែលជនរងគ្រោះបានដួល ក្រៅពីនោះមិនមានឃើញស្លាកស្នាមអ្វីគួរឲ្យកត់សម្គាល់ពីការធ្វើឃាតនោះទេ ។
បើតាមការសន្និដ្ឋានរបស់គ្រូពេទ្យ និងជំនាញថា ៖ ការស្លាប់នៃជននេះ បណ្តាលមកពីជនរងគ្រោះហេវហត់អស់កម្លាំងដោយសារអត់អាហារក៏កើតជាខ្យល់គ ឬក៏គាំងបេះដូងស្លាប់តែម្តង ។
បន្ទាប់ពីពិនិត្យរួច សពត្រូវបានប្រគល់ឲ្យបងប្រុសរបស់ជនរងគ្រោះឈ្មោះ ឌុច វណ្ណៈ ភេទប្រុស អាយុ៣៣ឆ្នាំ នៅភូមិសង្កាត់ជាមួយគ្នាយកទៅធ្វើបុណ្យតាមប្រពៃណី ៕
ចែករំលែកព័តមាននេះ