រាជធានីភ្នំពេញ ៖ បុរសម្នាក់ត្រូវសមត្ថកិច្ចប៉ុស្តិ៍រដ្ឋបាលនគរបាលចាក់អង្រែក្រោម ធ្វើការឃាត់ខ្លួន ដោយប្រើខ្សែចាប់ចងនឹងដើមឈើ ក្រោយបុរសរូបនោះហាក់មានសតិមិនគ្រប់ ព្យាយាមប្រើគ្រប់មធ្យោបាយដើម្បីសម្លាប់ខ្លួន ដោយចង.ក និងលោតសម្លាប់ខ្លួនពីទីខ្ពស់ជាដើម ។ ហេតុការណ៍នេះ កើតឡើងកាលពីវេលាម៉ោង១១និង៣០នាទីព្រឹក ថ្ងៃទី១៩ ខែមេសា ឆ្នាំ២០១៨ ស្ថិតនៅចំណុចម្តុំវត្តចាក់អង្រែក្រោម ក្នុងភូមិទួលរកា សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ ។
បុរសខាងលើមានឈ្មោះ នឿន ចិន អាយុ៣៥ឆ្នាំ មុខរបរជាកម្មករសំណង់ មានស្រុកកំណើតនៅភូមិស្រែបា ឃុំស្រែបា ស្រុកព្រៃវែង ខេត្តព្រៃវែង ។ ប្រពន្ធបុរសខាងលើមានឈ្មោះ ឌឿន ឌីណា អាយុ៣៧ឆ្នាំ បានឲ្យដឹងថា បុរសជាប្តីពុំដែលមានសតិហាក់ប្លែកៗពីមុនឡើយ ពិសេសគិតចង់ធ្វើអត្តឃាតសម្លាប់ខ្លួនឯងជាដើម ប៉ុន្តែដោយសារមួយរយៈក្រោយនេះ ស្ត្រីជាប្រពន្ធហាក់មានអារម្មណ៍ថា ប្តីខុសគ្រូបាធ្យាយ ទើបទៅជាបែបនេះ ទាំងសភាពពីមុនមកមិនធ្លាប់កើតអ្វីសោះ ។
នាយប៉ុស្តិ៍នគរបាលចាក់អង្រែក្រោម លោកអនុសេនីយ៍ទោ វុឌ្ឍ ផូសារ៉ាវ័ន្ត ឲ្យដឹងថា ក្រោយការសាកសួរនាំពីស្ត្រីជាប្រពន្ធរួចមក ឲ្យដឹងថា បុរសជាប្តីចាប់ផ្តើមខូចចិត្តខ្លាំងរហូតគ្រប់គ្រងសតិខ្លួនលែងបាន ក្រោយកូនប្រុសអាយុ៣ខែបានស្លាប់ ជាហេតុធ្វើឲ្យរូបគាត់ពិបាកចិត្តខ្លាំងព្យាយាមហូបស្រារាល់ថ្ងៃ តាំងពីថ្ងៃកូនស្លាប់រហូតសតិដំណើរការហាក់មិនប្រក្រតី និងឈានដល់ការធ្វើអ្វីមួយដើម្បីប៉ុនប៉ងធ្វើអត្តឃាតខ្លួនឯងតែម្តងទៅ ។
សូមបញ្ជាក់ថា តាមប្រភពព័ត៌មានឲ្យដឹងថា នៅវេលាម៉ោង១១ព្រឹក ថ្ងៃទី១៩ ខែមេសា ឆ្នាំ២០១៨ បុរសខាងលើបានប៉ុនប៉ងទៅចង.កសម្លាប់ខ្លួននៅដើមពោធិ៍មួយកន្លែងក្នុងវត្តចាក់អង្រែក្រោម អំឡុងពេលនោះ មានព្រះសង្ឃឃើញក៏ស្រែកឆោឡោរផ្អើលរហូតឃាត់បុរសនោះទាន់ពេល ។ បន្ទាប់ពីឃាត់ការប៉ុនប៉ងសម្លាប់ខ្លួនរួច បុរសរូបនោះបានព្យាយាមឡើងទៅលើចេតិយខ្ពស់ដើម្បីលោតសម្លាប់ខ្លួន តែពេលនោះកម្លាំងនគរបាលប៉ុស្តិ៍ចាក់អង្រែក្រោមបានចុះទៅដល់ នឹងបានឃាត់បុរសរូបនោះមកកាន់ប៉ុស្តិ៍រដ្ឋបាលនគរបាលភ្លាមៗ ។ ពេលបញ្ចូនដល់ប៉ុស្តិ៍មូលដ្ឋាន បុរសរូបនោះហាក់មានភាពរវើររវាយច្រើន ដូច្នេះសមត្ថកិច្ចសម្រេចយកខ្សែចងដៃជើងភ្ជាប់នឹងដើឈើតែម្តង ដើម្បីកុំឲ្យរូបគេរើបម្រាស់រួច ។ នាយប៉ុស្តិ៍ចាក់អង្រែក្រោម បន្តថា នៅវេលាល្ងាចថ្ងៃទី១៩ ខែឆ្នាំដដែល បងប្អូនបុរសខាងលើបានមកទទួលយករូបគេដោយដឹកតាមរ៉ឺម៉កម៉ូតូដឹកយកទៅស្រុកកំណើតនៅខេត្តព្រែវែងវិញផងដែរ ៕
https://www.youtube.com/watch?v=YnMS5Kw3sj0
ចែករំលែកព័តមាននេះ