រាជធានីភ្នំពេញ ៖ ក្នុងត្រីមាសទី១ដើមឆ្នាំនេះ ភ្ញៀវទេសចរបរទេសដែលបានចូលទស្សនារមណីយដ្ឋានអង្គរមានចំនួនជិត៨៦ម៉ឺននាក់ នាំចំណូលដល់គ្រឹះស្ថានអង្គរជាង៣៩,៦លានដុល្លារ កើនឡើងជាង២៨% ។ នេះបើយោងតាមរបាយការណ៍របស់គ្រឹះស្ថានអង្គរ ។ របាយការណ៍បង្ហាញថា…
រាជធានីភ្នំពេញ ៖ ក្នុងត្រីមាសទី១ដើមឆ្នាំនេះ ភ្ញៀវទេសចរបរទេសដែលបានចូលទស្សនារមណីយដ្ឋានអង្គរមានចំនួនជិត៨៦ម៉ឺននាក់ នាំចំណូលដល់គ្រឹះស្ថានអង្គរជាង៣៩,៦លានដុល្លារ កើនឡើងជាង២៨% ។ នេះបើយោងតាមរបាយការណ៍របស់គ្រឹះស្ថានអង្គរ ។
របាយការណ៍បង្ហាញថា រយៈពេល៣ខែចាប់ពីខែមករា ដល់ខែមីនា ឆ្នាំនេះ ភ្ញៀវទេសចរបរទេសដែលបានទិញប័ណ្ណចូលទស្សនារមណីយដ្ឋានប្រវត្តិសាស្ត្រមួយនេះ មានចំនួន៨៥៨.៥៨០នាក់ កើនឡើង១២,៣៦% បើធៀបរយៈពេលដូចគ្នាកាលពីឆ្នាំ២០១៧ មានចំនួន៧៦៤.១៤៦នាក់ ។ ក្នុងនោះ គ្រឹះស្ថានអង្គររកចំណូលសរុបបានចំនួន៣៩.៦៥៦.៨១០ដុល្លារ កើនឡើង២៨,៥២% បើធៀបរយៈពេលដូចគ្នាកាលពីឆ្នាំ២០១៧ មានចំនួន៣០.៨៥៥.៨៥៥ដុល្លារ ។
ទោះយ៉ាងនេះក្ដី បើគិតតាមខែនីមួយៗវិញឃើញថា ខែមីនាមានការថមថយបន្ដិច ទាំងចំនួនភ្ញៀវ និងចំណូល បើធៀបនឹងខែមករា និងកុម្ភៈ ។
របាយការណ៍បញ្ជាក់ថា ក្នុងខែមករា គ្រឹះស្ថានអង្គរលក់ប័ណ្ណដល់ភ្ញៀវបរទេសមានចំនួនជាង២៩,៤ម៉ឺននាក់ ទទួលបានចំណូលសរុបជាង១៣លានដុល្លារ និងខែកុម្ភៈ លក់បានជាង២៩,៥ម៉ឺននាក់ ទទួលបានចំណូលជាង១៤លានដុល្លារ ខណៈខែមីនា លក់បានជាង២៦,៨ម៉ឺននាក់ ទទួលបានចំណូលត្រឹមតែជាង១២លានដុល្លារប៉ុណ្ណោះ ។ ក្នុងនោះ ភ្ញៀវចិនឈរលំដាប់លេខ១ មានចំនួនជាង១០ម៉ឺននាក់ តាមពីក្រោយដោយកូរ៉េខាងត្បូងមានចំនួនជាង២,២ម៉ឺននាក់ និងភ្ញៀវអាមេរិកស្ថិតក្នុងលំដាប់លេខ៣ មានជាង១,៧ម៉ឺននាក់ ខណៈអង់គ្លេស និងជប៉ុន តាមប្រកៀកប្រកិតគ្នា មានចំនួនជាង១,៥ម៉ឺននាក់ដូចគ្នា ឈរនៅលេខរៀងបន្ដបន្ទាប់ ។
កំណើននៃភ្ញៀវទេសចរបរទេសចូលមកទស្សនាទឹកដីប្រវត្តិសាស្ត្រមួយនេះ បានបង្ហាញពីទំនុកចិត្តរបស់ពួកគេមកលើស្ថានភាព និងស្ថិរភាពក្នុងប្រទេស ក៏ដូចជាសបញ្ជាក់ពីភាពល្បីល្បាញនៃសម្បត្តិបេតិកភណ្ឌមនុស្សជាតិរបស់កម្ពុជានៅលើឆាកអន្តរជាតិ ស្របពេលដែលរាជរដ្ឋាភិបាលបានកំណត់យកទេសចរណ៍ ជាវិស័យអាទិភាពមួយសម្រាប់ទ្រទ្រង់កំណើនសេដ្ឋកិច្ចជាតិ ក៏ដូចជាការអភិវឌ្ឍសង្គម ខណៈវិស័យមួយនេះបានផ្ដល់ចំណូលរាប់ពាន់លានដុល្លារ និងបង្កើតការងាររាប់សិបម៉ឺននាក់ដល់កូនខ្មែរក្នុង១ឆ្នាំៗ ។
តាមរបាយការណ៍ក្របខ័ណ្ឌគោលនយោបាយម៉ាក្រូសេដ្ឋកិច្ច វិស័យទេសចរណ៍ត្រូវបានរំពឹងថា នឹងបន្តងើបឡើងក្នុងអត្រាកំណើន៤,៥%ក្នុងឆ្នាំ២០១៨ និង៤,៧%ក្នុងឆ្នាំ២០១៩ ដោយសារកំណើនខ្ពស់នៃចំនួនភ្ញៀវទេសចរអន្តរជាតិ ជាពិសេសទេសចរពីតំបន់អាស៊ី គួបផ្សំនឹងការខិតខំប្រឹងប្រែងរបស់រាជរដ្ឋាភិបាលក្នុងការផ្សព្វផ្សាយ, ការលើកទឹកចិត្តឲ្យមានការបើកជើងហោះហើរត្រង់ និងការដាក់ចេញនូវគោលនយោបាយនានា ក្នុងគោលបំណងទាក់ទាញភ្ញៀវទេសចរបន្ថែម ។ ជាមួយគ្នានេះ ការធ្វើពិពិធកម្មផលិតផល និងគោលដៅទេសចរណ៍ ព្រមទាំងការទាក់ទាញភ្ញៀវឲ្យចំណាយខ្ពស់ នៅតែជាប្រការចាំបាច់ និងបន្ទាន់ សំដៅធានាចីរភាពកំណើននៃវិស័យនេះ ដើម្បីបន្តតួនាទីជាជន្ទល់ដ៏សំខាន់មួយ សម្រាប់ទ្រទ្រង់សេដ្ឋកិច្ចជាតិ។
ទន្ទឹមនឹងនេះ រាជរដ្ឋាភិបាលបានជំរុញដល់សហគ្រាសធុនតូច និងមធ្យម ត្រូវចូលរួមកែច្នៃ និងផលិតវត្ថុអនុស្សាវរីយ៍ឲ្យកាន់តែសម្បូរបែប ដើម្បីលក់ជូនភ្ញៀវទេសចរ ប្រសើរជាងនាំចូលពីបរទេស លក់ជូនភ្ញៀវបរទេស ។
លោក វង្សី វិស្សុត រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ បានលើកឡើងក្នុងវេទិកាសាធារណៈកាលពីពេលកន្លងមកថា កម្ពុជាមានសក្ដានុពលយ៉ាងច្រើនលើវិស័យទេសចរណ៍ ។ ដូច្នេះ ដើម្បីឆ្ពោះទៅរកទេសចរណ៍ដែលមានតម្លៃខ្ពស់ កម្ពុជាត្រូវបង្កើតតម្លៃបន្ថែមតាមរយៈម្ហូបអាហារ, សណ្ឋាគារ និងការវិនិយោគលើយន្ដហោះខ្លួនឯងជាដើម ។ ជាមួយគ្នានេះ សហគ្រាសធុនតូច និងមធ្យម គួរបង្កើត និងផលិតវត្ថុអនុស្សាវរីយ៍ខ្លួនឯង និងមិនគួរនាំចូលពីបរទេសនោះទេ ។
លោកសង្កត់ធ្ងន់ថា ៖« វត្ថុអនុស្សាវរីយ៍នេះ យើងគួរតែធ្វើខ្លួនឯង គេ[ទេសចរ]មកស្រុកខ្មែរ បែរជាទិញរបស់ចិន វៀតណាម ថៃ ទៅវិញ វាមិនគួរសោះ ។ ដូច្នេះរដ្ឋត្រូវដោះស្រាយរឿងនេះ » ។
កាលពីឆ្នាំ២០១៧ កម្ពុជាទទួលបានទេសចរអន្តរជាតិប្រមាណ៥,៦លាននាក់ កើនឡើង១១,៨% បើធៀបនឹងឆ្នាំ២០១៦ ផ្ដល់ចំណូលដល់កម្ពុជាប្រមាណ៣,៧ពាន់លានដុល្លារអាមេរិក កើនឡើង១៣,៣% ដែលបានរួមចំណែកប្រមាណ១២,៣% នៃផលិតផលក្នុងស្រុកសរុបរបស់កម្ពុជា និងតំណាងឲ្យប្រមាណ៣០% នៃវិស័យសេវាកម្មនៅកម្ពុជា ៕
ចែករំលែកព័តមាននេះ