តាមប្រភពព័ត៌មាន Daily Mail បានឲ្យដឹងថា Ronaldo មានវិធីពិសេសសម្រាប់ធ្វើឲ្យរាងកាយរបស់ខ្លួននៅតែមានសាច់ដុំកង់ៗ មិនចេះយារធ្លាក់។
យើងបានឃើញស្រាប់ហើយនៅក្រោយពេល Ronaldo ស៊ុតប៉េណាល់ទីចូលក្នុងសំណាញ់ កាលពីថ្ងៃប្រកួតជាមួយនឹង Juventus នៅវគ្គពាក់កណ្តាលផ្តាច់ព្រ័ត្រ។ សាច់ដុំរបស់កីឡាករអាយុ៣៣ឆ្នាំរូបនេះ នៅតែមានភាពលេចធ្លោជានិច្ច។
រូបមន្តនៅពីក្រោយរាងដ៏សង្ហារបស់ Ronaldo គឺ គេចូលចិត្តហែលទឹក។ រាល់ការប្រកួតនីមួយៗបានបញ្ចប់ Ronaldo តែងទៅហែលទឹកនៅផ្ទះជាមួយនឹងកូនប្រុសរបស់ខ្លួន។ ក្រោយពីហែលរួចហើយ Ronaldo ចូលទៅត្រាំទឹកក្តៅ-ទឹកត្រជាក់ ដើម្បីភ្ញោចឲ្យកោសិកាសាច់ដុំលូតលាស់ល្អ។ មិនត្រឹមតែប៉ុណ្ណោះ គេក៏មានការម៉ាស្សាសាច់ដុំដោយប្រើកម្លាំងទឹកថែមទៀតផង ដើម្បីជួយសម្រាលសាច់ដុំពីការចុករោយ។
ក្រៅពីការធ្វើឲ្យសាច់ដុំឡើងធំដោយសារទឹក Ronaldo ក៏មានម៉ាស៊ីនហាត់សាច់ដុំនៅផ្ទះទៀតផង។ គេចូលចិត្តការហាត់ប្រាណណាស់ ព្រោះថា គេហាត់ទាំងនៅលើតារាង ទាំងនៅក្នុងផ្ទះ។ និយាយពីរបបអាហារវិញ កីឡាកររាងឡូយរូបនេះ ទទួលទាន់អាហារណាដែលមានស្ករនិងខ្លាញ់តិច ចំពោះស្រា គឺ Ronaldo មិនទទួលទានឡើយ៕
ចែករំលែកព័តមាននេះ