រាជធានីភ្នំពេញ ៖ មជ្ឈមណ្ឌលហ្វឹកហ្វឺនអាកាសចរស៊ីវិលកម្ពុជា គឺជាមជ្ឈមណ្ឌលដំបូងគេបង្អស់នៅក្នុងព្រះរាជាណាចក្រកម្ពុជា ដែលត្រូវបានសម្ពោធដាក់ឲ្យដំណើរការជាផ្លូវការ កាលពីខែមីនា ឆ្នាំ២០១៧ ក្រោមការផ្តល់ជំនួយរបស់ទីភ្នាក់ងារសហប្រតិបត្តិការអន្តរជាតិកូរ៉េ (កយកា) ។ មជ្ឈមណ្ឌលនេះបានចាប់ផ្តើមប្រតិបត្តិការតាំងពីឆ្នាំ២០១៦ ដើម្បីលើកកម្ពស់ជំនាញវិជ្ជាជីវៈសម្រាប់អាកាសចរណ៍ស៊ីវិលកម្ពុជា និងបង្កើតប្រព័ន្ធគ្រប់គ្រងប្រកបដោយប្រសិទ្ធភាពសម្រាប់ធនធានមនុស្ស និងកំពុងរួមចំណែកយ៉ាងសំខាន់ក្នុងវិស័យអាកាសចរណ៍កម្ពុជា ។
ថ្លែងក្នុងពិធីបិទវគ្គបណ្តុះបណ្តាល និងពិធីបំពាក់មេដាយ នៅមជ្ឈមណ្ឌលហ្វឹកហ្វឺនអាកាសចរស៊ីវិលកម្ពុជា នៅព្រឹកថ្ងៃទី៦ មេសា កន្លងមក លោក ចុង យុនហ្គីល (Jeong Yun Gil) ប្រធានតំណាងប្រចាំប្រទេសនៃការិយាល័យកយកា ប្រចាំនៅកម្ពុជា បាននិយាយថា គម្រោងបង្កើតមជ្ឈមណ្ឌលហ្វឹកហ្វឺនអាកាសចរស៊ីវិលនៅកម្ពុជា មានសារសំខាន់ណាស់ក្នុងការជួយប្រទេសកម្ពុជា ឲ្យទទួលបាននូវចំណេះដឹងនិងបច្ចេកវិទ្យាចាំបាច់ដើម្បីកែលម្អឧស្សាហកម្មអាកាសចរណ៍របស់ខ្លួន ដោយលើកកម្ពស់វិស័យគន្លឹះដែលពាក់ព័ន្ធដូចជា ទេសចរណ៍ និងការដឹកជញ្ជូន ស្របតាមផែនការយុទ្ធសាស្ត្រអភិវឌ្ឍន៍ជាតិឆ្នាំ២០១២-២០១៨ ។
លោក ចុង យុនហ្គីល បានបន្ថែមទៀតថា ៖« កយកាសូមថ្លែងអំណរគុណយ៉ាងជ្រាលជ្រៅចំពោះលោក ម៉ៅ ហាវណ្ណាល់ និងសមាជិក សមាជិការបស់រដ្ឋលេខាធិការនៃរដ្ឋលេខាធិការដ្ឋានអាកាសចរស៊ីវិល ដែលតែងតែគាំទ្រទីភ្នាក់ងារសហប្រតិបត្តិការអន្តរជាតិកូរ៉េ (កយកា) ហើយថែមទាំងផ្តល់ឱកាសឲ្យភាគីកូរ៉េទទួលបានមេដាយពីរាជរដ្ឋាភិបាលកម្ពុជា » ។
លោក ម៉ៅ ហាវណ្ណាល់ រដ្ឋលេខាធិការនៃរដ្ឋលេខាធិការដ្ឋានអាកាសចរស៊ីវិល បានមានប្រសាសន៍ថា មជ្ឈមណ្ឌលហ្វឹកហ្វឺនអាកាសចរស៊ីវិលកម្ពុជានេះ បន្តផ្តល់ការបណ្តុះបណ្តាលនិងអប់រំផ្នែកអាកាសចរណ៍ និងបានកាត់បន្ថយចំណាយរបស់យើងសម្រាប់ការបណ្តុះបណ្តាលនៅក្រៅប្រទេស ។ លោកថ្លែងថា ៖«មជ្ឈមណ្ឌលនេះមានសារសំខាន់ណាស់ក្នុងការលើកកម្ពស់សមត្ថភាពជាតិ ដើម្បីឆ្លើយតបទៅនឹងវិស័យអាកាសចរណ៍កំពុងរីកចម្រើន ដែលត្រូវបានកើនឡើងយ៉ាងឆាប់រហ័សដោយសារតែវិស័យទេសចរណ៍ និងការពង្រីកសេដ្ឋកិច្ច ការអភិវឌ្ឍហេដ្ឋារចនាសម្ព័ន្ធ និងសកម្មភាពអន្តរកម្ម » ។
លោករដ្ឋលេខាធិការក៏បានសម្តែងការកោតសរសើរ និងថ្លែងអំណរគុណដល់កយកានិងអ្នកជំនាញការកូរ៉េខាងត្បូង និងគ្រូបង្រៀនកម្ពុជា ដែលកំពុងខិតខំប្រឹងប្រែងរៀបចំកម្មវិធីបណ្តុះបណ្តាល និងរៀបចំតែងការមុខវិជ្ជាបង្រៀនសម្រាប់វគ្គបណ្តុះបណ្តាលទាំងនេះ និងបានសម្រេចតាមផែនការដែលបានរៀបចំទុកផងដែរ ។
កម្មវិធីបណ្តុះបណ្តាលនៅក្នុងមជ្ឈមណ្ឌលហ្វឹកហ្វឺនអាកាសចរស៊ីវិលកម្ពុជា ត្រូវបានគ្របដណ្តប់នៅក្នុងវិសាលភាពនៃមុខវិជ្ជាជាច្រើន ។ នៅឆ្នាំ២០១៧ មជ្ឈមណ្ឌលនេះបានរៀបចំវគ្គសិក្សាចំនួន១៥វគ្គរួចមកហើយ ដោយមានសិក្ខាកាមចូលរួមចំនួន២៦១នាក់ ។ ដោយឡែក ឆ្នាំថ្មីនេះ នឹងមានជំនាញថ្មីៗជាច្រើនទៀតដើម្បីពង្រីកជំនាញរបស់វិស័យអាកាសចរណ៍ ដែលកំពុងរីកចម្រើនយ៉ាងឆាប់រហ័សរបស់ប្រទេសកម្ពុជា ។
មជ្ឈមណ្ឌលហ្វឹកហ្វឺនអាកាសចរស៊ីវិលកម្ពុជា ថ្មីៗនេះបានធ្វើការផ្សព្វផ្សាយវគ្គបណ្តុះបណ្តាលចំនួន២៦វគ្គ សម្រាប់ឆ្នាំ២០១៨ ។ មកដល់ត្រឹមត្រីមាសទី១ឆ្នាំ២០១៨នេះ មជ្ឈមណ្ឌលហ្វឹកហ្វឺនអាកាសចរស៊ីវិលកម្ពុជាបានរៀបចំ និងបញ្ចប់វគ្គបណ្តុះបណ្តាលចំនួន៧វគ្គរួចមកហើយ។ ថ្ងៃនេះ មជ្ឈមណ្ឌលហ្វឹកហ្វឺនអាកាសចរស៊ីវិលកម្ពុជារៀបចំពិធីបិទវគ្គបណ្តុះបណ្តាលចំនួន៣វគ្គគឺ «កិច្ចការរដ្ឋបាល និងការគ្រប់គ្រងធនធានមនុស្សនិងការអភិវឌ្ឍ ក្នុងវគ្គ បណ្តុះបណ្តាលរបស់រដ្ឋលេខាធិការដ្ឋានអាកាសចរស៊ីវិល», «វគ្គបណ្តុះបណ្តាលតម្រង់ទិសរបស់រដ្ឋលេខាធិការដ្ឋានអាកាសចរស៊ីវិល» និង «វគ្គបណ្តុះបណ្តាល ICAO ០៥១ ការត្រួតពិនិត្យចរាចរផ្លូវអាកាសជាមូលដ្ឋាន » ។
រយៈពេល៥ឆ្នាំចុងក្រោយនេះ វិស័យទេសចរណ៍បានក្លាយជាសសរស្ដមមួយយ៉ាងសំខាន់ក្នុងការគាំទ្រកំណើនសេដ្ឋកិច្ចជាតិ ។ យោងតាមរបាយការណ៍ ក្រសួងសេដ្ឋកិច្ច និងហិរញ្ញវត្ថុ ក្នុងឆ្នាំ២០១៧ ចំណូលពីទេសចរណ៍អន្តរជាតិមានទឹកប្រាក់សរុបជាង ៣.៦៣៨លានដុល្លារ ស្មើនឹងប្រមាណ១៣,៣%នៃចំណូលជាតិសរុប ។
គួរបញ្ជាក់ថា នៅក្នុងឆ្នាំ២០១៧ អ្នកដំណើរដែលឆ្លងកាត់អាកាសយានដ្ឋានអន្តរជាតិទាំង៣ មានចំនួនសរុប៨,៨លាននាក់ ក្នុងនោះអាកាសយានដ្ឋានភ្នំពេញអន្តរជាតិ និងខេត្តសៀមរាប បានទទួលស្វាគមន៍អ្នកដំណើរ៤,២លាននាក់ដូចគ្នា ខណៈអាកាសយានដ្ឋានអន្តរជាតិខេត្តព្រះសីហនុ មានកំណើនអ្នកដំណើរឆ្លងកាត់៣ដង ឬស្មើនឹង៣៣៨.០០០នាក់ ។ ជាមួយនឹងអាកាសយានដ្ឋានទាំង៣ បានបម្រើដល់ប្រទេសគោលដៅជាង៥៥នៅជុំវិញពិភពលោក ដោយបានស្វាគមន៍ជើងហោះហើរប្រមាណ៧០០ជើងក្នុង១សប្ដាហ៍ ៕
ចែករំលែកព័តមាននេះ