ខេត្តស្ទឹងត្រែង ៖ បុរសម្នាក់កំពុងរង់ចាំទទួលលុយពីបញ្ជវេលុយ ស្រាប់តែកម្លាំងនគរបាលសំរុកចូលចាប់ខ្លួន ហើយបុរសរូបនោះដឹងទាន់ ក៏រត់ប៉ផាប់ចាប់ពភីង ភ័យស្លន់ស្លោចូលពួនក្នុងលូ តែទ្រាំមិនបានជាមួយក្លិនស្អុយទឹកលូ ទើបងើបក្បាលឡើងលើត្រូវសមត្ថកិច្ចចាប់ជាប់ ។ ខណៈពេលកំពុង ប្រតិបត្តិការមានការ ភ្ញាក់ផ្អើលអស់ប្រជាពលរដ្ឋមានការដាក់សង្ស័យផ្សេងៗ គ្នាថា ជាចោលួចម៉ូតូ ខ្លះថាជា ចោប្លន់ ខ្លះថាជាជនជក់ ចែកចាយគ្រឿងញៀននាំឱ្យមានការបង្ក្រាបពីសំណាក់កម្លាំងនគរបាល ។ ហេតុការបានកើតឡើងកាលពីវេលាម៉ោង៤ និង១៥នាទី នៅចំណុចទីតាំងវេលុយ១កន្លែង ភូមិ ត្រពាំងព្រីង ហើយត្រូវសមត្ថកិច្ចចាប់បាននៅម៉ោង៤និង៣០នាទី ថ្ងៃទី០៧ ខែមេសា ឆ្នាំ២០១៨ នៅក្បែរការិយាល័យបោះឆ្នោត ចាស់ ភូមិព្រែក សង្កាត់ស្ទឹងត្រែង ក្រុងស្ទឹងត្រែង ។
លោកហោ វុទ្ធី នាយការិយាល័យព្រហ្មទណ្ឌកម្រិតស្រាលបានឱ្យដឹងថា បុរសត្រូវនគរបាលចាប់វាយខ្នោះ កាលពីល្ងាចថ្ងៃទី០៧ មេសា គឺជាជនសង្ស័យមុខសញ្ញា មេខ្លោងកាច់សោម៉ូតូដែលមានដីកាចាប់ខ្លួន ។
ជនសង្ស័យរូបនោះមានឈ្មោះ សល់ កាន់យ៉ា ភេទប្រុស អាយុជាង៣០ឆ្នាំ មានស្រុកកំណើតនៅភូមិទួលទ្រាល ឃុំស្វាយធំ ស្រុកស្វាយជ្រុំ ខេត្តស្វាយរៀង ជាមេក្លោងក្នុងសុំណុំរឿងលួចកាច់សោម៉ូតូ និងគាស់ផ្ទះ និង ជាប់ពាក់ព័ន្ធសំណុំរឿងធំៗមួយចំនួនទៀត ដែលសមត្ថកិច្ចស្វែងរកចាប់ខ្លួន ។
លោកនាយការិយាល័យដដែលបានឱ្យដឹងទៀតថា ដោយមានការតាមដានរាល់សកម្មភាពជំនាញបានស៊ើបអង្កេតដឹងថា ជនសង្ស័យបានលាក់ខ្លួន និងធ្វើសកម្មភាពដោយចល័តទៅមក ចំនួន៣ខេត្ត គឺខេត្តស្ទឹងត្រែង ខេត្តរតនគិរី និងខេត្តកំពង់ចាម លោកថា មុខសញ្ញាមេក្លោងរូបនេះធ្លាប់ជាប់ពន្ធនាគារជាច្រើនលើក ហើយ ពេលចេញមកវិញនៅតែប្រព្រឹត្តបទល្មើសដដែលមិនព្រមកែខ្លួនសោះ ពេលនេះសមត្ថកិច្ចចាប់សារជាថ្មីទៀត សុំឱ្យតុលាការកាត់ទោសជននេះឱ្យនៅគុកយូរផង ៕
ចែករំលែកព័តមាននេះ