ខេត្តកំពង់ចាម ៖ បុរសម្នាក់ឈ្មោះវិន ស៊ុនម៉ាកដាវីដ អាយុ៣៧ឆ្នាំ ជនជាតិហ៊្វីលីពីន ជាប្រធានគណនេយ្យនៅកាស៊ីណូរ៉ូយ៉ាល់ត្រពាំងផ្លុង ស្រុកពញាក្រែក បានបែកគំនិតលួចយកលុយថៅកែរបស់ខ្លួនអស់ជាង ២០.០០០ដុល្លារ ទៅលេងល្បែងនៅកាស៊ីណូ២កន្លែងផ្សេងទៀត ចាញ់អស់ម៉ដ្ឋ ហើយត្រូវថៅកែដឹងក៏ប្តឹងនគរបាលព្រហ្មទណ្ឌកំរិតស្រាលខេត្តឱ្យចាប់ខ្លួន ។ តាមលោកអនុសេនីយ៍ឯកផាន់ ប៊ុណ្ណា មន្ត្រី នគរបាលព្រហ្មទណ្ឌកំរិតស្រាលខេត្តបានឱ្យដឹងថា បុរសហ៊្វីលីពីនឈ្មោះវិន ស៊ុនម៉ាកដាវីដនេះ ត្រូវបានលោកជុំ សែនសទ្ធា ព្រះរាជអាជ្ញារងអមសាលាដំបូងខេត្តចេញដីកាបញ្ជាឱ្យចូលខ្លួនលេខ១៣៤៥ ហៅមកសួរនាំនារសៀលថ្ងៃទី៤ កញ្ញា រួចក៏សំរេចឃាត់ខ្លួនតែម្តង ។
លោកផាន់ ប៊ុណ្ណា បានរំលឹកថា កាលពីវេលាម៉ោង១២ និង២៤នាទីថ្ងៃទី២៦ សីហា ឆ្នាំ២០១០ ឈ្មោះវិន ស៊ុន ម៉ាកដាវីដ បានយកលុយដែលខ្លួនកាន់ចំនួនជាង ១ម៉ឺនដុល្លារទៅលេងនៅកាស៊ីណូ «GMG» ដែលស្ថិតនៅក្បែរកាស៊ីណូរ៉ូយ៉ាល់ច្រកត្រពាំងផ្លុងចាញ់អស់ម៉ដ្ឋ ។ លុះនៅម៉ោង៥ភ្លឺថ្ងៃទី២៧ សីហា ក៏យកបន្ថែមចំនួន១២.០០០ដុល្លារ ទៅលេងនៅកាស៊ីណូ ស្រុកស្នួល ខេត្តក្រចេះអស់ ទៀត ហើយការដែលដឹងថា ប្រធានគណនេយ្យលួចយកលុយនេះ គឺដោយសារបុគ្គលិកគណ នេយ្យបំរើការងារជាមួយដឹង ក៏បានរាយការណ៍ប្រាប់លោកសេម ចាន់រិទ្ធ ប្រធានគ្រប់គ្រងកា ស៊ីណូរ៉ូយ៉ាល់ ។
លោកអនុសេនីយ៍ឯកផាន់ ប៊ុណ្ណា បញ្ជាក់ថា ក្រោយពីថៅកែដឹងហើយក៏បានរៀបចំដាក់ពាក្យបណ្តឹងមកកាន់ការិយាល័យព្រហ្មទណ្ឌកំរិតស្រាលខេត្ត ។ ចំពោះទឹកប្រាក់ដែលបាត់សរុបចំនួន២៣.១០០ដុល្លារ ហើយបានកសាងសំណុំ រឿងបញ្ជូនមកសាលាដំបូងខេត្ត លុះនៅថ្ងៃទី៤ កញ្ញា ឆ្នាំ២០១០ ត្រូវបានលោកព្រះរាជអាជ្ញារង ចេញដីកាបញ្ជាឱ្យចូលខ្លួន និងសំរេចឃាត់ខ្លួនតែម្តង ។ ជុំវិញបណ្តឹងរបស់ថៅកែកាស៊ីណូរ៉ូយ៉ាល់ ត្រពាំងផ្លុងនេះ ប្រធានគណនេយ្យឈ្មោះវិនស៊ុនម៉ាកដាវីដ ត្រូវបានមិត្តភក្តិទូរស័ព្ទស្វះស្វែងរកលុយយកមកតំកល់នៅសាលាដំបូងខេត្តតាមរយៈមេធាវី ដើម្បីធានានៅក្រៅឃុំ តែមិនទាន់ដឹងថា ជោគវាសនាយ៉ាងណានោះទេ ៕
ចែករំលែកព័តមាននេះ