រាជធានីភ្នំពេញ ៖ លោកចៅសង្កាត់រងទី២ គណបក្សភ្លើងទៀន សង្កាត់ស្ទឹងមានជ័យទី១ ត្រូវបានកម្លាំងនគរបាល ឃាត់ខ្លួនតាមដីកា បញ្ជាឱ្យចូលខ្លួនពាក់ព័ន្ធ ប្រព្រឹត្តសកម្មភាពក្លែងបន្លំឯកសារសារធារណៈ ។…
រាជធានីភ្នំពេញ ៖ លោកចៅសង្កាត់រងទី២ គណបក្សភ្លើងទៀន សង្កាត់ស្ទឹងមានជ័យទី១ ត្រូវបានកម្លាំងនគរបាល ឃាត់ខ្លួនតាមដីកា បញ្ជាឱ្យចូលខ្លួនពាក់ព័ន្ធ ប្រព្រឹត្តសកម្មភាពក្លែងបន្លំឯកសារសារធារណៈ ។
លោកចៅសង្កាត់រងទី២ សង្កាត់ស្ទឹងមានជ័យទី១ រូបនោះ ឈ្មោះ ខឿន ឆាន ភេទប្រុស អាយុ៥៦ឆ្នាំ មុខរបរ ចៅសង្កាត់រងទី២ គណបក្សភ្លើងទៀន ។
តាមសេចក្តីប្រកាសព័ត៌មានជុំវិញការឃាត់ខ្លួនចៅសង្កាត់រងទី២ គណបក្សភ្លើងទៀន សង្កាត់ស្ទឹងមានជ័យទី១ អ្នកនាំពាក្យ នៃស្នងការដ្ឋាននគរបាលរាជធានីភ្នំពេញ សូមជម្រាបជូនសាធារណជនឱ្យបានជ្រាបថា នៅថ្ងៃទី០៣ ខែមិថុនា ឆ្នាំ២០២៥ វេលាម៉ោង៨:៣០នាទីព្រឹក សមត្ថកិច្ច នៃស្នងការដ្ឋាននគរបាលរាជធានីភ្នំពេញ បានឃាត់ខ្លួន ជនសង្ស័យ ចំនួន០១នាក់ ឈ្មោះ ខឿន ឆាន ភេទប្រុស អាយុ៥៦ឆ្នាំ មុខរបរ ចៅសង្កាត់រងទី២ សង្កាត់ស្ទឹងមានជ័យទី១ ខណ្ឌមានជ័យ ហើយនាំខ្លួនមកសាកសួរ នៅស្នងការដ្ឋាននគរបាលរាជធានីភ្នំពេញ និងអនុវត្តតាមនីតិវិធី ។
សេចក្តីប្រកាសព័ត៌មានបានអោយដឹងទៀតថា ការឃាត់ខ្លួនជនសង្ស័យខាងលើ សមត្ថកិច្ចអនុវត្តតាមដីកាបញ្ជាឱ្យចូលខ្លួនលេខ ២១៦ អ.យ.ន ចុះថ្ងៃទី២៨ ខែឧសភា ឆ្នាំ២០២៥ របស់លោក សេង ហៀង ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ ក្រោយសមត្ថកិច្ច នៃស្នងការដ្ឋាននគរបាលរាជធានីភ្នំពេញ ទទួលពាក្យបណ្តឹងពីឈ្មោះ ឡេង វ៉ាន់ឌី ហើយបានធ្វើការស្រាវជ្រាវស៊ើបអង្កេត ដោយយោងតាមចម្លើយសារភាព និងប្រមូលបានភស្តុតាង បុគ្គលនេះពិតជាបានប្រព្រឹត្តសកម្មភាពក្លែងបន្លំឯកសារសារធារណៈ ប្រាកដមែន ។
អ្នកនាំពាក្យ នៃស្នងការនគរបាលរាជធានីភ្នំពេញ ក៏បានបញ្ជាក់ថា ការឃាត់ខ្លួនជនសង្ស័យខាងលើ គឺសមត្ថកិច្ចអនុវត្តទៅតាមអង្គហេតុ និងអង្គច្បាប់នៃការប្រព្រឹត្តបទល្មើស ដែលមានចែងក្នុងក្រមព្រហ្មទណ្ឌ ដោយមិនជាប់ពាក់ព័ន្ធនឹងរឿងនយោបាយឬ ការគាបសង្កត់បំភិតបំភ័យ និងកាធ្វើទុក្ខបុកម្នេញផ្នែកនយោបាយដល់សមាជិកគណបក្សនយោបាយណាមួយឡើយ ។
អ្នកនាំពាក្យ នៃស្នងការដ្ឋាននគរបាលរាជធានីភ្នំពេញ សូមបដិសេធ និងច្រានចោលទាំងស្រុង ការចោទប្រកាន់ ទាំងបំពាន ដោយគ្មានមូលដ្ឋានច្បាស់លាស់របស់គណបក្សភ្លើងទៀន ដែលចុះផ្សាយនៅថ្ងៃទី០៤ ខែមិថុនា ឆ្នាំ២០២៥។ អាស្រ័យដូចបានជម្រាបជូនខ្លឹមសារខាងលើសូមសាធារណជនមេត្តាជ្រាបជាព័ត៌មាន ៕
ចែករំលែកព័តមាននេះ