ខេត្តកណ្តាល ៖ ជនសង្ស័យចំនួន៤នាក់ ជាមុខសញ្ញាចែកចាយគ្រឿងញៀន យ៉ាងសកម្ម នៅក្នុងស្រុកកៀនស្វាយ ត្រូវសមត្ថកិច្ចស្រាវជ្រាវបង្ក្រាបបានជាបន្តបន្ទាប់។ ការបង្ក្រាបនេះ ធ្វើឡើងកាលពីវេលាម៉ោង១០និង៣០នាទីយប់ ថ្ងៃទី២…
ខេត្តកណ្តាល ៖ ជនសង្ស័យចំនួន៤នាក់ ជាមុខសញ្ញាចែកចាយគ្រឿងញៀន យ៉ាងសកម្ម នៅក្នុងស្រុកកៀនស្វាយ ត្រូវសមត្ថកិច្ចស្រាវជ្រាវបង្ក្រាបបានជាបន្តបន្ទាប់។ ការបង្ក្រាបនេះ ធ្វើឡើងកាលពីវេលាម៉ោង១០និង៣០នាទីយប់ ថ្ងៃទី២ ខែមិថុនា ឆ្នាំ២០២៥ ចំណុចសាលាឆទាន ភូមិតារាបដូនស ឃុំគគីរ ស្រុកកៀនស្វាយ ខេត្តកណ្ដាល ។
សមត្ថកិច្ចបានឲ្យដឹងថា ជនសង្ស័យទាំង៤នាក់ រួមមាន ៖
១-ឈ្មោះ ព្រុំ ដា ភេទប្រុស អាយុ ២៧ ឆ្នាំ មុខរបរ មិនពិត មានទីលំនៅ ភូមិតារាបដូនស ឃុំគគីរ ស្រុកកៀនស្វាយ ខេត្តកណ្តាល(ប្រើប្រាស់)។
២-ឈ្មោះ ខាត់ វិសាល ភេទប្រុស អាយុ ២៥ ឆ្នាំ មុខរបរ មិនពិត មានទីលំនៅ ភូមិតារាបដូនស ឃុំគគីរ ស្រុកកៀនស្វាយ ខេត្តកណ្តាល (ប្រើប្រាស់)។
៣-ឈ្មោះ សួន យ៉ុងប៊ីន ភេទប្រុស អាយុ ១៩ឆ្នាំ មុខរបរ មិនពិត មានទីលំនៅ ភូមិតារាបដូនស ឃុំគគីរ ស្រុកកៀនស្វាយ ខេត្តកណ្តាល (ជួញដូរ)។
៤-ឈ្មោះ ហ៊ន កុសល ភេទប្រុស អាយុ ៣២ ឆ្នាំ មុខរបរ មិនពិត មានទីលំនៅ ភូមិទួលដូង ឃុំគគីរ ស្រុកកៀនស្វាយ ខេត្តកណ្តាល (ឃាត់ខ្លួន)(ជួញដូរ) ។
ក្នុងនោះ សមត្ថកិច្ចដកហូត វត្ថុតាងចាប់យករួមមាន ម្សៅក្រាមពណ៌សថ្លា សង្ស័យជាសារធាតុញៀន (ម៉ាទឹកកក) ចំនួន១០កញ្ចប់តូច ទម្ងន់( ២,៧១
ក្រាម ) សម្ភារៈប្រើប្រាស់ និងវេចខ្ចប់ថ្នាំញៀនមួយចំនួន រួមនិងទូរសព្ទ ១គ្រឿង ម៉ាកTecno ពណ័ខៀវ ។
សមត្ថកិច្ចបានឲ្យដឹងថា បន្ទាប់ពីបានទទួលព័ត៌មានតាមរយៈកម្មវិធីទូរសព្ទ App Nodrug អ.ជ.ប.គ.ញ លេខ1439 នៅថ្ងៃទី២៦ ឧសភា ២០២៥ ថា មានករណីប្រើប្រាស់ និងជួញដូរគ្រឿងញៀនខុសច្បាប់ ស្ថិតនៅចំណុចសាលាឆទាន ភូមិតារាបដូនស ឃុំគគីរ ស្រុកកៀនស្វាយ ខេត្តកណ្តល ។ កម្លាំងសមត្ថកិច្ចរបស់អនុគណៈកម្មការប្រចាំបញ្ជា២៤ម៉ោង បានទំនាក់ទំនង និងបញ្ជូនព័ត៌មានភ្លាមទៅកាន់សមត្ថកិច្ចជំនាញនៅមូលដ្ឋាន។ លុះដល់ថ្ងៃទី២ ខែមិថុនា ឆ្នាំ២០២៥ វេលាម៉ោង២២:៣០នាទី កម្លាំងផ្នែកប្រឆាំងបទល្មើសគ្រឿងញៀន សហការជាមួយប៉ុស្តិ៍គគីរ បានចុះដល់ចំណុចកើតហេតុ ស្ថិតនៅសាលាឆទាន ភូមិតារាបដូនស ឃុំគគីរ បានធ្វើការឃាត់ខ្លួនជនសង្ស័យ ចំនួន២នាក់ ឈ្មោះ ព្រុំ ដា ភេទប្រុស និង ឈ្មោះ ខាត់ វិសាល(គោ) និង ធ្វើការត្រួតពិនិត្យរកឃើញសម្ភារៈប្រើប្រាស់ថ្នាំញៀនមួយចំនួន បន្ទាប់មកកម្លាំងយើងក៏បានឃាត់ខ្លួនជនសង្ស័យទាំងពីរនាក់ យកមកប៉ុស្តិ៍នគរបាលរដ្ឋបាលគគីរដើម្បីធ្វើការសួរនាំ ។
នៅចំពោះមុខសមត្ថកិច្ចជនសង្ស័យឈ្មោះ ព្រុំ ដា និងឈ្មោះ ខាត់ វិសាល បានសារភាពថា ពួកខ្លួនតែងតែទៅទិញថ្នាំញៀនយកមកប្រើប្រាស់ ពីឈ្មោះ ហ៊ន កុសល់ (ស៊ុយ) និងឈ្មោះ សួន យ៉ុងប៊ីន នៅចំណុចមាត់បឹង រោងរបស់ឈ្មោះ ហ៊ន កុសល ស្ថិតនៅភូមិទួលដូង ឃុំគគីរ ស្រុកកៀនស្វាយ ។
ក្រោយបានចម្លើយសារភាពរបស់ឈ្មោះ ព្រុំ ដា និងឈ្មោះ ខាត់ វិសាល នៅថ្ងៃទី៣ ខែមិថុនា ឆ្នាំ២០២៥ វេលាម៉ោង ១១:០៥នាទី កម្លាំងផ្នែកប្រឆាំងបទល្មើសគ្រឿងញៀនសហការជាមួយប៉ុស្តិ៍គគីរ បានបន្តនិតិវិធីចុះទៅដល់ចំណុចរោងរបស់ឈ្មោះ ហ៊ន កុសល បានធ្វើការឃាត់ខ្លួន ឈ្មោះ ហ៊ន កុសល និងឈ្មោះ សួន យ៉ុងប៊ីន ដកហូតបានម្សៅក្រាមសថ្លាសង្ស័យសារធាតុញៀន(ម៉ាទឹកកក) ចំនួន១០កញ្ចប់តូច និងសម្ភារប្រើប្រាស់វេចខ្ចប់ថ្នាំញៀនមួយចំនួន ក្រោយត្រួតពិនិត្យរួច កម្លាំងសមត្ថកិច្ចបាននាំខ្លួនឈ្មោះ ហ៊ន កុសល និងឈ្មោះ សួន យ៉ុងប៊ីន មកផ្នែកប្រឆាំងគ្រឿងញៀន ដើម្បីសួរនាំ ។
នៅចំពោះមុខសមត្ថកិច្ច ពួកគេបានឆ្លើយសារភាពថា ម្សៅក្រាមសថ្លា សង្ស័យសារធាតុញៀន (ម៉ាទឹកកក) ចំនួន១០កញ្ចប់តូច ដែលសមត្ថកិច្ចដកហូតបាននេះ ជារបស់ពួកខ្លួនប្រាកដមែន ដោយខ្លួនបានទិញពីមនុស្សប្រុស (មិនស្គាល់ឈ្មោះ) នៅម្តុំវត្តអម្ពរវន្ត័ សង្កាត់ព្រែកថ្មី ខណ្ឌ័ច្បារអំពៅ មករំលែកជាកញ្ចប់តូចៗទុកលក់បន្ត ។ ហើយពួកខ្លួនទាំង២នាក់ ពិតជាបានលក់ថ្នាំញៀនទៅអោយឈ្មោះ ខាត់ វិសាល និងឈ្មោះ ព្រុំ ដា ប្រាកដមែន ។
ក្រោយពីសួរនាំរួច ជនសង្ស័យទាំង៤នាក់ រួមនិងវត្ថុតាងឃាត់ខ្លួននៅអធិការដ្ឋាននគរបាលស្រុកកៀនស្វាយ ដើម្បីចាត់ការតាមនីតិវិធីច្បាប់ ៕
ចែករំលែកព័តមាននេះ