រាជធានីភ្នំពេញ ៖ ស្ថានីយតាមដាន និងត្រួតពិនិត្យគុណភាពទឹក ដែលមានទីតាំងនៅចំណុចប្រសព្វរវាងទន្លេមេគង្គ និងទន្លេសាប ស្ថិតនៅលើច្រាំងទន្លេចតុមុខ កោះពេជ្រ ត្រូវបានដាក់ឲ្យដំណើរការលើកដំបូងកាលពីថ្ងៃទី២៦ មីនា កន្លងមក ។
ស្ថានីយនេះ មានសមត្ថភាពតាមដានសីតុណ្ហភាព, ភាពចម្លងអគ្គិសនី កម្រិត pH, កម្រិតអុកស៊ីសែនរលាយក្នុងទឹកDO និងភាពកករបស់ទឹក អាម៉ូញាក់ (NH4) និងCOD ដែលឧបករណ៍ទាំងនោះដំណើរការដោយស្វ័យប្រវត្តិលើ២៤ម៉ោងក្នុងមួយថ្ងៃ ។ នេះបើយោងតាមក្រសួងបរិស្ថាន ។
ថ្លែងក្នុងឱកាសនោះ លោករដ្ឋមន្ត្រី សាយ សំអាល់ បានលើកឡើងថា បច្ចុប្បន្នកំណើនប្រជាសាស្ត្រកាន់តែកើនឡើង ស្របពេលការពង្រីកទីក្រុងក៏កាន់តែធំ ។ ដូច្នេះ ការដាក់ឲ្យដំណើរការស្ថានីយដើម្បីតាមដាន និងត្រួតពិនិត្យគុណភាពទឹកនាពេលនេះ គឺជារឿងសំខាន់បំផុត។
លោកបណ្ឌិត បៃ ឈុនលី (Dr. Bai Chunli) ប្រធានបណ្ឌិតសភាវិទ្យាសាស្ត្រនៃសាធារណរដ្ឋប្រជាមានិតចិន បានឲ្យដឹងដែរថា ស្ថានីយនេះគឺជាផ្នែកមួយនៃការស្រាវជ្រាវ និងបទពិសោធន៍រួមគ្នារវាងប្រទេសទាំងពីរកម្ពុជា-ចិន សម្រាប់ទឹកនិងបរិស្ថាន ហើយក៏ជាកំណត់ត្រានៃព្រឹត្តិការណ៍ថ្មីមួយទៀតនៃកិច្ចសហប្រតិបត្តិការលើវិស័យទឹកស្អាតរវាងប្រទេសទាំងពីរ ។
ស្ថានីយនេះមានទំហំ៤ម៉ែត្រ គុណនឹង៥,៧០ម៉ែត្រ ធ្វើពីបេតុងអាមេ គ្រោងដែក និងដំបូលស័ង្កសី ហើយបានចាប់ដំណើរការសាងសង់កាលពីថ្ងៃទី៨ ខែវិច្ឆិកា ឆ្នាំ២០១៧ និងបានបញ្ចប់នៅពាក់កណ្តាលខែធ្នូឆ្នាំ២០១៧ ។
គួរបញ្ជាក់ដែរថា នៅមុនការប្រកាសដាក់ឲ្យដំណើរការនូវស្ថានីយនេះ លោករដ្ឋមន្ត្រី សាយ សំអាល់ និងលោកបណ្ឌិត បៃ ឈុនលី បានចុះហត្ថលេខាលើអនុស្សរណៈស្តីពីកិច្ចសហប្រតិបត្តិការលើវិស័យបរិស្ថានផងដែរ ។
អនុស្សរណៈនេះ គឺផ្តោតទៅលើការដោះស្រាយ និងស្តារប្រព័ន្ធរំដោះទឹក ដែលកន្លងមកបានជន់លិចផ្នែកខ្លះក្នុងទីក្រុងនារដូវវស្សា និងការរៀបចំអាងប្រព្រឹត្តិកម្ម ដែលជាចំណុចសំខាន់ៗសម្រាប់ការទប់ស្កាត់ការបំពុលគុណភាពទឹក, ការអភិរក្សជីវចម្រុះ, ការបន្សាំនឹងការប្រែប្រួលអាកាសធាតុ និងការគ្រប់គ្រងធនធានធម្មជាតិសម្រាប់ការអភិវឌ្ឍប្រកបដោយចីរភាព ។
តាមរយៈអនុស្សរណៈនេះ ភាគីចិននឹងផ្តល់ការបណ្តុះបណ្តាលដល់មន្ត្រីកម្ពុជាលើការគ្រប់គ្រងការបំពុល និងការគ្រប់គ្រងគុណភាពទឹក ។
លោករដ្ឋមន្ត្រី សាយ សំអាល់ បានមានប្រសាសន៍ថា អនុស្សរណៈនេះមានសារសំខាន់ណាស់សម្រាប់កិច្ចសហប្រតិបត្តិការរវាងស្ថាប័នទាំងពីរ និងជាចំណុចគន្លឹះចាប់ផ្តើមស្តីពីកិច្ចសហប្រតិបត្តិការលើវិស័យបរិស្ថានកម្ពុជា-ចិន៕
ចែករំលែកព័តមាននេះ