ខេត្តស្វាយរៀង ៖ កាកបាតក្រហមកម្ពុជាសាខាខេត្ត បាននាំអំណោយសប្បុរសធម៌ទៅចែកជូនគ្រួសារជនរងគ្រោះដោយអគ្គិភ័យចំនួន១គ្រួសារនៅក្រុងបាវិត ។ បើតាមមន្ត្រីសាខាកាកបាតក្រហមកម្ពុជាខេត្ត បានឲ្យដឹងថា បន្ទាប់ពីទទួលព័ត៌មានពីអនុសាខាកាកបាទក្រហមកម្ពុជាក្រុងបាវិត ស្តីពីករណីអគ្គិភ័យឆេះផ្ទះប្រជាពលរដ្ឋ នៅថ្ងៃទី២៧ ខែមីនា ឆ្នាំ២០១៨ លោក ម៉ែន វិបុល ប្រធានគណៈកម្មាធិការសាខាកាកបាទក្រហមកម្ពុជាខេត្តស្វាយរៀង បានចាត់ឲ្យក្រុមការងារសាខា ដឹកនាំដោយ លោកស្រី ពៅ សុភាព គណៈកម្មាធិការសាខា នាំយកអំណោយមនុស្សធម៌របស់សាខា ទៅចែកជូនគ្រួសារដែលរងគ្រោះដោយសារអគ្គិភ័យឆេះផ្ទះដែលបណ្តាលមកពីឆ្លងចរន្តអគ្គិសនី (ពេលម្ចាស់ផ្ទះមិននៅ) វេលាម៉ោង០៧និង៣០ នាទីយប់ ថ្ងៃទី២៥ ខែមីនា ឆ្នាំ២០១៨ បណ្តាលឲ្យឆេះផ្ទះ១ខ្នង ទំហំ ៤X៨ម៉ែត្រ សង់ពីឈើដំបូលប្រក់ស័ង្កសី ជញ្ជាំងស័ង្កសី រួមនឹងសម្ភារប្រើប្រាស់ក្នុងផ្ទះទាំងស្រុង ។
គ្រួសាររងគ្រោះឈ្មោះ សួស ភា ភេទប្រុស អាយុ៣៧ឆ្នាំ ប្រពន្ធឈ្មោះ ម៉ម ឆាត់ឆា អាយុ២៧ឆ្នាំ មានសមាជិក៥នាក់ រស់នៅភូមិព្រៃទប់ សង្កាត់ព្រៃអង្គុញ ក្រុងបាវិត ។
ក្នុងឱកាសនោះ លោកស្រី ពៅ សុភាព គណៈកម្មាធិការសាខា តំណាងលោក ម៉ែន វិបុល ប្រធានគណៈកម្មាធិការសាខា បានពាំនាំប្រសាសន៍របស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដែលផ្តាំផ្ញើសួរសុខទុក្ខ ក្តីអាណិតអាសូរ និងការសោកស្តាយ ចំពោះឧបទ្ទវហេតុដែលបានបំផ្លាញលំនៅដ្ឋាន និងទ្រព្យសម្បត្តិរបស់គ្រួសាររងគ្រោះនាពេលនេះ ។ ជាមួយគ្នានេះ លោកស្រី ក៏បានអំពាវនាវដល់ប្រជាពលរដ្ឋទាំងអស់ សូមមានការប្រុងប្រយ័ត្នចំពោះការប្រើប្រាស់ភ្លើង និងចរន្តអគ្គិសនី ដែលជាប្រភពនៃគ្រោះថ្នាក់ ជាពិសេសចំពោះបងប្អូនដែលប្រើប្រាស់ផ្ទាំងសូឡា ត្រូវមានការប្រុងប្រយ័ត្ន ឧស្សាហ៍ត្រួតពិនិត្យចៀសវាងមានគ្រោះអគ្គិភ័យកើតឡើងជាយថាហេតុ ហើយសូមកុំអស់សង្ឃឹមត្រូវប្រឹងប្រែងប្រកបរបរចិញ្ចឹមជីវិត ដើម្បីស្តារសេដ្ឋកិច្ចគ្រួសារឡើងវិញ ព្រោះអំណោយដែលបានផ្តល់ជូនពេលនេះ អាចជួយសម្រាលការលំបាកបានមួយគ្រាប៉ុណ្ណោះ ។
អំណោយដែលបានចែកជូនមានអង្ករ៥០គ.ក្រ កៅស៊ូតង់១ ធុងទឹកជ័រ១ ឆ្នាំងបាយសម្លរ២ កន្ទេលបត់១ មី១កេស ត្រីខ១០កំប៉ុង ទឹកស៊ីអ៊ីវ៦ដប មុង១ ភួយ១ ក្រមា១ សារុង១ ថវិកា១,៥០០,០០០រៀល ក្នុងនោះថវិការបស់សាខា ៤០០,០០០រៀល លោក ជ័យ សុន ១,០០០,០០០ រៀល និងថវិកាក្រុមការងារអនុសាខាក្រុង១០០,០០០រៀល ៕
ចែករំលែកព័តមាននេះ