ខេត្តកណ្ដាល ៖ ដោយសារតែប្រពន្ធទ្រាំនឹងទង្វើលោកប្ដីប្រមឹកដែលធ្វើបាបវាយដំច្រើនលើកច្រើនសារនៅពេលស្រវឹងហើយលើកក្រោយនេះបានដុតផ្ទះឆេះម៉ដ្ឋអស់ទាំងសម្ភារប្រើប្រាស់ទៀត កាលពីម៉ោង២រសៀល ថ្ងៃទី២៦ ខែមីនា ឆ្នាំ២០១៨ នៅភូមិទួលចាន់ ឃុំលើកដែក ស្រុកកោះធំ ខេត្តកណ្ដាល ។ ស្ត្រីជាប្រពន្ធបានសម្រេចចិត្តប្ដឹងឱ្យនគរបាលចាប់ខ្លួនបុរសជាប្ដីដើម្បីចាត់ការតាមច្បាប់ ។
មន្ត្រីនគរបាលស្រុកកោះធំបានឱ្យដឹងថា ជនសង្ស័យដែលបានចាប់ខ្លួនឈ្មោះ ប៉ូច ពុយ ភេទប្រុស អាយុ ៣៣ឆ្នាំ ជនជាតិខ្មែរ មុខរបរកសិករ ទីលំនៅភូមិទួលចាន់ ឃុំលើកដែក ស្រុកកោះធំ ខេត្តកណ្ដាល ។ ចំណែកជនរងគ្រោះជាប្រពន្ធ ចំរើន ស្រឿន អាយុ៣៨ឆ្នាំ ជនជាតិខ្មែរ មុខរបកសិករ មានកូនពីរនាក់ ។
នគរបាលបានឱ្យដឹងបន្ថែមថា រយៈកាលកន្លងមកជនសង្ស័យជាប្ដីពេលស្រវឹងស្រាធ្លាប់បានរករឿងប្រពន្ធដោយគ្មានហេតុផល និងវាយតប់លើប្រពន្ធជាញឹកញាប់ ព្រមទាំងធ្លាប់បានវាយបំផ្លាញទ្រព្យសម្បត្តិក្នុងផ្ទះជាច្រើនលើកច្រើនសារហើយក៏ត្រូវបានសមត្ថកិច្ចកោះហៅទៅប៉ុស្ដិ៍រដ្ឋបាលធ្វើការណែនាំអប់រំ និងមានកិច្ចសន្យាពីរដងដែរនៅតែមិនរាងចាល ។
លុះនៅពេលវេលាកើតហេតុខាងលើជនសង្ស័យបានផឹកស្រាស្រវឹង រួចត្រលប់មកដល់ផ្ទះវិញក៏បាននិយាយរករឿងប្រពន្ធពីនេះពីនោះដោយគ្មានហេតុផលពេលប្រពន្ធតបសម្ដីវិញបានបន្តិច ជនសង្ស័យជាប្ដីបានស្ទុះទៅចាប់ច្របាច់.កប្រពន្ធ និងបានយកភ្លើងដុតផ្ទះធ្វើអំពីឈើ និងរោងចិញ្ចឹមគោ បណ្ដាលឱ្យឆេះខូចខាតទាំងស្រុងរួមទាំងសម្ភារមួយចំនួនទៀយ ។
បន្ទាប់មកជនរងគ្រោះជាប្រពន្ធបានដាក់ពាក្យបណ្ដឹងទៅកាន់ប៉ុស្ដិ៍រដ្ឋបាលលើកដែក ក្រោយពីទទួលបានបណ្ដឹងភ្លាមកម្លាំងប៉ុស្ដិ៍បានចុះទៅនាំខ្លួនជនសង្ស័យមកកាន់ប៉ុស្ដិ៍រដ្ឋបាលដើម្បីសាកាសួរ និងបាននាំខ្លួនជនសង្ស័យទៅកាន់អធិការដ្ឋានដើម្បីកសាងសំណុំរឿងតាមនីតិវិធីច្បាប់ ៕
ចែករំលែកព័តមាននេះ