អ្នកវិទ្យាសាស្ត្រនៅសហរដ្ឋអាមេរិកបានពន្យល់ពីរុក្ខជាតិឱសថបុរាណចិនដែលគេប្រើអស់រយៈពេលជាង២០០០ឆ្នាំកន្លងមកនេះ ដើម្បីដោះស្រាយបញ្ហាគ្រុនក្តៅ និងបន្ធូរបន្ថយជំងឺគ្រុនចាញ់ ។រុក្ខជាតិឱសថនោះគេចំរាញ់ចេញពីឫសរុក្ខជាតិមានផ្កា ដែលជនជាតិចិនហៅថាចាងសាន(Chang Shan) ជាប្រភេទរុក្ខជាតិម្យ៉ាងមានស្លឹកពណ៌ខៀវ ហើយជាភាសាឡាតាំងហៅថា Dichroa Ferbrifuga Lour ។
ការប្រើប្រាស់រុក្ខជាតិចាងសាននេះ គឺមានតាំងតែពីសម័យរជ្ជកាលហានមកម៉្លេះចាប់ពីឆ្នាំ២០៦មុនគ្រឹស្តសករាជដល់២២០នៃគ្រឹស្តសករាជ ។ នេះបើយោងតាមឯកសារបុរាណដែលកត់ត្រាពីប្រពៃណីបុរាណចិន ។កាលពីឆ្នាំ២០០៩ អ្នកស្រាវជ្រាវបានយករុក្ខជាតិនោះធ្វើជាធាតុផ្សំដ៏សកម្មបំផុតហៅថា Febrifuginone ដែលអាចបង្កើតជាម៉ូឡេគុលឱសថឈ្មោះថា Halofuginone ។
គេបានរកឃើញថាម៉ូឡេគុល Halofuginone បានបង្ការមិនឱ្យមានការផលិតកោសិកាភាពសាំុទី១៧ ដែលវាយប្រហារកោសិការសុខភាពបង្កឱ្យមានការរលាកដែលអាចនាំឱ្យកើតជំងឺគ្រុនក្តៅ ។
យោងតាមការសិក្សាដែលបោះពុម្ភផ្សាយនៅក្នុងសារព័ត៌មាន Journal Nature បានរកឃើញថាម៉ូឡេគុល Halofuginone ដំណើរការដោយទប់ស្កាត់ការផលិតប្រូតេអីុនសម្រាប់បង្កើតកោសិកាអាក្រក់ទី១៧ ប៉ុន្តែវាមិនមែនជាម៉ូឡេគុលល្អទេ ។ ជាក់ស្តែងវាបានទប់ស្កាត់ម៉ូឡេគុលម្យ៉ាងហៅថា RNA ដែលមានមុខងារប្រមូលផ្តុំប្រូតេអីុនបន្តិចម្តងៗរួមជាមួយនឹងម៉ូឡេគុល DNA ដែលមាននៅក្នុងហ្សែន ។
ចំណែកជំងឺគ្រុនចាញ់វិញ បើតាមការសិក្សាបង្ហាញថា ម៉ូឡេគុល halofuginone ទំនងជាជ្រៀតចូលជាមួយនឹងដំណើរការប្រមូលផ្តុំប្រូតេអីុនដូចគ្នាដែរដែលអាចឱ្យបរាសិតគ្រុនចាញ់ចូលទៅរស់នៅក្នុងឈាម ។លោកផូល ស្គីមមែល អ្នកដឹកនាំក្រុមស្រាវជ្រាវនៅវិទ្យាស្ថានស្រាវជ្រាវ Scripps រដ្ឋកាលីហ្វ័រនីញ៉ាឱ្យដឹងថា លទ្ធផលថ្មីរបស់យើងបានទម្លាយនូវអាថ៌កំបាំងដែលធ្វើឱ្យមនុស្សងឿងឆ្ងល់ពីយន្តការដែលត្រូវបានគេប្រើព្យាបាលជម្ងឺគ្រុនក្តៅដោយសារឆ្លងជំងឺគ្រុនចាញ់តាំងពី២០០០ឆ្នាំមុននៅចិន។
ម៉ូឡេគុល Halofuginone ត្រូវបានគេសាកល្បងនៅក្នុងការពិសោធលើមនុស្ស ដើម្បីព្យាបាលជំងឺមហារីក និងជំងឺខ្សោយសាច់ដុំ ។ អ្នកជំនាញផ្នែកឱសថបានចាត់ទុកម៉ូឡេគុលនេះជាឧបករណ៍ដ៏មានសក្តានុពលសម្រាប់ប្រយុទ្ធប្រឆាំងនឹងជំងឺរលាកពោះវៀន និងរលាកសន្លាក់ ៕
ចែករំលែកព័តមាននេះ