រាជធានីភ្នំពេញ ៖ ការប្រកួតដែលបានធ្វើឡើងនៅលើសង្វៀនទូរទស្សន៍អាស៊ីអាគ្នេយ៍ កាលពីថ្ងៃទី២៥ មីនា បានធ្វើឱ្យម្នាក់ៗមានការចាប់អារម្មណ៍យ៉ាងខ្លាំង ដោយសារតែកីឡាករថៃ ត្រូវគេឃើញជើងខ្លាំងកម្ពុជា គឺ ធា នុរាជ ដែលមានឈ្មោះដើមថា សូយ ភារម្យ វាយឱ្យរាប់ឡើង២ដង និងខូចជើងទៅហើយ ប៉ុន្តែកីឡាករថៃរូបនេះបែរជាក្រោកតស៊ូរហូតធ្វើឱ្យកីឡាករកម្ពុជា ត្រូវរាប់៣ដងវិញភ្លាមៗ រហូតដល់បោះបង់ការប្រកួត។
ជ័យជម្នះរបស់កីឡាករថៃ បានធ្វើឱ្យម្នាក់ភ្ញាក់ផ្អើលយ៉ាងខ្លាំង ដោយសារតែស្ថានភាពដែលថៃបានជួប គឺទោះជាកីឡាករកម្ពុជាជើងខ្លាំងប៉ុណ្ណា ក៏ពិតជាសម្រេចចិត្តបោះបង់ការប្រកួតដូចគ្នា។ ពាក់ព័ន្ធនឹងបញ្ហានេះ អ្នករៀបចំការប្រកួត និងអ្នកដឹកនាំកីឡាករថៃដោយផ្ទាល់បានទម្លាយឱ្យដឹងពីអាថ៌កំបាំងនេះ។
ការប្រកួតដែលមានលទ្ធផលយ៉ាងកម្រនោះ យ៉ាងហោចជាងពាក់កណ្ដាលអ្នកស្នេហាប្រដាល់នៅក្នុងសង្វៀនទូរទស្សន៍អាស៊ីអាគ្នេយ៍លើកមកធ្វើជាប្រធានបទ។ នៅពេលកីឡាករថៃ Fa Sang និងកីឡាករ ធា នុរាជ ស្ថិតនៅសង្វៀនជាមួយគ្នា មានការកត់សម្គាល់ថា កីឡាករកម្ពុជាសង្កត់បានឱកាសវាយសង្គ្រប់ច្រើនជាងយ៉ាងខ្លាំង។ បើទោះជាកីឡាករថៃល្អដៃ និងកែង ប៉ុន្តែភាគីខាងកម្ពុជានៅតែមានឱកាសក្ដោបក្ដាប់ការវាយលុក ដើម្បីទទួលពិន្ទុច្រើន ដោយសារតែ ធា នុរាជ ប្រើតែបច្ចេកទេសទាត់ជើងក្រោមៗ ទាត់រហូតទាល់តែកីឡាករថៃខូចជើង ឈរលែងចង់នឹង។
យ៉ាងណាក៏ដោយ ម្នាក់ៗបែរជានឹកស្មានមិនដល់វិញ ដោយសារតែកីឡាករថៃដែលអ្នកណាក៏ឃើញថា ចាញ់យ៉ាងជ្រងរទៅហើយ បែរជាខ្លាំងជាងមុន ហើយស្ទុះវាយកីឡាករ ធា នុរាជ រហូតរាប់២ដង និងឈានដល់ការបោះបង់ក្នុងទឹកទី៥។
ពាក់ព័ន្ធនឹងបញ្ហានេះ លោក ថៃ អ៊ូ អ្នកដឹកនាំកីឡាករថៃឱ្យមកប្រកួតបានអះអាងថា គឺបណ្ដាលមកពីលោកដើរទៅព្រមានថា បើកីឡាករ Fa Sang ប្រកួតលែងៗចឹង ហើយបណ្ដោយឱ្យចាញ់ការប្រកួតក្រោយរាប់២លើក គឺលោកនឹងមិនឱ្យ សូម្បីតែមួយដុល្លារសម្រាប់តម្លៃខ្លួន ដោយសារតែលោកយល់ថា គេអត់ប្រកួតឱ្យអស់ពីសមត្ថភាព ទើបបណ្ដោយឱ្យកីឡាករកម្ពុជាទាត់រហូតខូចជើង៕
ចែករំលែកព័តមាននេះ