រាជធានីភ្នំពេញ ៖ នៅល្ងាចថ្ងៃសៅរ៍ ទី២៤ ខែមីនា ស្អែកនេះ ស្ថានីយទូរទស្សន៍ប៉ុស្ដិ៍លេខ៥ បើកការប្រដាល់ជាលក្ខណៈអន្តរជាតិដូចសព្វដងទៀតហើយ នៅក្នុងទីតាំងរបស់ខ្លួនដែលស្ថិតនៅព្រែកកំពិស ម្ដុំព្រែកហូរជាយរាជធានីភ្នំពេញ…
រាជធានីភ្នំពេញ ៖ នៅល្ងាចថ្ងៃសៅរ៍ ទី២៤ ខែមីនា ស្អែកនេះ ស្ថានីយទូរទស្សន៍ប៉ុស្ដិ៍លេខ៥ បើកការប្រដាល់ជាលក្ខណៈអន្តរជាតិដូចសព្វដងទៀតហើយ នៅក្នុងទីតាំងរបស់ខ្លួនដែលស្ថិតនៅព្រែកកំពិស ម្ដុំព្រែកហូរជាយរាជធានីភ្នំពេញ ប៉ុន្តែអ្វីដែលគេចាប់អារម្មណ៍ គឺកីឡាករថៃ ដែលជាម្ចាស់ខ្សែក្រវាត់ល្បីឈ្មោះមិនធម្មតាគឺជាសមាសភាពត្រូវប៉ះគ្នាជាមួយកីឡាករកម្ពុជា ម៉ន ព្រហ្មម៉ាញ ដែលទើបឡើងកូដក្នុងស្រុកគួរឱ្យភ្ញាក់ផ្អើល ។ នេះជាការប្រកួតយ៉ាងកម្រ ខណៈដែលមានការទម្លាយថា ម៉ន ព្រហ្មម៉ាញ ក្លាហានទទួលយកការប្រកួតនោះ ដើម្បីឱ្យភាពស្ងប់ស្ងាត់មួយរយៈរបស់ខ្លួនកម្រើកឡើងវិញ ស្របគ្នាដែលខាងអ្នករៀបចំការប្រកួតបញ្ជាក់ថា បើខាងកម្ពុជាបានទទួលជ័យជម្នះ គឺពិតជាល្បីម្ដងទៀតជាក់ជាមិនខាន។
ការប្រកួតដែលនឹងចាប់ផ្ដើមឡើងពីម៉ោង៥ល្ងាចនៅព្រែកកំពិសនេះ ត្រូវគេឃើញមានការរំពឹងខ្ពស់មិនខុសពីការប្រកួតអន្តរជាតិមុនៗនោះទេ ដោយសារតែភាពជាក់ស្ដែងគឺព្រឹត្តិការណ៍ដំណើរការចំពេលល្ងាចថ្ងៃសម្រាក ដែលជាថ្ងៃមនុស្សម្នានៅតំបន់ព្រែកកំពិសនិយមមកទស្សនាកកកុញ ស្របគ្នាដែលនៅតំបន់ប៉ុស្ដិ៍លេខ៥ក៏មានកំណើនអ្នករស់នៅច្រើនឡើងក្រោយមានវត្តមានសំណង់បុរីព្រោងព្រាតប្រដេញគ្នា ។
កីឡាករកម្ពុជាត្រូវបានគេចាប់អារម្មណ៍ហួសប្រមាណក្រោយពីមានការប្រកាសថា តម្រូវឱ្យស្វាគមន៍ម្ចាស់ខ្សែក្រវាត់ល្បីឈ្មោះនៅក្នុងប្រទេសថៃ ឈ្មោះ ផា ថាណា ដែលកីឡាកររូបនេះ ក្រៅពីជាម្ចាស់ខ្សែក្រវាត់ល្បីឈ្មោះនៅក្នុងប្រទេសថៃ ក៏មានថ្វីដៃបំបាក់កីឡាករបរទេស និងកីឡាករថៃដូចគ្នារាប់មិនអស់ផងដែរ ។ អ្នករៀបចំការប្រកួតបានអះអាងថា នៅក្នុងថ្ងៃនោះកីឡាករកម្ពុជាចំនួន៤រូបក៏ត្រូវប៉ះគ្នាក្នុងលក្ខណៈជម្រុះចាញ់ធ្លាក់ៗ ដែលជាការប្រកួតជម្រុះក្នុងវគ្គ១៦នាក់យក៨នាក់សប្ដាហ៍២ ទើបកាន់តែមានការចាប់អារម្មណ៍ទ្វេដងពីអ្នកទស្សនាភាគច្រើន ដែលសុទ្ធសឹងតែជាអ្នកស្នេហាវិស័យប្រដាល់ ។ វត្តមានកីឡាករទាំងកម្ពុជា និងថៃក្នុងសប្ដាហ៍នេះ មិនថាការប្រកួតជាលក្ខណៈអន្តរជាតិ ឬការប្រកួតជាលក្ខណៈជម្រុះយកអ្នកខ្លាំងទៅប្រកួតយកជើងឯក ពិតជាធ្វើឱ្យអ្នកស្នេហាវិស័យប្រដាល់ ចាប់អារម្មណ៍ ។ លោកអះអាងថា បើទោះ
ជាការប្រកួតជ្រើសរើសជើងឯកមានការចាប់អារម្មណ៍រួចជាស្រេច ក៏ប៉ុស្តិ៍លេខ៥នៅតែបានបញ្ចូលការប្រកួតជាលក្ខណៈអន្តរជាតិមួយគូៗនៅក្នុងការប្រកួតនោះ ដើម្បីឱ្យរឹតតែទាក់ទាញ។
វត្តមានរបស់សមាសភាពគូអន្តរជាតិ ក៏ត្រូវបានសម្រាំងយ៉ាងពិសេសផងដែរដើម្បីឱ្យអ្នកទស្សនាកាន់តែកន្ត្រាក់អារម្មណ៍នៅពេលកីឡាករប្រកួតគ្នា ។
លោក សេង កដិកា បញ្ជាក់ថា សមាសភាពខាងកម្ពុជាសម្រាប់ការប្រកួតជាមួយថៃលោកជឿជាក់ខ្លាំងលើកីឡាករ ម៉ន ព្រហ្មម៉ាញ ដោយសារតែកីឡាកររូបនេះធ្លាប់មានស្នាដៃរាប់មិនអស់ ទើបលោកសម្រេចដាក់ឱ្យប្រកួតជាលក្ខណៈអន្តរជាតិ ស្វាគមន៍ម្ចាស់ខ្សែក្រវាត់ មកពីប្រទេសថៃ ។ លោកប្រកាសថា វត្តមានចុះមករបស់កីឡាករថៃ ផាថាណា មានតែព្រហ្មម៉ាញ ម្នាក់ប៉ុណ្ណោះ ដែលលោកសម្លឹងឃើញថាមានបទពិសោធន៍ និងមានសមត្ថភាពគ្រប់គ្រាន់អាចឱ្យប្រកួតជាមួយបាន ជាពិសេសគឺអ្នកទាំងពីរមានប្រភេទទម្ងន់ត្រូវគ្នា ។ លោកក៏បានកំណត់ឱ្យកីឡាករកម្ពុជារូបនេះ ហ្វឹកហាត់ជាប់លាប់មិនតិចជាង១សប្ដាហ៍ផងដែរមុនពេលផ្គូផ្គង ទើបលោកយល់សមាសភាពរបស់កីឡាករកម្ពុជាមួយនេះ គ្រប់គ្រាន់សម្រាប់ឱ្យប៉ុស្តិ៍លេខ៥ដាក់ឱ្យប្រកួតជាលក្ខណៈអន្តរជាតិ នៅថ្ងៃសៅរ៍នេះបាន ។ លោកថា កីឡាករកម្ពុជា និងថៃ សុទ្ធតែត្រូវបានអះអាងថាមានការត្រៀមខ្លួនច្បាស់លាស់ ដោយសារតែភាគីម្ខាងៗចង់ឈ្នះការប្រកួតរៀងខ្លួន និងមិនចង់បាត់បង់ក្រេឌីតក្រោយពេលប៉ះគ្នា ។
លោក សេង កដិកា បន្តថា ជំនួបអន្តរជាតិដែលបានធ្វើឡើងនៅប៉ុស្តិ៍លេខ៥ មិនមែនសុទ្ធតែរន្ថើនព្រឹត្តិការណ៍ជើងឯកឱ្យអ្នកទស្សនាកាន់តែមានអារម្មណ៍កញ្ជ្រោលនោះទេ ប៉ុន្តែសម្រាប់ជំនួបរវាងព្រហ្មម៉ាញ និងម្ចាស់ខ្សែក្រវាត់ថៃ លោកជឿជាក់ថានឹងកក្រើកដោយសារកីឡាករថៃលោកស្គាល់ថ្វីដៃច្បាស់ថាខ្លាំងមិនធម្មតា ហើយសម្រាប់កីឡាករកម្ពុជាវិញ ក៏ល្អស្ថិតក្នុងទំនុកចិត្តលោកតាំងពីមុនផ្គូផ្គង ។ បើទោះជាកីឡាករកម្ពុជាត្រូវប្រឈមនឹងកីឡាករថៃល្អ ក៏លោកនៅតែប្រកាសលើកទឹកចិត្តចំពោះម៉ន ព្រហ្មម៉ាញ ថា មានសមត្ថភាពគ្រប់គ្រាន់ក្នុងការតតាំង និងមានសង្ឃឹមឈ្នះច្រើន ពោលគឺល្អជាងការផ្គូផ្គងដាក់កីឡាករកម្ពុជាផ្សេងឱ្យជំនួស ។ ជំនួបរវាងពួកគេលោកនៅតែថាមិនមែនជារឿងចៃដន្យ និងមិនមែនជារឿងធម្មតា ដោយសារមានការព្រាងទុកពីសំណាក់រូបលោកដែលជាអ្នកផ្គូផ្គងនៅប៉ុស្តិ៍លេខ៥ និងការរៀបចំទុកពីសំណាក់អ្នកដឹកនាំកីឡាករថៃមកតែម្ដង ។
សម្រាប់ការប្រកួត៤នាក់ជាលក្ខណៈមិត្តភាពដែលជាការជម្រុះជើងឯកវគ្គថ្មីនៅសប្ដាហ៍ទី២ក្នុងវគ្គ១៦នាក់យក៨នាក់នេះវិញ លោកសេង កដិកា ថា នឹងមានវត្តមានសុទ្ធសឹងតែជាកីឡាករល្អៗនៅក្នុងពិភពប្រដាល់ ។ លោកបញ្ជាក់ថា ការប្រកួតលើកនេះក៏មិនខុសពីរូបមន្តដែលធ្លាប់បានធ្វើនោះទេ គឺអ្នកឈ្នះបានឡើងវគ្គបន្ត ហើយសម្រាប់អ្នកចាញ់គឺធ្លាក់ហាលអាវ ។ លោកអះអាងថា ការប្រកួតរបស់លោក គឺមិនមានអ្នកឈ្នះក្នុងវគ្គណាមួយមិនឈ្នះដោយការប្រឹងប្រែងនោះទេ ។ លោកថា ការប្រកួតចាញ់ធ្លាក់ៗសុទ្ធតែទាមទារឱ្យកីឡាករម្នាក់ៗត្រៀមខ្លួនខុសពីការប្រកួតតាមរបៀបសន្សំពិន្ទុ ដោយសារតែអ្នកមិនខំប្រឹងប្រែង គឺដឹងតែធ្លាក់ហើយបាត់ឱកាស ដែលតម្រូវឱ្យអ្នកមានមុខឡើងប្រកួតត្រូវតែប្រកួតប្ដូរ មិនខ្វល់ពីគ្រោះថ្នាក់ និងលាក់ថ្វីដៃ ពោលគឺធ្វើយ៉ាងម៉េចឱ្យតែឈ្នះ៕
ចែករំលែកព័តមាននេះ