រាជធានីភ្នំពេញ ៖ វគ្គបណ្ដុះបណ្ដាលនីមួយៗបើចង់ឱ្យសិក្ខាកាមងាយយល់ងាយចាប់បាននូវអ្វើដែលគ្រូឧទ្ទេសបានណែនាំគឺអាស្រ័យទៅលើចំណេះដឹងខាងភាសារបស់សិក្ខាកាម និងអ្នកបកប្រែប៉ុណ្ណោះ ។ បើសិក្ខាកាមចេះភាសាបរទេសឬអ្នកបកប្រែបកឱ្យចំអត្ថន័យដែលគ្រូបានប្រាប់នឹងធ្វើឱ្យសិក្ខាកាមងាយយល់ងាយចាប់បាននូវខ្លឹមសារមេរៀនដែលគ្រូផ្ដល់ឱ្យក្នុងវគ្គបណ្ដុះបណ្ដាលមិនខាន ។
លោក Rick Powersគ្រូឧទ្ទេសជនជាតិអាមេរិកមកពីសហព័ន្ធកីឡាហែលទឹកអន្តរជាតិ មានប្រសាសន៍បែបនេះនៅក្នុងពិធីបើកវគ្គបណ្ដុះបណ្ដាលគ្រូហែលទឹកកម្រិតមធ្យមនៅទីស្នាក់ការគណៈកម្មាធិការជាតិអូឡាំពិកកម្ពុជា កាលពីថ្ងៃទី១៩ មីនា ដែលមានសិក្ខាកាមចូលរួមចំនួន២៩នាក់។
លោក Rick Powers បានលើកឡើងទៀតថា លោកធ្លាប់ឆ្លងកាត់ធ្វើជាគ្រូឧទ្ទេសអស់រយៈពេលជាច្រើនឆ្នាំមកហើយ ថែមទាំងធ្លាប់ធ្វើដំណើរទៅធ្វើការបណ្ដុះបណ្ដាលនៅពាសពេញពិភពលោកទៀតផង ។ លោកក៏បានសំណូមពរដល់សិក្ខាកាមទាំងអស់ត្រូវព្យាយាម និងខិតខំសិក្សាដោយយកចិត្តទុកដាក់ និងត្រូវហ៊ានសួរនូវអ្វីដែលយើងមិនយល់ ។ លោកថា ការមិនយល់ហើយហ៊ានសួរមិនមែនជាភាពល្ងង់ខ្លៅនោះទេ មានតែអ្នកមិនយល់ហើយមិនហ៊ានសួរទើបជាអ្នកល្ងង់ខ្លៅពិតប្រាកដ ។ លោកមកទីនេះពិតជាមានការចាប់អារម្មណ៍យ៉ាងខ្លាំង ជាពិសេសជាមួយប្រជាជននៅក្នុងតំបន់អាស៊ីតែម្ដង ព្រោះលោកធ្លាប់ធ្វើដំណើរទៅបង្ហាត់គ្រូហែលទឹកនៅប្រទេសហ្វីលីពីន ម៉ាឡេស៊ី និងសិង្ហបូរី ហើយសម្រាប់ប្រទេសកម្ពុជា នេះគឺជាលើកទី២ហើយ ។ លោកគិតថា អនុស្សាវរីយ៍របស់លោកជាមួយប្រជាជាតិក្នុងតំបន់អាស៊ីពិតជាមានច្រើនមែនទែន។
លោក ហែម គីរី អគ្គលេខាធិការសហព័ន្ធកីឡាហែលទឹកកម្ពុជា បានឱ្យដឹងថា វគ្គបណ្ដុះ
បណ្ដាលគ្រូហែលទឹកកម្រិតមធ្យមនេះមានរយៈពេល៥ថ្ងៃចាប់ពីថ្ងៃទី១៩ ដល់ថ្ងៃទី២៣ មីនាក្រោមកញ្ចប់ថវិការបស់ក្រសួងអប់រំ យុវជន និងកីឡា ដោយបានអញ្ជើញគ្រូឧទ្ទេសគឺលោកRick Powersជាជនជាតិអាមេរិកមកពីសហព័ន្ធកីឡាហែលទឹកអន្តរជាតិ តាមការស្នើសុំរបស់សហព័ន្ធខ្មែរកីឡាហែលទឹក ។ វគ្គបណ្ដុះបណ្ដាលគ្រូហែលទឹកកម្រិតមធ្យមនេះធ្លាប់ធ្វើឡើងកាលពីឆ្នាំ២០១៤រួចម្ដងមកហើយ។
នៅក្នុងឆ្នាំ២០១៨នេះ សហព័ន្ធខ្មែរកីឡាហែលទឹកមានគម្រោងរៀបចំធ្វើយ៉ាងតិចឱ្យបាន២ដងក្នុង១ឆ្នាំ ។ ចំណែកសិក្ខាកាមដែលបានចូលរួមនៅក្នុងពេលនេះសុទ្ធតែធ្លាប់ឆ្លងកាត់វគ្គបណ្ដុះបណ្ដាលកម្រិត២រួចម្ដងមកហើយ ។ នេះគឺជាវគ្គដែលមានកម្រិតខ្ពស់ជាងមុន ដូច្នេះលោកសង្ឃឹមថា សិក្ខាកាមទាំងអស់បន្ទាប់ពីឆ្លងកាត់វគ្គបណ្ដុះបណ្ដាលនេះទៅនឹងទទួលបានចំណេះដឹងកាន់តែច្រើនពីគ្រូឧទ្ទេសដ៏មានបទពិសោធន៍មកពីសហរដ្ឋអាមេរិករូបនេះមិនខាន។
លោក ហែម ចាន់លី អនុប្រធានសហព័ន្ធខ្មែរកីឡាហែលទឹកបានលើកឡើងថា ចាប់តាំងពីឆ្នាំ២០១៧រហូតមកទល់ពេលនេះ សហព័ន្ធបានខិតខំបង្កើតឱ្យមានសកម្មភាពហែលទឹកជាច្រើននៅទូទាំងប្រទេស ដោយផ្ដើមចេញពីតំបន់ដែលមានប្រភពទឹក ។
ហើយដើម្បីធ្វើឱ្យវិស័យកីឡាហែលទឹកកាន់តែមានភាពរីកចម្រើន ឱ្យមានអ្នកចូលរួមកាន់តែច្រើន លោកមានគម្រោងរៀបចំការប្រកួតជាលក្ខណៈOpen Waterឱ្យបានច្រើនដងក្នុង១ឆ្នាំ ជាពិសេសតំបន់ដែលមានប្រភពទឹកនៅក្នុងប្រទេសកម្ពុជា។លោកក៏បានក្រើនរំលឹកដល់សិក្ខាកាមទាំងអស់ត្រូវរៀនបង្កើតកម្មវិធីប្រកួតដោយខ្លួនឯង និងខិតខំរៀនភាសាអង់គ្លេសឱ្យកាន់តែស្ទាត់ថែមទៀត ងាយស្រួលថ្ងៃក្រោយពេលជួបប្រាស្រ័យទាក់ទងជាមួយគ្រូបរទេស យើងមិនបាច់ប្រើប្រាស់អ្នកបកប្រែទៀតទេ ៕
ចែករំលែកព័តមាននេះ