រាជធានីភ្នំពេញ ៖ មន្ត្រីជាន់ខ្ពស់ធនាគារជាតិនៃកម្ពុជា បានលើកឡើងថា ការមកដល់នៃក្រុមហ៊ុនហិរញ្ញវត្ថុជប៉ុនជាបន្តបន្ទាប់ កំពុងឆ្លុះបញ្ចាំងពីជំនឿចិត្តរបស់វិនិយោគិនជប៉ុនលើវិស័យធនាគារ និងហិរញ្ញវត្ថុរបស់កម្ពុជា ស្របពេលវិស័យមួយនេះកំពុងរីកចម្រើន ។
ថ្លែងក្នុងពិធីប្រកាសបើកដំណើរការជាផ្លូវការនៃក្រុមហ៊ុនភតិសន្យាហិរញ្ញវត្ថុ ជេកស៍ ហ្វាយនែន (ខេមបូឌា) ម.ក កាលពីថ្ងៃទី១៩ មីនា នៅស្ថានទូតជប៉ុន លោកជំទាវ អ៊ុក ម៉ាលី ទេសាភិបាលរងធនាគារជាតិនៃកម្ពុជា មានប្រសាសន៍ថា វត្តមានរបស់ក្រុមហ៊ុននេះបានបង្ហាញពីជំនឿទុកចិត្តរបស់វិនិយោគិនជប៉ុនលើការវិវត្តនៃប្រតិបត្តិការធនាគារ និងហិរញ្ញវត្ថុ ស្របពេលកំណើនសេដ្ឋកិច្ចរឹងមាំប្រមាណ៦,៩% អតិផរណាជាមធ្យម២,១% និងវិស័យធនាគារនិងហិរញ្ញវត្ថុនៅកម្ពុជាបន្តរីកចម្រើនទាំងទំហំ និងវិសាលភាព ប្រកបដោយសុវត្ថិភាព និងបរិយាប័ន្ន ។
លោកជំទាវថ្លែងថា ៖« គិតត្រឹមថ្ងៃទី៣១ ខែធ្នូ ឆ្នាំ២០១៧ កម្ពុជាមានធនាគារពាណិជ្ជចំនួន៣៩, ធនាគារឯកទេសចំនួន១៥ និងគ្រឹះស្ថានមីក្រូហិរញ្ញវត្ថុចំនួន៧៩ ។ ដោយឡែក ក្រុមហ៊ុនភតិសន្យាមានចំនួន១១ ហើយថ្ងៃនេះ (ថ្ងៃទី១៩មីនា)បានបង្កើតថែមថ្មីមួយទៀត សរុបទាំងអស់ចំនួន១២ ដែលបង្ហាញពីការរីកចម្រើននៃវិស័យនេះកាន់តែខ្លាំងជាងឆ្នាំមុនៗ » ។
នាយកគ្រប់គ្រងក្រុមហ៊ុនភតិសន្យាហិរញ្ញវត្ថុ ជេកស៍ ហ្វាយនែន(ខេមបូឌា) បានឲ្យដឹងដែរថា ការសម្រេចបាននូវកំណើនសេដ្ឋកិច្ចរបស់កម្ពុជា ជាបន្ដបន្ទាប់ ជាកត្តាដ៏ចាំបាច់បំផុតក្នុងបរិយាកាសវិនិយោគអាជីវកម្ម ។
ថ្លែងប្រាប់កោះសន្ដិភាព លោក MASAHIRO ARAYAMA នាយកគ្រប់គ្រងរូបនេះ បានលើកឡើងថា ៖« បច្ចុប្បន្ន តម្រូវការទីផ្សារផ្នែកហិរញ្ញវត្ថុនៅកម្ពុជា ពិសេសការទិញម៉ូតូកំពុងតែទទួលបានការគាំទ្រ និងមានប្រជាប្រិយភាពបំផុត ខណៈផលិតផលដទៃទៀត ដូចជា សម្ភារផ្ទះបាយ ម៉ាស៊ីនកសិកម្ម និងយានយន្ដ ជាដើមកំពុងមានសន្ទុះខ្លាំង ដែលនេះសបញ្ជាក់ថា ប្រជាពលរដ្ឋកម្ពុជាកំពុងតែប្រឹងប្រែងយ៉ាងខ្លាំងដើម្បីធ្វើឲ្យជីវិតរបស់ពួកគេកាន់តែប្រសើរឡើង។ ដោយមើលឃើញដូច្នេះ យើងពិតជារីករាយ និងពេញចិត្តក្នុងការសហការជាមួយពួកគេ » ។
លោកបញ្ជាក់ថា ៖« បច្ចុប្បន្ននេះ យើងបានវិនិយោគ២,៥លានដុល្លារដើម្បីបើកដំណើរការ ដោយផ្ដល់សេវាបង់រំលស់ម៉ូតូ ហើយនៅថ្ងៃខាងមុខ យើងនឹងពង្រីកបន្ថែមទៀតដូចជា បង់រំលស់សម្ភារផ្ទះបាយ, ម៉ាស៊ីនកសិកម្ម, រថយន្ដ និងគ្រប់សេវាហិរញ្ញវត្ថុទាំងអស់ សម្រាប់ប្រជាពលរដ្ឋកម្ពុជាដែលមានបំណងបំពេញនូវក្ដីសុបិនរបស់ពួកគេ ដើម្បីទទួលបានជីវិតកាន់តែប្រសើរឡើង » ។
ក្រុមហ៊ុនភតិសន្យាហិរញ្ញវត្ថុ ជេកស៍ ហ្វាយនែន(ខេមបូឌា) ម.ក គឺជាបុត្រសម្ព័ន្ធរបស់ក្រុមហ៊ុនហិរញ្ញវត្ថុJACCS ដែលជាក្រុមហ៊ុនផ្ដល់សេវាហិរញ្ញវត្ថុនៅប្រទេសជប៉ុន និងទទួលបានអាជ្ញាប័ណ្ណអាជីវកម្មជាផ្លូវការពីធនាគារជាតិនៃកម្ពុជាកាលពីខែមករា ដើមឆ្នាំនេះ ។
ក្រុមហ៊ុននេះបានពង្រីកអាជីវកម្មរបស់ខ្លួនមកកាន់ប្រទេសក្នុងតំបន់អាស៊ានជាបន្តបន្ទាប់ដូចជា ប្រទេសវៀតណាមនៅឆ្នាំ២០១០, ឥណ្ឌូណេស៊ីក្នុងឆ្នាំ២០១២, ហ្វ៊ីលីពីនក្នុងឆ្នាំ២០១៦ ហើយកម្ពុជាជាប្រទេសទី៤ដែលក្រុមហ៊៊ុននេះបានពង្រីកអាជីវកម្មរបស់ខ្លួននៅក្រៅប្រទេស ។
លោក Yasuyoshi ITAGAKI អគ្គនាយកប្រតិបត្តិនៃក្រុមហ៊ុនJACCS បានលើកឡើងថា ការឈានជើងមកទីផ្សារកម្ពុជានាពេលនេះ ក្នុងគោលបំណងចូលរួមជំរុញកំណើនសេដ្ឋកិច្ច ក៏ដូចជាលើកកម្ពស់ជីវភាពប្រជាជនកម្ពុជា តាមរយៈការផ្ដល់សេវាហិរញ្ញវត្ថុប្រកបដោយទំនុកចិត្ត ។
លោកថ្លែងថា ៖« ជំនឿទុកចិត្តគឺជាមូលដ្ឋានគ្រឹះសម្រាប់អ្វីៗទាំងអស់ ។ យើងមានឧត្តមគតិបម្រើដល់ការបង្កើតអនាគតប្រកបដោយក្តីសង្ឃឹម និងកសាងសង្គមមួយដែលសម្បូរបែប ហើយយើងនឹងប្រឹងប្រែងធ្វើយ៉ាងណាបង្កើតអនាគតដែលមានក្ដីសង្ឃឹមសម្រាប់ប្រជាជនកម្ពុជា » ។
ទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ច ជាតិ លោកបណ្ឌិត ម៉ី កល្យាណ បានលើកឡើងថា សេដ្ឋកិច្ចកម្ពុជាសម្រេចបានកំណើនល្អប្រសើរ គួបផ្សំនឹងស្ថិរភាពនយោបាយ និងលំហូរទុនវិនិយោគផ្ទាល់ពីបរទេស(FDI) កើនឡើងជាបន្ដបន្ទាប់ ជាផ្នែកមួយយ៉ាងសំខាន់ក្នុងការទាក់ទាញវិនិយោគិនជប៉ុនកាន់តែច្រើនចូលមកវិនិយោគនៅកម្ពុជា ។
លោកបន្តថា ៖« បច្ចុប្បន្ន ជប៉ុនបានវិនិយោគស្ទើរគ្រប់វិស័យដើម្បីធ្វើជាមូលដ្ឋានសម្រាប់ធ្វើការ និងរស់នៅរយៈពេលវែងរបស់ពួកគេនៅកម្ពុជា » ។
គិតត្រឹមឆ្នាំ២០១៧ ប្រាក់បញ្ញើអតិថិជនក្នុងប្រព័ន្ធធនាគារបានកើនឡើងដល់៨៥% នៃផ.ស.ស ហើយឥណទានបានកើនឡើងដល់៨០%នៃផ.ស.ស ពោលគឺមានកំណើន២៥,១១% និង១៩,៨៦% រៀងគ្នាធៀបនឹងឆ្នាំ២០១៦ ។ ការរីកចម្រើន និងអភិវឌ្ឍន៍ទាំងនេះ អាស្រ័យដោយប្រទេសកម្ពុជាមានសុខសន្តិភាព ស្ថិរភាពនយោបាយ និងស្ថិរភាពម៉ាក្រូសេដ្ឋកិច្ច។ នេះបើយោងតាមការបញ្ជាក់ពីទេសាភិបាលរងធនាគារជាតិនៃកម្ពុជា ៕
ចែករំលែកព័តមាននេះ