រាជធានីភ្នំពេញ ៖ គោរម្យងារ «ឧកញ៉ា»បានមកដោយព្រះរាជក្រឹត្យឡាយព្រះហស្តលេខាដោយព្រះមហាក្សត្រ ។ លក្ខខណ្ឌដែលអាចទទួលបាននូវគោរម្យងារ «ឧកញ៉ា» គឺសប្បុរសជនទាំងឡាយណា ដែលបានបរិច្ចាគទ្រព្យធនផ្ទាល់ខ្លួនជួយសង្គមជាតិ ដំបូងចាប់ពីមួយសែនដុល្លារឡើងទៅ…
រាជធានីភ្នំពេញ ៖ គោរម្យងារ «ឧកញ៉ា»បានមកដោយព្រះរាជក្រឹត្យឡាយព្រះហស្តលេខាដោយព្រះមហាក្សត្រ ។ លក្ខខណ្ឌដែលអាចទទួលបាននូវគោរម្យងារ «ឧកញ៉ា» គឺសប្បុរសជនទាំងឡាយណា ដែលបានបរិច្ចាគទ្រព្យធនផ្ទាល់ខ្លួនជួយសង្គមជាតិ ដំបូងចាប់ពីមួយសែនដុល្លារឡើងទៅ និងត្រូវបាននាយករដ្ឋមន្ត្រីស្នើសុំទៅព្រះមហាក្សត្រ ដើម្បីព្រះរាជទាននូវគោរម្យងារនេះ ។ ឈានមកដល់ខែមីនា ឆ្នាំ២០១៧ សប្បុរសជនទាំងឡាយណា ដែលបានបរិច្ចាគទ្រព្យធនផ្ទាល់ខ្លួន ជួយស្ថាបនាជាតិ ចាប់ពី៥០ម៉ឺនដុល្លារ ឡើងទៅ ទើបនាយករដ្ឋមន្ត្រីសម្រេច ស្នើសុំទៅព្រះមហាក្សត្រព្រះរាជទាននូវគោរម្យងារឧកញ៉ា ដែលអាចបញ្ជាក់បានថា ឧកញ៉ាឡើងថ្លៃមួយជាប្រាំ ។
ទោះជាយ៉ាងនេះក្តី សម័យសន្តិភាពនិងការអភិវឌ្ឍរបស់តេជោសែន នាយករដ្ឋមន្ត្រី ធ្វើឱ្យពាណិជ្ជករទាំងឡាយ រកស៊ីកាន់តែកាក់កបអ្នកមានធនធានកាន់តែកើនឡើង ។ ទោះបីត្រូវចំណាយស្ថាបនាជាតិលើសពី៥០ម៉ឺនដុល្លារក្តី ក៏បានកត់សម្គាល់ឃើញថា មានសប្បុរសជនអ្នកមានមិនតិចទេ ដែលបានទទួលគោរម្យងារ«ឧកញ៉ា»ចាប់ពីឆ្នាំ២០១៧មក ។
គួរកត់សម្គាល់ថា កាល២ឆ្នាំមុននេះ «កោះសន្តិភាព» បានផ្សាយម្តងមកហើយ នូវបញ្ជីរាយនាម «ឧកញ៉ា»ក្រៅផ្លូវការមួយ ដែលជាលទ្ធផលនៃការព្យាយាមស្រាវជ្រាវដោយកោះសន្តិភាព ។ ការផ្សាយនូវបញ្ជីឈ្មោះកន្លងមក ជឿជាក់ថាមិនទាន់អស់ឈ្មោះ «ឧកញ៉ា» នៅឡើយទេ ។ ប៉ុន្តែដោយសារសំណូមពររបស់មហាជនបានសុំឱ្យជួយស្រាវជ្រាវ និងផ្សព្វផ្សាយបន្តទៀតនូវចំនួន«ឧកញ៉ា»ដែលមាននៅក្នុងព្រះរាជាណាចក្រកម្ពុជា ការិយាល័យនិពន្ធយើងក៏បានទទួលយកនូវសំណូមពរនេះ ព្រមទាំងបានព្យាយាមស្រាវជ្រាវបន្ថែមប្រកបដោយភាពអំណត់ ពីស្ថាប័នជាតិជាន់ខ្ពស់អស់រយៈពេលយ៉ាងយូរ ទើបទទួលបានក្រៅផ្លូវការ ពីលេខរៀងទី១ នៅឆ្នាំចាប់ផ្តើមដំបូង១៩៩៣ រហូតមកដល់ឆ្នាំ២០១៧ ។
ទោះជាយ៉ាងណាក៏ដោយ ទោះជាមិនទាន់បានសុក្រិត្យ១០០%ក៏ដោយ កោះសន្តិភាពបានសម្រេចចេញផ្សាយ ដែលជាសមិទ្ធផលស្រាវជ្រាវជូនអ្នកអានតាមសំណូមពរ ព្រមទាំងសូមមេត្តាអធ្យាស្រ័យ មេត្តាយោគយល់ផង និងមេត្តាខន្តីញោម បើការផ្សាយនេះ មានខុសឈ្មោះ ខុសអក្ខរាវិរុទ្ធបន្តិចបន្តួច ឬបាត់ឈ្មោះដោយប្រការណាមួយ ដែលយើងយល់ថា ជាកំហុសអចេតនាផ្នែកបច្ចេកទេស ។
សូមមេត្តាតាមដានអាន ជាបន្តបន្ទាប់រហូតដល់ចប់នៅលើទំព័រកាសែតកោះសន្តិភាព ដោយមេត្រីភាព ។
ចែករំលែកព័តមាននេះ