ខេត្តកំពត ៖ ក្រោយពីមានការស្តារ និងអភិវឌ្ឍន៍លើវិស័យទេសចរណ៍របស់រាជរដ្ឋាភិបាលដែលមានសម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ជាប្រមុខ នៅគ្រប់ហេដ្ឋារចនាសម្ព័ន្ធ សល់ពីគំនរផេះផង់ដោយសារសង្គ្រាមអូសបន្លាយ និងរបបប្រល័យពូជសាសន៍ ប៉ុល ពត វិស័យទេសចរណ៍ត្រូវបានស្តារ និងអភិវឌ្ឍន៍ឡើងវិញ គ្រប់តំបន់នៅទូទាំងប្រទេស ។ ដោយឡែកលើទឹកដីខេត្តកំពត
ខេត្តកំពត ៖ ក្រោយពីមានការស្តារ និងអភិវឌ្ឍន៍លើវិស័យទេសចរណ៍របស់រាជរដ្ឋាភិបាលដែលមានសម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ជាប្រមុខ នៅគ្រប់ហេដ្ឋារចនាសម្ព័ន្ធ សល់ពីគំនរផេះផង់ដោយសារសង្គ្រាមអូសបន្លាយ និងរបបប្រល័យពូជសាសន៍ ប៉ុល ពត វិស័យទេសចរណ៍ត្រូវបានស្តារ និងអភិវឌ្ឍន៍ឡើងវិញ គ្រប់តំបន់នៅទូទាំងប្រទេស ។
ដោយឡែកលើទឹកដីខេត្តកំពត ក្រោមកិច្ចខិតខំប្រឹងប្រែងអនុវត្តនូវគោលនយោបាយចតុកោណរបស់រាជរដ្ឋាភិបាលពីអាជ្ញាធរខេត្ត ដែលមានលោកខូយ ឃុនហ៊ួរ ជាអភិបាលខេត្ត និងទីប្រឹក្សាផ្ទាល់សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បាននិងកំពុងខិតខំស្តារការអភិវឌ្ឍន៍បានយ៉ាងល្អប្រសើរ ជាពិសេសកសាងតំបន់ទេសចរណ៍មានរមណីយដ្ឋានជាច្រើនកន្លែង ដើម្បីឱ្យភ្ញៀវជាតិ និងអន្តរជាតិ មកទស្សនាកំសាន្ត ដូចជារមណីយដ្ឋានទេសចរណ៍ធម្មជាតិទឹកឈូ មានសួនសត្វ និងដំណាំហូបផ្លែជាច្រើនមុខទៀត ។
រមណីយដ្ឋានភ្នំឈ្ងោក ទំនប់ប្រទាក់ក្រឡាស្ថិតក្នុងស្រុកទឹកឈូ រមណីយដ្ឋានប៉ាទីយ៉ារីសត ព្រែកអំពិល ស្ថិតក្នុងឃុំកោះតូច ស្រុកទឹកឈូ សំបូរដោយម្ហូបគ្រឿងសមុទ្រ រមណីយដ្ឋានអន្លុងធំ ស្ថិតក្នុងឃុំព្រែកត្នោត ស្រុកទឹកឈូ ដែលមានចំងាយ១៨គីឡូម៉ែត្រពីក្រុងកំពត ។ ក្រៅពីរមណីយដ្ឋានទេសចរណ៍ធម្មជាតិមួយចំនួនខាងលើ នៅមានរមណីយដ្ឋានទេសចរណ៍ធម្មជាតិដ៏ត្រកាលមួយទៀតគឺរមណីយដ្ឋានបូកគោ ដែលជារៀងរាល់ថ្ងៃបុណ្យជាតិ ឬចូលឆ្នាំសាកលគេឃើញភ្ញៀវជាតិ និងអន្តរជាតិតែងតែមកលំហែកាយនៅទីនោះ ដើម្បីស្រូបយកខ្យល់អាកាសដ៏បរិសុទ្ធ និងទស្សនាតាមរមណីយដ្ឋានតូចៗ នៅលើកំពូលភ្នំជាច្រើនកន្លែងដូចជា រមណីយដ្ឋានទឹកធ្លាក់ស្រែ១០០ វត្តសំពៅ៥ សំណាក់ស្លាខ្មៅ កាស៊ីណូពីអតីតកាលជាដើម និងមានកន្លែងសំរាប់កំសាន្តជាច្រើនទៀត ។
លោកយ៉ង ភិរម្យ ប្រធានឧទ្យានជាតិព្រះមុនីវង្សបូកគោ បានឱ្យកោះសន្តិភាពដឹងថា នៅថ្ងៃបុណ្យចូលឆ្នាំចិន-វៀតណាមនេះ តំបន់រមណីយដ្ឋានទេសចរណ៍បូកគោបានបើកឱ្យភ្ញៀវឡើងទៅលេងកំសាន្តរយៈពេលប្រាំថ្ងៃចាប់ពីថ្ងៃទី២ ដល់ថ្ងៃទី៦ កុម្ភៈ ។ លោកបន្តទៀតថា ផ្នែកសុវត្ថិភាពតាមផ្លូវ គឺផ្លូវក្រាលដោយកៅស៊ូទៅដល់កំពូលភ្នំខាងលើ និងមានផ្លូវចាក់បេតុងយ៉ាងស្អាតផងដែរ ។ ចំពោះសន្តិសុខសណ្តាប់ធ្នាប់ និងអនាម័យបរិស្ថានគ្រប់ផ្នែកត្រូវបានធានាដោយកំលាំងសមត្ថកិច្ច និងស្ថាប័នពាក់ព័ន្ធ រួមសហការការពារជូនភ្ញៀវបានយ៉ាងល្អ ។ ប៉ុន្តែលោកបានសំណូមពរចំពោះភ្ញៀវដែលមកកំសាន្តផងដែរ កុំភ្លេចដាក់ប្រដាប់ការពារធាតុត្រជាក់ ដូចជាអាវរងា និងភួយក្រាស់ៗជាដើម ពីព្រោះអាកាសធាតុនៅលើភ្នំបូកគោត្រជាក់ជាងតំបន់រមណីយដ្ឋាននៅខាងក្រោម ។
លោកយ៉ង ភិរម្យ បន្តទៀតថា ឆ្នាំកន្លងមក បុណ្យចូលឆ្នាំចិនមានភ្ញៀវទេសចរទៅកំសាន្តតិចជាងចូលឆ្នាំខ្មែរ ព្រោះពេលនោះផ្លូវនៅមានការខូចខាតជាច្រើនកន្លែង លុះពេលបុណ្យចូលឆ្នាំខ្មែរ ផ្លូវក៏ត្រូវបានធ្វើហើយជាងពាក់កណ្តាល បង្កការងាយស្រួលក្នុងការធ្វើចរាចរណ៍របស់ភ្ញៀវទើបមានភ្ញៀវឡើងទៅកំសាន្តដល់ទៅជាងពីរពាន់រថយន្ត ស្មើនឹងចំនួនមនុស្សគិតជាមធ្យមជាងមួយម៉ឺននាក់ ។ ចំណែកចូលឆ្នាំចិន ចំនួនរថយន្តឡើងទៅកំសាន្តមានតែមួយពាន់គ្រឿង គិតជាមនុស្សជាង៥.០០០នាក់ប៉ុណ្ណោះ ។ ឆ្នាំនេះភ្ញៀវទេសចរអាចកើនឡើងជាងឆ្នាំមុនៗ ពីព្រោះផ្លូវថ្នល់ក៏ល្អហើយភ្ញៀវចង់ទៅមើលការអភិវឌ្ឍន៍របស់ក្រុមហ៊ុនសុខាអូតែល ដែលកំពុងតែអភិវឌ្ឍន៍លើតំបន់រមណីយដ្ឋាននេះផងដែរ ៕
ចែករំលែកព័តមាននេះ