ខេត្តកំពង់ស្ពឺ ៖ រមណីយដ្ឋាន«អំពែភ្នំ»ដែលភ្ញៀវទេសចរធ្លាប់តែមកលេង ហើយដែលគេចាប់អារម្មណ៍ជាងគេនោះ គឺស្ពានយោល ប៉ុន្តែបច្ចុប្បន្ននេះ រមណីយដ្ឋានអំពែភ្នំមិនសូវមានអ្នកមកលេងកំសាន្តនោះទេ ដែលអាចមកពីកត្តាសេដ្ឋកិច្ច និងអាកាសធាតុក្តៅផង ចាប់តាំងបញ្ចប់ជំងឺកូវីដ-១៩នោះមក…
ខេត្តកំពង់ស្ពឺ ៖ រមណីយដ្ឋាន«អំពែភ្នំ»ដែលភ្ញៀវទេសចរធ្លាប់តែមកលេង ហើយដែលគេចាប់អារម្មណ៍ជាងគេនោះ គឺស្ពានយោល ប៉ុន្តែបច្ចុប្បន្ននេះ រមណីយដ្ឋានអំពែភ្នំមិនសូវមានអ្នកមកលេងកំសាន្តនោះទេ ដែលអាចមកពីកត្តាសេដ្ឋកិច្ច និងអាកាសធាតុក្តៅផង ចាប់តាំងបញ្ចប់ជំងឺកូវីដ-១៩នោះមក ។
បើយើងធ្វើដំណើរពីរាជធានីភ្នំពេញ តាមបណ្តោយផ្លូវព្រះមុនីវង្ស កាត់ព្រលានយន្តហោះពោធិ៍ចិនតុង ឆ្លងកាត់ស្ពានអាកាសរង្វង់មូលចោមចៅ តាមបណ្តោយផ្លូវជាតិលេខ៤ ប្រមាណ៤៦គីឡូម៉ែត្រ នៅខាងស្តាំដៃយើងនឹងឃើញមន្ទីរអប់រំយុវជន និងកីឡាខេត្តកំពង់ស្ពឺ ។
បើយើងក្រឡេកមើលខាងឆ្វេងដៃវិញ យើងនឹងបានឃើញផ្លាកដាក់ថា «រមណីយដ្ឋានអំពែភ្នំ» បត់ចូលតាមផ្លូវបេតុងប្រមាណជិត១គីឡូម៉ែត្រ យើងនឹងទៅដល់កន្លែងកំសាន្តអំពែភ្នំហើយ ។ ដោយមានអ្នកលក់ដូរនៅក្នុងរមណីយដ្ឋាននោះ រង់ចាំបក់ដៃហៅភ្ញៀវនៅពេលធ្វើដំណើរតាមម៉ូតូ ឬរថយន្ត ដើម្បីអង្គុយលេងនៅក្នុងខ្យុះរបស់គាត់ និងកុម្មង់ម្ហូបអារហារសម្រាប់ញាំផងដែរ ។
ចំពោះអ្នកភូមិក៏ដូចជាអ្នកលក់ដូរ នៅក្នុងរមណីយដ្ឋានអំពែភ្នំ ពួកគាត់រួសរាយរាក់ទាក់ខ្លាំងណាស់ ហើយខ្យុះពួកគាត់ធ្វើអំពីឈើ ឬដែក ប្រកស្លឹកឬស្បូវ មាននៅជាប់មាត់ស្ទឹងព្រែកត្នោតតែម្តង ងាយស្រួលភ្ញៀវទេសចរសម្រាក លំហែលកាយលេង គ្រាន់បានល្ហែល្ហើយ រំសាយពីការងារ ខ្យល់ឱកាសបរិសុទ្ធបែបធម្មជាតិពិត ។
អ្វីដែលធ្វើឱ្យភ្ញៀវទេសចរនឹកឃើញមុនគេ ហើយចង់ទៅលេងកំសាន្តនៅរមណីដ្ឋានអំពែភ្នំនោះគឺ(ស្ពានយោល) ដែលគេធ្វើអំពីឈើលាយជាមួយដែកឆ្លងកាត់ស្ទឹងព្រែកត្នោតពីត្រើយម្ខាង ទៅត្រើយម្ខាងទៀតដើម្បីទៅអុចធូបនៅវត្តអំពែភ្នំ ដែលគេមានជំនឿរៀងៗខ្លួន ចំពោះអ្នកកាន់សាសនាព្រះពុទ្ធ។ មួយវិញទៀត គឺដើម្បីទៅមើលសត្វស្វាដែលមានប្រមាណជាង៣០០ក្បាល ហើយភ្ញៀវទេសចរខ្លះអាចទិញចំណីទៅឱ្យសត្វស្វាស៊ី មានដូចជាផ្លែចេក និងនំចំណីជាដើម។
ជួបជាមួយអ្នកយកព័ត៌មានលោកតា សុខ អាយុជា៦០ឆ្នាំ បានរៀបរាប់ថា លោកតាជាអ្នកមើលថែនិងដាក់ចំណីឱ្យសត្វដែលចិញ្ចឹមនៅសួនក្នុងរមណីដ្ឋានអំពែភ្នំនេះ មានដូចជាសត្វអូទ្រីស ក្ងោក សត្វក្ងាន សត្វទាសត្វពពែ សត្វចៀម សត្វពស់ថ្លាន់ សត្វជ្រូក។ល។ ក្នុងមួយថ្ងៃដាក់ចំណីឱ្យពួកវាស៊ីចំនួន៣ដង ចំណីបែបធម្មជាតិ ។
ជាមួយគ្នានេះដែរ បងស្រីសុភាព អាយុជាង៥០ និងប្អូនស្រីណាន់ អាយុជិត៤០ឆ្នាំ ជាអ្នកលក់ដូរនៅក្នុងរមណីដ្ឋានអំពែភ្នំ បាននិយាយស្រដៀងគ្នាថា ចាប់តាំងពីផ្ទុះជំងឺកូវីដតាំងពីអំឡុងឆ្នាំ២០១៩ មកដល់ បច្ចុប្បន្ននេះ ស្ងាត់ភ្ញៀវទេសចរខ្លាំងណាស់ មានតិចតួចថ្ងៃសៅរ៍ និងថ្ងៃអាទិត្យ ឬក៏ថ្ងៃបុណ្យជាតិមួយចំនួន ។
រាល់ថ្ងៃពួកគាត់លក់ដូរដាច់តិចតួចគ្រាន់បានទប់ទល់ មានភ្ញៀវខ្លះមកលេងជាលក្ខណៈគ្រួសារ ហើយខ្លះទៀតកុម្មង់ខ្ចប់ទៅហូបខាងក្រៅ ។ ពួកគាត់មានលក់ម្ហូបដូចជា ផ្លិតឃ្មុំអាំង ត្រីស្រែធម្មជាតិ មាន់ ទា អន្ទង់ កង្កែប។ល។ អាចកុម្មង់ធ្វើម្ហូបតាមចំណង់ចំណូលចិត្តរបស់ភ្ញៀវ ហើយតម្លៃវិញសមរម្យ ដែលភ្ញៀវអាចទទួលយកបាន ហើយពួកគាត់ចូលចិត្តមកលេងកំសាន្តនៅរមណីយដ្ឋានអំពែភ្នំនេះ គឺដើរលេងលើស្ពានយោល និងងូតទឹកស្ទឹងថែមទៀតផង ចំពោះភ្ញៀវនៅភ្នំពេញ ឬមកពីខេត្តផ្សេងក៏អ្នកមកលេងកំសាន្តបានផងដែរ ដោយសារតែរមណីយដ្ឋានអំពែភ្នំនេះ មិនឆ្ងាយពីរាជធានីភ្នំពេញឡើយ ប៉ុន្តែ បែរជាសព្វថ្ងៃនេះ រមណីយដ្ឋានអំពែភ្នំ មិនសូវមានអ្នកមកលេងនោះទេ ៕
ចែករំលែកព័តមាននេះ