ខេត្តប៉ៃលិន ៖ ចាប់តាំងពីពាក់កណ្តាលខែកុម្ភៈ ឆ្នាំ២០២៥ រហូតមកដល់ថ្ងៃទី០២ ខែមេសា នេះ គេសង្កេតឃើញមន្ត្រីនៃសាលាខេត្តប៉ៃលិនកំពុងនាំគ្នាមមារញឹកក្នុងការរៀបចំតុបតែង ទាំងនៅលើសួនកុមារ នៅតាមផ្លូវសាធារណៈក្នុងក្រុង…
ខេត្តប៉ៃលិន ៖ ចាប់តាំងពីពាក់កណ្តាលខែកុម្ភៈ ឆ្នាំ២០២៥ រហូតមកដល់ថ្ងៃទី០២ ខែមេសា នេះ គេសង្កេតឃើញមន្ត្រីនៃសាលាខេត្តប៉ៃលិនកំពុងនាំគ្នាមមារញឹកក្នុងការរៀបចំតុបតែង ទាំងនៅលើសួនកុមារ នៅតាមផ្លូវសាធារណៈក្នុងក្រុង និងនៅតាមកន្លែងដែលត្រូវធ្វើកម្មវិធីសង្ក្រាន្ត កន្លែងរាំលេងកម្សាន្ត អបអរសាទរបុណ្យចូលឆ្នាំថ្មីប្រពៃណីជាតិខ្មែរយ៉ាងស្រស់ស្អាតគួរឱ្យចង់គយគន់ ដើម្បីទាក់ទាញភ្ញៀវទេសចរជាតិ និងអន្តរជាតិឱ្យចូលមកលេងកម្សាន្តក្នុងខេត្តប៉ៃលិនកាន់តែច្រើនកុះករ ។
បើតាមប្រភពព័ត៌មានពីប្រជាពលរដ្ឋម្នាក់ឈ្មោះ ម៉ាប់ រស់នៅក្នុងក្រុងប៉ៃលិនបានឱ្យដឹងថា នាឱកាសបុណ្យចូលឆ្នាំថ្មីប្រពៃណីជាតិឆ្នាំ២០២៥ ដែលកាន់តែខិតចូលមកជិតដល់នេះ នឹងបង្កនូវភាពសប្បាយរីករាយកាន់តែខ្លាំង ដោយសារឃើញមន្ត្រីសាលាខេត្តប៉ៃលិន បាននាំគ្នាសស្រាក់សស្រាំរៀបចំតុបតែងដាក់ភ្លើងអគ្គិសនី ជាផ្កាភ្ញី និងដាក់ឆ័ត្ររាប់រយដើមជាច្រើនពណ៌ នៅលើដំបូលរោងដ៏ធំធ្វើកាត់ផ្លូវជាតិ ក្បែរវិមានឯករាជ្យ ដែលបំពាក់ទៅដោយភ្លើងបំភ្លឺចម្រុះពណ៌គួរឱ្យចង់គយគន់ ជាពិសេស នាពេលរាត្រីតែម្តង ។
ប្រភពបន្តទៀតថា មិនត្រឹមតែភ្លើងពណ៌បំភ្លឺប៉ុណ្ណោះ រដ្ឋបាលខេត្តប៉ៃលិន ក៏បានរៀបចំធ្វើរូបសត្វប្លែកៗ ដូចជាសត្វក្ងោក១គូដ៏ធំ ពីដើមផ្កាជ័រ ដែលមានពណ៌លឿង ខៀវ ក្រហម ភ្ជាប់ជាមួយអំពូលភ្លើងអគ្គិសនី ក៏ធ្វើជារូបរាងសត្វដំរីតូចធំ ដ៏គួរឱ្យទាក់ទាញនាពេលយប់ ជាពិសេស ពេលដែលប្រជាពលរដ្ឋនៅក្រុងប៉ៃលិន ចេញដើរលេងកម្សាន្តជាលក្ខណៈគ្រួសារ នាពេលរាត្រី តែងតែថតរូបជួបជុំគ្នា ទុកជាអនុស្សាវរីយ៍ ជាមួយនឹងរូបភាពសត្វទាំងអស់នោះថែមទៀតផង ។
ចំណែកភ្ញៀវទេសចរដែលចូលមកលេងកម្សាន្តនៅក្នុងខេត្តប៉ៃលិន តែងតែលាន់មាត់ពោលសរសើរពីភាពទាក់ទាញ និងសម្រស់ភ្លើងចម្រុះពណ៌នៃទីក្រុងប៉ៃលិន នាពេលយប់ថា ពិតជាទីក្រុងដែលស្អាតគួរឱ្យចង់មកលេងកម្សាន្តម្តងហើយម្តងទៀត ដោយមិនសាំនឹងភ្នែកនោះឡើយ ព្រោះមានទិដ្ឋភាពចម្រុះពណ៌ គ្រប់ទីកន្លែងទូទាំងក្រុងប៉ៃលិន។
លើសពីនេះ គេឃើញមានអ្នកលក់ដូរនៅជុំវិញសួនកុមារ បង្កភាពអ៊ូអរកាន់តែច្រើន ភ្ជាប់ជាមួយនឹងភ្ញៀវទេសចរនាំគ្នា អង្គុយហូបអាហារដែលគេដាក់លក់គ្រប់ប្រភេទមាន សាច់ជ្រូកអាំង សាច់មាន់អាំង សាច់ក្រក នំប៉ាវ នំប៉័ង ព្រមទាំងបង្អែមគ្រប់ប្រភេទដែរ។
បើតាមការរៀបរាប់ពីភ្ញៀវទេចរម្នាក់ ឈ្មោះ រ៉ា ភេទប្រុស មកពីខេត្តបាត់ដំបងបានឱ្យដឹងថា ពួកគាត់ដើរលេងមកខេត្តប៉ៃលិន ជាលក្ខណៈគ្រួសារ ហើយនៅរដូវបុណ្យចូលឆ្នាំថ្មីខាងមុខនេះ ពួកគាត់នឹងធ្វើដំណើរមកលេងម្តងទៀត ដោយធ្វើការកក់ផ្ទះសំណាក់ក្នុងក្រុងប៉ៃលិន ស្នាក់នៅជាលក្ខណៈគ្រួសារ ព្រោះសង្កេតឃើញទិដ្ឋភាពល្អស្រស់ប្លែកភ្នែក ម្យ៉ាងដែរ ដោយមើលទៅភ្លើងពណ៌ចម្រុះត្រូវបានគេតុបតែងភ្លឺពេញផ្លូវគួរឱ្យចង់ទស្សនា និងដើរលេងកម្សាន្តនាពេលយប់។
ក្រោយពេលដើរលេងជាមួយនឹងអ្នកដទៃទៀតរហូតដល់យប់ជ្រៅបន្តិច ក៏នៅតែមានមនុស្សម្នានាំគ្នាដើរលេង ដោយអ្នកខ្លះនៅអង្គុយកម្សាន្តរហូតដល់យប់ជ្រៅ ទើបធ្វើដំណើរទៅផ្ទះរៀងៗខ្លួន ថែមទាំងមានក្រុមសន្តិសុខឈរចាំយាមកាមយ៉ាងមានសុវត្ថិភាពថែមទៀតផង ក្រោមការដឹកនាំរបស់លោកជំទាវ អភិបាលខេត្តប៉ៃលិន៕
ចែករំលែកព័តមាននេះ