ជីវិតដ៏កម្ស.ត់ ! អតីតចាងហ្វាងផលិតកម្ម «វត្តភ្នំ» ពិការភ្នែក ដើរសុំទាន ដើម្បីចិញ្ចឹមប្រពន្ធកូនឈឺ
- ភ្នំពេញ
រាជធានីភ្នំពេញ ៖ ជារឿងនឹកស្មានមិនដល់ និងរំជួលចិត្តយ៉ាងខ្លាំង ក្នុងពេលដែលគេបានឃើញពីស្ថានភាពបច្ចុប្បន្នរបស់អតីតថៅកែផលិតកម្មវត្តភ្នំ គឺលោក ប្រាក់ សារិន បានធ្លាក់ខ្លួនទីទាល់ក្រ រហូតដើរសុំទានគេ ខណៈពេលដែលលោកពិកាភ្នែកអស់រយៈពេលជាច្រើនឆ្នាំមកនេះ ។ អ្នកនិយមទស្សនាភាពយន្តខ្មែរនាទស្សវត្សរ៍ឆ្នាំ ៩០ ជាពិសេសបណ្តាតួសម្តែងចាស់ៗ ប្រាកដជាបានស្គាល់លោក ប្រាក់ សារិន ដែលជាចាងហ្វាងផលិតកម្ម និពន្ធ និងដឹកនាំរឿងតាំងពីឆ្នាំ ១៩៨៧ ។
ទោះជាយ៉ាងណា ក្រោយបាត់មុខអស់ជាច្រើនឆ្នាំ រូបលោកក៏ត្រូវបានដឹងថា បច្ចុប្បន្នជីវិតរស់នៅរបស់លោកកំពុងធ្លាក់ខ្លួនទីទាល់ក្រយ៉ាងខ្លាំង រហូតដើរសុំអាហារតាមវត្តអារាម និងតាមផ្ទះភូមិ ។ បើតាមការសម្ភាសជាមួយអតីតតារាសម្តែងអ្នកស្រី ចាន់ តារាទី កាលពីពេលថ្មីបានអោយដឹងថា អតីតចាងហ្វាង និងជាអ្នកដឹកនាំផលិតភាពយន្ដល្បីឈ្មោះ លោកតា ប្រាក់ សារិន ហៅហុង បច្ចុប្បន្នកំពុងធ្លាក់ខ្លួនលំបាកខ្លាំង ពោលគឺលោកត្រូវដើរសុំអាហារតាមវត្តអារាមដើម្បីទទួលទានប្រចាំថ្ងៃ ។
លោក ប្រាក់ សារិន ហៅហុង ដែលល្បីឈ្មោះនៅអំឡុងឆ្នាំ ១៩៨៧ ជាម្ចាស់ផលិតកម្ម និងជាអ្នកដឹកនាំសម្ដែង បានបញ្ជាក់ថា បច្ចុប្បន្ននេះលោកមានកូនស្រីម្នាក់ក្នុងបន្ទុកដែលមានជំងឺសរសៃប្រសាទ ខណៈប្រពន្ធក៏ដេកឈឺលើកន្ទេល ។ សម្រាប់លោកខ្លួនឯងក៏ធ្លាក់ខ្លួនពិបាកភ្នែកប្រមាណ ១២ឆ្នាំមកហើយ ។
កាលពីថ្ងៃទី ១៧ ខែកក្កដា ឆ្នាំ ២០២៦ លោកតា ប្រាក់ សារិន រួមជាមួយបងប្អូនសិល្បករ-សិល្បការិនីជើងចាស់ជាង ២០នាក់ បានមកទទួលអំណោយពីគ្រួសារសប្បុរសធម៌មួយ ដើម្បីជួយដោះស្រាយការលំបាកបានខ្លះ ។ ក្នុងវ័យកាន់តែចាស់ជរា ជាមួយនឹងភាពពិការ ក្រខ្សត់នោះ លោក ប្រាក់ សារីន សូមអំពាវនាវដល់សប្បុរសជន មេត្តាជួយឧបត្ថម្ភ និងបរិច្ចាគធនធានថវិកាដើម្បីសង្គ្រោះរូបលោក និងគ្រួសារដែលកំពុងជួបការលំបាក ។
ដោយឡែកសម្រាប់តារាសម្តែងអ្នកស្រី ចាន់ តារាទី ក្នុងនាមជាតួសម្តែងម្នាក់ដែលធ្លាប់លោក ប្រាក់ សារិន ហៅមកថតជាតួឯកម្នាក់នោះ ក៏បានធ្វើការអំពាវនាវដល់សប្បុរសជននានាមេត្តាជួយដល់រូបលោកផងដែរ ត្បិតបច្ចុប្បន្នកំពុងទីទាល់ខ្លាំង ជាមួយភាពចាស់ជរា និងពិកាគ្មានអ្វីទីពុំនាក់អាស្រ័យបាននោះទេ ៕
ចែករំលែកព័តមាននេះ