ជីលី ទេវី ថាចេញទៅប្រកួតសម្រស់នៅបរទេសនាងចំណាយជិត៣ម៉ឺនដុល្លារ
- ភ្នំពេញ
រាជធានីភ្នំពេញ៖ តារាសម្តែងកញ្ញាជីលី ទេវី បានទម្លាយឱ្យដឹងថានាងធ្លាប់ចំណាយលុយផ្ទាល់ខ្លួនប្រមាណជិត៣ម៉ឺនដុល្លារ លើការចេញទៅប្រកួតបវរកញ្ញាអន្តរជាតិនាពេលកន្លងមក ។ ដំណឹងនេះធ្វើឲ្យមហាជនចាប់អារម្មណ៍ខ្លាំង ដ្បិតមិននឹកស្មានដល់ថា បេក្ខភាពបវរចេញទៅប្រកួតចំណាយប្រាក់ខ្លួនឯងក្នុងចំនួនច្រើនបែបនេះ ។
កាលពីថ្ងៃទី៤ សីហា ២០២៦ អតីតម្ចាស់មកុដ Miss Grand 2020 កញ្ញាជីលី ទេវី បានបើកកកាយពីការលំបាកមួយចំនួនដែលនាងបានជួបប្រទះ ជាពិសេសគឺការចំណាយលុយខ្លួនឯងយ៉ាងច្រើនក្នុងដំណើរចេញទៅប្រកួតបវរកញ្ញានៅក្រៅប្រទេស ។
ជាមួយរូបភាពអំឡុងពេលចេញទៅប្រកួតបវរកញ្ញានៅក្រៅប្រទេសនាពេលន្លងមក ជីលី ទេវី បានសរសេរលើបណ្តាញសង្គមថា «ជិត៣ម៉ឺនដុល្លារគ្រាន់តែចំណាយទៅលើការប្រកួត លុយផ្ទាល់ខ្លួនឱ្យសុទ្ធ» ។
ការចំណាយលុយផ្ទាល់ខ្លួនប្រមាណជិត៣ម៉ឺនដុល្លារនេះ គឺចំណាយលើការហូបចុក ថ្លៃធ្វើដំណើរ និងថ្លៃអីវ៉ាន់ក្នុងវ៉ាលី រួមទាំងការចំណាយ ផ្សេងៗមួយចំនួនទៀត ។
ទោះជាយ៉ាងណាក្ដីជីលី ទេវី សប្បាយរីករាយ ក្នុងពេលដែលនាងមានឱកាសតំណាងឲ្យប្រទេសកម្ពុជាចេញទៅប្រកួតបវរកញ្ញានៅលើឆាកអន្តរជាតិ បើទោះបីជាការប្រកួតនាពេលកន្លងមកនោះនាងនៅមិនទទួលបានជោគជ័យក៏ដោយ ។
ក្នុងឆាកប្រកួតអន្តរជាតិ ជីលី ជីលី បានការគាំទ្រ និងលើកទឹកចិត្តខ្លាំងពីជនរួមជាតិ ។ ពេលនោះនាងបាននាំយកឈុតតំណាងជាតិទៅបង្ហាញនៅលើឆាកអន្តរជាតិដើម្បីឲ្យពិភពលោកបានស្គាល់កាន់តែច្បាស់ពីធម៌វប្បធម៌ដែលដូនតាយើងបានបន្សល់ទុក ។
កញ្ញាជីលី ទេវី ហៅលីវ ជីលី គឺជាតារាបង្ហាញម៉ូដ និងជាអតីតតំណាងឱ្យប្រទេសកម្ពុជាចូលរួមប្រកួតបវរកញ្ញានៅលើឆាកអន្តរជាតិ ផងដែរ ។ នាងធ្លាប់បានគ្រងតំណែងជា Miss Supranational Cambodia 2023 និងទទួលបានការគាំទ្រយ៉ាងខ្លាំងពីមហាជន ៕
ចែករំលែកព័តមាននេះ