សុតធីតា ប៉ូគីមថេង ចេញមុខសុំទោស ក្រោយអ្នកកាន់ផេកហ្វេសប៊ុកនាង ប្រើពាក្យមិនសមរម្យដាក់អ្នកគាំទ្រ
- ភ្នំពេញ
រាជធានីភ្នំពេញ ៖ តារាសម្តែង និងបេក្ខភាពបវរកញ្ញានាង សុតធីតា ប៉ូគីមថេង បានចេញមុខសុំទោសជាសាធារណះ បន្ទាប់ពីអ្នកកាន់ផេកហ្វេសប៊ុករបស់នាងបានប្រើប្រាស់ភាសាមិនសមរម្យទៅកាន់អ្នកគាំទ្រ ជុំការរិះគន់មួយចំនួន ។
ការចេញមុខសុំទោសពីតារាស្រីរូបនេះបានធ្វើឡើង បន្ទាប់ពីបណ្តាអ្នកលេងបណ្តាញសង្គមមួយចំនួនបានធ្វើចែកចាយបង្ហាញនូវពាក្យពេចន៍នៃការខំមិនមិនល្អឆ្លើយឆ្លងគ្នារវាងនាង និងអ្នកគាទ្រ រហូតធ្វើអោយផ្ទុះកំហឹងដាក់គ្នា ។
យ៉ាងណាជុំវិញរឿងរ៉ាវនេះ ដើម្បីជៀសវាងការយល់ច្រឡំ សុតធីតា ប៉ូគីមថេង បានចេញមុខបកស្រាយ ដោយនៅក្នុងនាងបានសុំទោសជាសាធារណះ ហើយក៏បានបដិសេធថា រាល់ការខំមិនឆ្លើយឆ្លងដោយការប្រើប្រាស់ភាសាមិនល្អនោះមិនមែននាងជាអ្នកធ្វើនោះឡើយ ពោលគឺកើតចេញពីអ្នកកាន់ផេក និងអ្នកមានតួនាទីផ្សេងទៀតរបស់នាងប៉ុណ្ណោះ ។
តាមរយះសំណេរបង្ហោះលើបណ្តាញសង្គមតារាសម្តែងនាង សុតធីតា ប៉ូគីមថេង បានលើកឡើងថា មុននេះបន្តិច នាងខ្ញុំបានទទួលដំណឹងពីការផុសចែកចាយរបស់បងប្អូនអ្នកគាំទ្រ និងអ្នកប្រើប្រាស់បណ្តាញសង្គម ដែលកំពុងមានការខឹងសម្បារលើប្រព័ន្ធអ៊ិនធើណែត លើការ comment ដែលកើតចេញពីអ្នកកាន់ផេកម្នាក់ (Admin)ក្នុងចំណោមអ្នកមានតួនាទីផ្សេងៗក្នុងផេកដទៃទៀតរបស់នាងខ្ញុំ ដោយប្រើប្រាស់ពាក្យពេចន៍ មិនសមរម្យ និងប្រាសចាកសីលធម៌សង្គម។
នាងខ្ញុំសុំទោសទៅកាន់ពុកម៉ែបងប្អូនអ្នកគាំទ្រ ចំពោះបញ្ហាកើតឡើងនេះដោយសូមបញ្ជាក់ថាវាពុំមែនកើតចេញពីរូបនាងខ្ញុំផ្ទាល់ឡើយ ចៀសវាងមហាជនមានការភ័ន្តច្រឡំ និងបង្ហោះសារញុះញុងបន្តទៅមុខក្នុងផ្លូវមិនល្អ។
នាងបញ្ជាក់ថា ក្នុងនាមជាបេក្ខនារីប្រកួតម្នាក់ ដែលរក្សាជំហរលើការតស៊ូមតិក្នុងការទប់ស្កាត់ការមាក់ងាយ ឬរើសអើងលើបណ្តាញសង្គម នាងខ្ញុំបានកំពុងដោះស្រាយដោយផ្ទាល់ជាមួយបុគ្គលដែលជាអ្នកសរសេរ ឬបង្ហោះ ឱ្យបានដឹងពីកំហុស និងបញ្ឃប់ទង្វើបែបនេះតទៅទៀត។
នាងថា នាងខ្ញុំបានដកតំណែងរូបគាត់ចេញពីអ្នកកាន់ផេក (Admin) របស់នាងខ្ញុំហើយចាប់ពីវិនាទីនេះ។
នាងខ្ញុំសង្ឃឹមថាអ្នកគាំទ្រទាំងអស់ នឹងយល់ពីបញ្ហាមួយនេះ ដោយចូលរួមជាមួយនាងខ្ញុំក្នុងការលុបបំបាត់ការមាក់ងាយ ឬរើសអើងលើអ្នកដទៃ។ នាងបន្ថែមថា មេរៀនមួយនេះ បានកំពុងបង្រៀនយើងថា មុនបង្ហោះ ឬចែកចាយគំនិតអ្វីមួយលើបណ្តាញសង្គម «ត្រូវគិតមុននឹងសរសេរ (Think Before You Type)» ហើយនាងខ្ញុំនឹងបន្តបេសកកម្មក្នុងការប្រើប្រាស់សំលេង តស៊ូមតិលើរឿងនេះ ក្នុងដំណើរនៃការប្រកួត Miss Cosmo Cambodia ដើម្បីជាសម្លេងនាំឱ្យមានការផ្លាស់ប្តូរជាវិជ្ជមាននៅក្នុងសហគមន៍ បើទោះបីជារាត្រីនេះនាងខ្ញុំទទួលបានម្កុដ រឺមិនបានក៏ដោយក៏នាងខ្ញុំនៅតែបន្តរបេសកម្មនេះជារាងរហូតដើម្បីជាសំលេងផ្លាស់ប្តូរភាពវិជ្ជមានដល់សង្គមគាំទ្របេក្ខភាពគ្រប់ៗរូបដោយក្តីស្រលាញ់ មិនមែនការខឹងស្អប់!! ។
គួរបញ្ជាក់ថា តារាសម្តែង សុតធីតា ប៉ូគីមថេង បានចូលរួមប្រឡងបវរកញ្ញា Miss Cosmo Cambodia 2026 ដើម្បីសម្រេចគោលដៅរបស់ខ្លួនក្នុងការគ្រងម្កុដ ដើម្បីចេញទៅប្រកួតនៅលើឆាកអន្តរជាតិ ។
យ៉ាងណានៅក្នុងវគ្គបញ្ចប់នោះតារាស្រីរូបនេះមិនបានគ្រងម្កុដតាមបំណងឡើយ ពោលម្ចាស់ម្កុដនៃការប្រឡងបវរកញ្ញាមួយនេះបានទៅលើតារាសម្តែងនាង ប៊ី សុធារី ។
ទោះមិនបានគ្រងម្កុដ ប៉ុន្តែ សុតធីតា ប៉ូគីមថេង បានឈានទៅកាន់វគ្គTOP និងបានទទួលការគាំទ្រ និងលើកសសើរយ៉ាងច្រើនពីមហាជន និងអ្នកគាំទ្រផងដែរ ៕
ចែករំលែកព័តមាននេះ