ខេត្តបាត់ដំបង ៖ ក្មេង៣នាក់ត្រូវកម្លាំងកងរាជអាវុធហត្ថតាមឃាត់ខ្លួនបានភ្លាមៗនៅចំណុចតារាងបាល់ទាត់មួយកន្លែង កាលពីវេលាម៉ោង៥និង៣០នាទីល្ងាច ថ្ងៃទី១៧ មីនា ស្ថិតក្នុងភូមិចម្ការឬស្សី សង្កាត់ព្រែកព្រះស្តេច ក្រុងបាត់ដំបង ក្រោយពីពួកគេបានកាប់ទៅលើភាគីម្ខាងទៀតឲ្យរបួស។
មន្ត្រីកងរាជអាវុធហត្ថបានឲ្យដឹងថា ក្មេងទាំង៣នាក់ ១-ឈ្មោះ ហេង សំណាង ហៅប៉ៃណៃ ភេទប្រុស អាយុ១៨ឆ្នាំ ២-ឈ្មោះ អៀប ភីណា ភេទប្រុស អាយុ១៦ឆ្នាំ ជាសិស្ស ទាំង២នាក់រស់នៅភូមិព្រែកព្រះស្តេច សង្កាត់ព្រែកព្រះស្តេច ក្រុងបាត់ដំបង និង៣-ឈ្មោះ ណាត់ គឹមហួរ ភេទប្រុស អាយុ១៧ឆ្នាំ ជាសិស្ស រស់នៅភូមិស្រែប្រាំង ឃុំនរា ស្រុកសង្កែ ចំណែកក្មេងរងគ្រោះឈ្មោះ ឃុន រ៉ាដន ភេទប្រុស អាយុ១៤ឆ្នាំ ជាសិស្សរស់នៅភូមិច្រាបវាល ឃុំអន្លង់វិល ស្រុកសង្កែ ។
មន្ត្រីដដែលបានបន្តថា ក្មេងទាំង៣នាក់នេះ បានយកដាវសាំម៉ូរ៉ៃកាប់ និងវាយទៅលើជនរងគ្រោះ បណ្តាលឲ្យដាច់កូនដៃខាងឆ្វេងនៅក្បែរវិទ្យាល័យនេតយ៉ង់ ប៉ុន្តែក្រោយពីកាប់ឲ្យរបួស ក្រុមនេះព្យាយាមជិះម៉ូតូគេចខ្លួនតែម្ដង តែមន្ត្រីជំនាញតាមស្រាវជ្រាវ ទើបប្រទះឃើញក្រុមនេះកំពុងសម្ងំមើលគេទាត់បាល់នៅក្លិប កូកូ នៅចំណុចខាងលើ ក៏ឃាត់ខ្លួន និងដកហូតបានដាវ២ដើមទៀតផង។ ហើយពេលនេះមន្ត្រីជំនាញកំពុងសួរនាំក្មេងទាំង៣នាក់ ដើម្បីកសាងសំណុំរឿងបញ្ជូនទៅតុលាការហើយ ។
កោះសន្តិភាពមិនទាន់ទទួលបានចម្លើយពីភាគីណាមួយនៅឡើយទេ រហូតដល់ពេលនេះ ព្រោះមន្ត្រីជំនាញកំពុងសាកសួរនៅឡើយ។ ប៉ុន្តែបើតាមប្រភពព័ត៌មានឲ្យដឹងថា ភាគីទាំង២រៀននៅសាលាផ្សេងគ្នា ហើយការប្រើហឹង្សាកាប់ចាក់គ្នានេះ ដោយសារក្រុមក្មេងទាំង២ភាគីនេះធ្លាប់មានជម្លោះនឹងគ្នា។ ហើយពួកគេសុទ្ធតែជាក្រុមបងតូច បងធំប្រចាំសាលារៀងៗខ្លួន ដូច្នេះហើយទើបខ្លាំងរៀងៗខ្លួនដែរ៕
ចែករំលែកព័តមាននេះ