រាជធានីភ្នំពេញ ៖ ដោយសារតែស្រឡាញ់កីឡាបាល់ទាត់ នារីវ័យក្មេងមួយចំនួនសុខចិត្តបោះបង់ចោលការសិក្សាមកហាត់កីឡាមួយនេះតាមក្លិបឬអង្គការនានារហូតក្លាយជាកីឡាការិនីប្រចាំក្លិបឬអង្គការនោះនិងមានឱកាសតំណាងឱ្យកម្ពុជាចេញប្រកួតទាំងក្នុងស្រុកនិងក្រៅស្រុកទទួលបានទាំងថវិកានិងកេរ្ដិ៍ឈ្មោះហើយអ្នកខ្លះក្លាយជាអ្នកគ្រប់គ្រងនៅក្នុងក្លិបបាល់ទាត់នារីទៀតផង ។
ទោះបីយ៉ាងណា ការចូលលេងបាល់ទាត់របស់នារីវ័យក្មេងទាំងនោះភាគច្រើនហាក់មិនទទួលបានការគាំទ្រពីសំណាក់ក្រុមគ្រួសារឡើយ ជាពិសេសឪពុកម្ដាយរបស់ពួកគេតែម្ដងដោយសារតែពួកគាត់យល់ឃើញថា នារីលេងបាល់ទាត់មិនមានអនាគតល្អនោះទេទើបធ្វើឱ្យការបង្កើតក្រុមបាល់ទាត់នារីជួបការលំបាកយ៉ាងខ្លាំង ។ តើការយល់ឃើញរបស់ឪពុកម្ដាយកីឡាការិនីបែបនេះពិតជាត្រឹមត្រូវឬយ៉ាងណា?
ជួបអ្នកសារព័ត៌មានកោះសន្តិភាព កញ្ញាស៊ុន ដាឡែន អាយុ២៦ឆ្នាំ ជាអ្នកគ្រប់គ្រងក្រុម
បាល់ទាត់នារីភ្នំពេញក្រោន ប្រាប់ថា សព្វថ្ងៃនេះមិនមែនតែរូបនាងទេដែលស្រឡាញ់ចូលចិត្តបាល់ទាត់ គឺនៅមានក្មេងស្រីជាច្រើននាក់ទៀតដែលស្រឡាញ់ចូលចិត្តដូចរូបនាងដែរ។ ប៉ុន្តែដោយសារតែពេលវេលាមិនអំណោយផលម្យ៉ាងដោយសារតែមានភាពរើសអើងនៅក្នុងក្រុមគ្រួសារ ជាពិសេសឪពុកម្ដាយរបស់ពួកនាងច្រើនតែគិតថា ការចាប់យកអាជីពជាកីឡាការិនីបាល់ទាត់គឺគ្មានអនាគតល្អនោះទេ ។
ពាក់ព័ន្ធនឹងការលើកឡើងនេះដែរ កញ្ញា ស៊ុន ដាឡែន បានប្រាប់ពីការយល់ឃើញរបស់ខ្លួនថា នារីលេងបាល់ទាត់គ្មានអ្វីអាក្រក់នោះទេ ផ្ទុយទៅវិញឱ្យតែនារីនោះព្យាយាមគង់តែមានផលល្អទៅថ្ងៃក្រោយទេ ។ ជាក់ស្ដែង រូបនាងតែម្ដងគឺស្រឡាញ់ចូលចិត្តកីឡាបាល់ទាត់តាំងពីនៅតូចៗម្ល៉េះ ឱ្យតែមានកម្មវិធីប្រកួតតាមសាលាម្ដងៗនាងគឺជាមនុស្សទី១ហើយដែលបានទៅដល់ទីលានប្រកួតមុនគេ ។ កញ្ញាថា គ្រាន់តែប្រឡងធ្លាក់បាក់ឌុបនៅឆ្នាំ២០១២ភ្លាម នាងបានសម្រេចចិត្តចូលហាត់បាល់ទាត់តាំងពីពេលនោះមក ។ រហូតដល់ឆ្នាំ២០១៥ នាងបានចូលលេងនៅក្នុងក្លិបបាល់ទាត់ភ្នំពេញក្រោន ហើយក្រុមរបស់នាងបានឈ្នះពានRSNជាលើកដំបូង ក្នុងចំណោម៤ក្រុមដែលចូលរួមប្រកួតប្រជែង ។ កាលនាងនៅលេងគឺស្ថិតក្នុងតំណែងខ្សែប្រយុទ្ធ និងបម្រើ-ប្រយុទ្ធ ។
ក្រោយមក ដោយសារតែថ្នាក់ដឹកនាំនៅក្នុងក្លិបបាល់ទាត់ភ្នំពេញក្រោនមើលឃើញរូបនាងមានការយល់ដឹងច្រើនពីបច្ចេកទេសលេងបាល់ព្រមទាំងមានការតស៊ូព្យាយាមនៅក្នុងអាជីពមួយនេះទៀតផងនោះ គេក៏សម្រេចជ្រើសរើសយកនាងឱ្យបម្រើការនៅក្នុងក្លិបបាល់ទាត់ភ្នំពេញក្រោនរហូតដល់សព្វថ្ងៃនេះក្នុងឋានៈជាអ្នកគ្រប់គ្រងកីឡាបាល់ទាត់នារី។
កញ្ញា ស៊ុន ដាឡែន បានប្រាប់ទៀតថា ការលេងបាល់ទាត់មិនត្រឹមតែធ្វើឱ្យយើងទទួលបានផលប្រយោជន៍ផ្នែកសុខភាពប៉ុណ្ណោះនោះទេ គឺថែមទាំងធ្វើឱ្យយើងមានភាពសប្បាយរីករាយ បំបាត់ភាពស្ត្រេស ហើយបានស្គាល់មិត្តភក្ដិច្រើនទៀតផង ។ កញ្ញាថា នៅក្នុងក្លិបបាល់ទាត់ភ្នំពេញក្រោនសព្វថ្ងៃមានក្រុមបាល់ទាត់នារីតែ១ក្រុមប៉ុណ្ណោះដែលកំពុងហ្វឹកហាត់ជាប្រចាំរៀងរាល់ល្ងាច និងបានចូលរួមប្រកួតជ្រើសរើសជើងឯកបាល់ទាត់នារីប្រចាំឆ្នាំ២០១៧កន្លងទៅនេះជាមួយ៧ក្រុមផ្សេងទៀត ប៉ុន្តសំណាងអាក្រក់ក្រុមនាងបានធ្លាក់តាំងពីវគ្គជម្រុះមកម្ល៉េះ ។ មកដល់ពេលនេះនៅសល់តែក្រុមខ្លាំងៗចំនួន៤ដែលត្រូវឡើងទៅប្រកួតខ្វែងនៅវគ្គពាក់កណ្ដាលផ្ដាច់ព្រ័ត្រនិងផ្ដាច់ព្រ័ត្រជាបន្តទៀតដែលមានដូចជាក្រុមខេត្តកំពង់ស្ពឺលេខ១ពូលBប្រកួតជាមួយក្រុមខេត្តកំពង់ធំលេខ២ពូលA និងក្រុមខេត្តស្វាយរៀងលេខ២ពូលB ប្រកួតជាមួយក្រុមខេត្តបាត់ដំបងលេខ១ពូលA។
លោកនាយឧត្តមសេនីយ៍សៅ សុខា ប្រធានសហព័ន្ធកីឡាបាល់ទាត់កម្ពុជា ដែលបាននិងកំពុងយកចិត្តទុកដាក់យ៉ាងខ្លាំងក្នុងការជំរុញឱ្យវិស័យកីឡាបាល់ទាត់កម្ពុជាមានការរីកចម្រើនដូចប្រទេសជិតខាង តាមរយៈការបណ្ដុះកីឡាករថ្នាលគ្រប់កម្រិត ក្នុងនោះក៏មានបាល់ទាត់នារីផងដែរនោះ ធ្លាប់មានប្រសាសន៍ថា ការជ្រើសរើសនារីឱ្យចូលហ្វឹកហាត់បាល់ទាត់នេះជួបការលំបាកខ្លាំងណាស់មិនដូចបុរសនោះទេ ដោយសារតែមានការរើសអើង និងជំទាស់ពីក្រុមគ្រួសាររបស់ពួកគេតែម្ដង៕
ចែករំលែកព័តមាននេះ