ខេត្តបាត់ដំបង ៖ សហភាពសហព័ន្ធយុវជនកម្ពុជា នឹងសហការជាមួយអាជ្ញាធរខេត្ត ដើម្បីបង្កើតព្រិត្តិការណ៏សង្ក្រានក្នុងទ្រង់ទ្រាយដ៍ធំមួយឈ្មោះ<<សង្ក្រាន្តបាត់ដំបង២០១៨>> នៅក្នុងឱកាសបុណ្យចូលឆ្នាំថ្នីប្រពៃណីខ្មែរនាពេលខាងមុខនេះ ដែលមានរយះពេល៤ថ្ងៃនៅក្នុងក្រុងបាត់ដំបង។ នេះបើតាមការថ្លែងរបស់លោកស សុខា អនុប្រធានសហភាពសហព័ន្ធយុវជនកម្ពុជា។…
ខេត្តបាត់ដំបង ៖ សហភាពសហព័ន្ធយុវជនកម្ពុជា នឹងសហការជាមួយអាជ្ញាធរខេត្ត ដើម្បីបង្កើតព្រិត្តិការណ៏សង្ក្រានក្នុងទ្រង់ទ្រាយដ៍ធំមួយឈ្មោះ<<សង្ក្រាន្តបាត់ដំបង២០១៨>> នៅក្នុងឱកាសបុណ្យចូលឆ្នាំថ្នីប្រពៃណីខ្មែរនាពេលខាងមុខនេះ ដែលមានរយះពេល៤ថ្ងៃនៅក្នុងក្រុងបាត់ដំបង។ នេះបើតាមការថ្លែងរបស់លោកស សុខា អនុប្រធានសហភាពសហព័ន្ធយុវជនកម្ពុជា។
លោកស សុខា បានមានប្រសាសន៍បែបនេះទៅកាន់អ្នកសារព័ត៌មាននិងសិស្សនិស្សិតរាប់រយនាក់ ក្នុងកម្មវិធីសន្និសីទស្ដីពីព្រិត្តិការណ៍<<សង្ក្រាន្តបាត់ដំបង២០១៨>>ដែលធ្វើឡើងនៅសាកលវិទ្យាល័យវិទ្យល័យបាត់ដំបង កាលពីព្រឹកថ្ងៃទី១២មិនា។ លោកអនុប្រធាន ស.ស.យ.ក រូបនេះបានថ្លែងទៀតថា ក្រុមយុវជនខេត្តបាត់ដំបង នឹងសហការជាមួយអាជ្ញាធរខេត្ត ដើម្បីរៀបចំព្រឹត្តិការណ៍សង្ក្រាន្តដ៏ធំបំផុតនេះ ជាលើកដំបូង នៅក្នុងក្រុងបាត់ដំបង ដែលមានរយៈពេល៤ថ្ងៃ គឺចាប់ពីថ្ងៃទី១៣ ដល់១៦ ខែមេសា
២០១៨ ដើម្បីទទួលទេវត្តាឆ្នាំថ្មី (ឆ្នាំច) ។
នៅក្នុងសន្និសីទនោះ លោកស សុខា បានបញ្ជាក់ថា នេះជាការរៀបចំព្រិត្តិការណ៏សង្ក្រាន្តដ៏ធំ ដើម្បីអបអរទទូលទេវតាឆ្នាំថ្មី ក្នុងឱកាសបុណ្យចូលឆ្នាំថ្មីប្រពៃណីខ្មែរ ដែលខេត្តបាត់ដំបងយើងមិនធ្លាប់បានធ្វើនាពេលកន្លងមក។ ហើយនេះក៏ជាការឆ្លើយតបទៅនឹងសំណូមពររបស់ប្រជាពលរដ្ឋក្នុងខេត្ត ដែលទទូចសុំឲ្យខាង ស.ស.យ.កនិងអាជ្ញាធរខេត្ត រៀបចំវិធីនេះដែរ។ ព្រោះកន្លងមកពួកគាត់បានតែងលើកឡើងអំពីបញ្ហាប្រឈមមួយចំនួន ពេលទៅលេងអង្គរសង្ក្រាន្តម្ដងៗ។ ត្រង់ចំណុចនេះលោកស សុខា បានស្រង់សំដីពលរដ្ឋថា ពេលពួកគាត់ទៅលេងអង្គរសង្ក្រាន្តនៅខេត្តសៀមរាបម្ដងៗ ត្រូវធ្វើដំណើរឆ្ងាយ ហើយពិបាករកកន្លែងស្នាក់នៅព្រមទាំងទំនិញ ម្ហូបអាហារ និង កន្លែងស្នាក់នៅមានតំលៃខ្ពស់ទៀតផង។ ដូច្នេះហើយទើបឆ្នាំនេះ ស.ស.យ.ក សហការជាអាជ្ញាធរខេត្តរៀបចំឲ្យមានព្រិត្តិការណ៍សង្ក្រាននេះឡើង។
ពិសេសជាងនេះទៅទៀត បើតាមលោកស សុខា ថា ព្រឹត្តិការណ៍នេះក៏ជាការប្រមូលផ្ដុំយុវជននៅតាមបណ្ដាស្រុកនានា ក្នុងខេត្តនាំយកមកនូវផលិតផល ម្ហូបអាហាររបស់ប្រចាំតំបន់ ឬរបស់តំណាងស្រុកខ្លួនមកដាក់តាំងក្នុងកម្មវិធី បង្ហាញជូនភ្ញៀវជាតិ និងអន្តរជាតិ ដែលបានមកលេងកម្សាន្តឲ្យបានដឹង និងស្គាល់ ។ មិនត្រឹមតែប៉ុណ្ណោះ កម្មវិធីក៏មានដាក់តាំងផ្លែម្នាស់ដ៏ធំកម្ពស់៥ម៉ែត្រ ដោយយកផ្លែម្នាស់ជាង៤,០០០ផ្លែមកផ្គុំចូលគ្នា និងផ្លែពោតកម្ពស់ ៥ម៉ែត្រដែលយកផ្លែពោតជិត១ម៉ឺនផ្លែ មកផ្គុំចូលគ្នាតែមួយ។
ជាមួយនឹងការធ្វើសន្និសីទស្ដីពីព្រិត្តិការណ៏<<សង្ក្រាន្តបាត់ដំបង២០១៨>> នៅព្រឹកថ្ងៃដដែលនេះ ក្រុមសហភាពសហព័ន្ធយុវជនកម្ពុជាខេត្តបាត់ដំបង ដែលមានលោកស រដ្ឋា ជាប្រធាន និងលោកស សុខា អនុប្រធានសហភាពសហព័ន្ធយុវជនកម្ពុជា ទទូលបន្ទុកខេត្តព្រៃវែង ខេត្តបន្ទាយមានជ័យ និងខេត្តបាត់ដំបង រួមទាំងអាជ្ញាធរខេត្ត និងមន្ត្រីមួយចំនួនផង បានធ្វើពិធីក្រុងពិលីបួងសួងនៅចំពោះមុខរូបសំណាកលោកតាដំបងគ្រញូង ដើម្បីសុំសេចក្ដីសុខសប្បាយ ក្នុងឱកាសរៀបចំសង្ក្រាន្តឆ្នាំថ្មី ដើម្បីចូលរួមអបអរពិធីចូលឆ្នាំថ្មីប្រពៃណីខ្មែរនាពេលខាងមុខនេះ។
ជាមួយគ្នានេះ លោកស រដ្ឋា ប្រធានសហភាពសហព័ន្ធយុវជនកម្ពុជាខេត្តបាត់ដំបងក៏បានឲ្យដឹងដែរថា ព្រឹត្តិការណ៏សង្ក្រាន្តបាត់ដំបង២០១៨ នេះនឹងរៀបចំធ្វើឡើងនៅក្នុងបរិវេណ សាលាវិទ្យាល័យនេតយ៉ង់,មជ្ឍមណ្ឌលគរុកោសល្យភូមិភាគ និងនៅលើដងផ្លូវនានា ក្បែររង្វង់មូលលោកតាដំបងគ្រញូង ក្នុងក្រុងបាត់ដំបង។ បើតាមលោកស រដ្ឋា បានបញ្ជាក់ថា ក្រៅពីការដាក់តាំងផលិតផល ឬ ទំនិញផ្សេងៗ នៅក្នុងពិធីនេះក៍មានការរៀបចំឲ្យលេងល្បែងប្រជាប្រីយនានាដែលជាប្រពៃណីខ្មែរ និងការប្រគុំតន្ត្រីដ៏ធំជាប្រចាំដែលមានតារាចម្រៀងល្បីៗមកច្រៀង និងសម្ដែងជួនកំសាន្តផងដែរ។
នៅក្នុងព្រិត្តិការដ៏ធំមិនធ្លាប់មាននេះ បើតាមលោកសសុខា អនុប្រធានស.ស.យ.ក កម្ពុជាបានបញ្ជាក់ថា សង្ក្រាន្តបាត់ដំបង២០១៨នេះស.ស.យ.ក ខេត្តបាត់ដំបង គ្រោងនឹងចំណាយថវិកាប្រមាណចន្លោះពី២០ទៅ២៥ម៉ឺនដុល្លារ ឬ អាចបន្ថែមលើសពីនេះទៅតាមកម្មវិធីជាក់ស្ដែង។ ហើយលោករំពឹងថា នឹងមានមនុស្សចូលរូមកំសាន្តចន្លោះពី១៥ម៉ឺនទៅ១៦ម៉ឺននាក់។ ប៉ុន្តែលោកមិនបានប្រាប់អំពីគម្រោងជាក់លាក់ នៃការរៀបចំព្រឹត្តិការណ៏ជារៀងរាល់ឆ្នាំនោះទេ ដោយលោកគ្រាន់តែបញ្ជាក់ប្រាប់ថា វាអាស្រ័យលើកិច្ចសហការរបស់អាជ្ញាធរខេត្ត ដែលជាម្ចាស់ទឹកដីជាអ្នកសម្រេច ។
ចែករំលែកព័តមាននេះ