ខេត្តបាត់ដំបង ៖ កម្លាំងសមត្ថកិច្ចចម្រុះដែលមានភារកិច្ចការពារតាមបន្ទាត់ព្រំដែនកម្ពុជា ថៃ បាននិងកំពុងបន្តតាមស្វែងរកចាប់ខ្លួនមេខ្យល់នាំមនុស្សឆ្លងដែនខុសច្បាប់ និងរារាំងពលរដ្ឋខ្មែដែលចាញ់បោកមេខ្យល់ បន្ទាប់ពីកម្លាំងចម្រុះនេះ បានធ្វើការទប់ស្កាត់ពលករខ្មែរជាង១២០នាក់ ដែលប៉ុនប៉ងឆ្លងដែនតាមការអូសទាញរបស់មេខ្យល់នាំចេញទៅប្រទេសថៃ ហើយថែមទាំងបានចាប់ខ្លួនមេខ្យល់ម្នាក់ផងបញ្ជូនទៅតុលាការ ។ នេះបើតាមលោក ដាញ់ អេងប៊ុនចាន់ ស្នងការខេត្តបានផ្ដល់ព័ត៌មាននេះ ។
លោក ដាញ់ អេងប៊ុនចាន់ ស្នងការខេត្តបានថ្លែងប្រាប់កោះសន្តិភាពនៅព្រឹកថ្ងៃទី២៣ មេសា នេះថា កម្លាំងជំនាញនៃស្នងការខេត្ត រួមសហការជាមួយកម្លាំងចម្រុះការពារតាមបន្ទាត់ព្រំដែនកម្ពុជា-ថៃផង បានធ្វើការទប់ស្កាត់ទាន់ពេលវេលាចំពោះប្រជាពលរដ្ឋខ្មែរមានប្រុស មានស្រី និងកុមារផង បានជាង១២០នាក់ កំពុងលាក់ខ្លួននៅក្នុងស្រុកកំរៀង ដែលមេខ្យល់បំរុងនាំឆ្លងដែនដោយខុសច្បាប់ចេញទៅប្រទេសថៃ ។លោកស្នងការបានបញ្ជាក់ជាមួយនឹងការទប់ស្កាត់នេះថា សមត្ថកិច្ចយើងក៏បានឃាត់ខ្លួនមេខ្យល់ម្នាក់ដែរ ដើម្បីចាត់ការតាមនីតិវិធី ។
យោងតាមរបាយការណ៍របស់សមត្ថកិច្ចដែលកោះសន្តិភាព ទើបទទូលបាននៅព្រឹកថ្ងៃទី ២៣ មេសា នេះ បានឲ្យដឹងថា ពលរដ្ឋខ្មែរប្រមាណ១២១នាក់ ក្នុងនោះ មានស្ត្រីចំនួន៤៩នាក់ និងមានកុមារចំនួន០៥នាក់ផង ត្រូវបានគេមេខ្យល់ដឹកជញ្ជូននាំយកទៅលាក់ទុកផ្ដុំគ្នានៅក្នុងដីឡូត៍មួយកន្លែង ក្បែរអូរព្រំដែនកម្ពុជា-ថៃ ស្ថិតក្នុងភូមិស្វាយចេក ឃុំបឹងរាំង ស្រុកកំរៀងក្នុងគោលបំណងត្រៀមបញ្ជូនឆ្លងដែនដោយខុសច្បាប់ចេញទៅប្រទេសថៃ ។
កិច្ចប្រតិបត្តិការដោយកម្លាំងចម្រុះនោះ បានគេបានឃាត់ខ្លួនមេខ្យល់ម្នាក់ភ្លាមៗជាមួយនឹងរថយន្តសម្រាប់ដឹកជញ្ជូនចំនួន០៣គ្រឿងទៀត ។ ប៉ុន្តែអ្នកបើកបររថយន្តចំនួន០២នាក់ បានរត់រួចចោលរថយន្ត ។
រថយន្តទាំង០៣គ្រឿង ដែលជាមធ្យោបាយសម្រាប់ដឹកជញ្ជូនមនុស្សឆ្លងដែនដែលត្រូវសមត្ថកិច្ចរឹបអូសយកនោះមាន ៖ ១-រថយន្តម៉ាក ហាយឡិនឌ័រ ពណ៌.ស ពាក់ស្លាកលេខភ្នំពេញ BQ-9441 ២-រថយន្តម៉ាកកាមេរី (បាឡែន) ពាក់ស្លាកលេខ សៀមរាប 2A-6728 និង៣-រថយន្តម៉ាកកាមេរី ពាក់ស្លាកលេខ បាត់ដំបង 2B-9747 ។ រថយន្តទាំងនេះ ត្រូវបានរឹបអូស រីឯមនុស្សជាង១២០នាក់ ត្រូវបានអប់រំ ហើយបញ្ជូនឲ្យទៅកាន់ស្រុកកំណើតវិញ ។
ពាក់ព័ន្ធនឹងការនាំមនុស្សឆ្លងដែនខុសច្បាប់ចេញទៅប្រទេសថែនេះ បើតាមប្រភពព័ត៌មាននានាដែលដឹងរឿងច្បាស់បានរាយការណ៍ថា ភូមិស្វាយចេកដែលជាជម្រកលាក់ខ្លួនរបស់ពលរដ្ឋខ្មែរជាង១២០នាក់ខាងលើនេះ មានភូមិសាស្ត្រជាប់អូរព្រំដែនកម្ពុជា-ថៃ ដែលមានអំណោយផលបំផុតសម្រាប់ជនទុច្ចរិតរត់ពន្ធមនុស្ស ឬរត់ពន្ធទំនិញឆ្លងដែន ។
ប្រភពដដែលបាននិយាយថា នៅតំបន់នោះមានច្រករបៀងចំនួន០៣ ដែលពួកជនទុច្ចរិតតែងលួចបញ្ជូនមនុស្សឆ្លងដែន ។ ហើយវាស្ថិតមិនឆ្ងាយប៉ុន្មានទេ ពីច្រករបៀង ដែលពួកជនទុច្ចរិតរត់ព័ន្ធបារីឆ្លងដែនកាលពីខែមុន ។ ប្រជាពលរដ្ឋខ្មែរជាង១២០នាក់ ដែលមេខ្យល់ដឹកជញ្ជូនយកទៅលាក់ទុកនៅក្នុងភូមិស្វាយចេក ក្បែរអូរព្រំដែនខាងលើនេះ គឺពួកមេខ្យល់បំរុងនាំឆ្លងអូរព្រំដែនចេញទៅប្រទេសថៃ តាមច្រកទាំង០៣ខាងលើនេះហើយ ។
យ៉ាងណាក្ដី បើតាមលោក ដាញ់ អេងប៊ុនចាន់ ស្នងការខេត្តបាត់ដំបងបានបញ្ជាក់ដែរថា ពេលនេះ កម្លាំងជំនាញ បានចុះអន្តរាគមន៍ទប់ស្កាត់ទាន់ពេលវេលា មុនពេលពួកគេឆ្លងដែន ហើយថែមទាំងចាប់ខ្លួមមេខ្យល់បានម្នាក់ផង ។ ពេលនេះ កម្លាំងសមត្ថកិច្ចចម្រុះ ដែលមានភារកិច្ចការពារតាមបន្ទាត់ព្រំដែនកម្ពុជា ថៃ ក្នុងភូមិសាស្ត្រ ខេត្តបាត់ដំបង បាននិងកំពុងតាមស្រាវជ្រាវស្វែងរកមេខ្លោងនាំមនុស្សឆ្លងដែន និងចុះត្រូតពិនិត្យក្នុងភូមិសាស្ត្រនានា ដើម្បីស្វែងរកប្រជាពលរដ្ឋដែលចាញ់បោកមេខ្យល់ ។
ដោយឡែក ចំពោះប្រជាពលរដ្ឋចំនួន១២១នាក់ ត្រូវបានធ្វើការអប់រំ និងបញ្ជូនពួកគេត្រឡប់ទៅស្រុកកំណើតវិញអស់ហើយ នៅឡើយមេខ្យល់ម្នាក់ដែលត្រូវចាប់ខ្លួន ក៏ត្រូវបានបញ្ជូនទៅកាន់អយ្យការចាត់ការតាមនីតិវធីហើយដែរ ៕
ចែករំលែកព័តមាននេះ