រាជធានីភ្នំពេញ ៖ កម្មវិធីប្រកួតប្រដាល់នៅលើសង្វៀនទូរទស្សន៍MyTVនាថ្ងៃសុក្រទី៩ មីនា នេះប្រជុំដោយជើងខ្លាំងជាច្រើនគូ ក្នុងនោះគូអន្តរជាតិទទួលបានការចាប់អារម្មណ៍ជាងគេ ។ កីឡាករកម្ពុជា កូយ ឡាយ…
រាជធានីភ្នំពេញ ៖ កម្មវិធីប្រកួតប្រដាល់នៅលើសង្វៀនទូរទស្សន៍MyTVនាថ្ងៃសុក្រទី៩ មីនា នេះប្រជុំដោយជើងខ្លាំងជាច្រើនគូ ក្នុងនោះគូអន្តរជាតិទទួលបានការចាប់អារម្មណ៍ជាងគេ ។
កីឡាករកម្ពុជា កូយ ឡាយ មកពីក្លិបទ័ពពិសេសឆត្រយោង៩១១ និងកីឡាករ សួន ចាន់នី មកពីក្លិបបក្សីស្លាបដែកបានក្លាយជាសមាសភាពគូអន្តរជាតិត្រូវប្រកួតជាមួយកីឡាករថៃនៅថ្ងៃនោះ ។ អ្នកនិយមទស្សនាកីឡាប្រដាល់កំពុងតែទន្ទឹងរង់ចាំមើលថាតើកីឡាករកម្ពុជាទាំង២រូបនេះអាចសម្រេចគោលដៅរបស់ខ្លួនឬយ៉ាងណា ខណៈកីឡាករថៃដែលពួកគេត្រូវជួបហាក់មានសមត្ថភាពខ្លាំងពិបាកផ្ដួលអ៊ីចឹងនោះ។
កីឡាករ កូយ ឡាយ ដែលមានប្រវត្តិប្រកួត៤៦ដង ឈ្នះ៣៩ដង ចាញ់៥ដង ស្មើ២ដង និងផ្ដួលគូប្រកួតឱ្យសន្លប់១០ដង ត្រូវបានគេរៀបចំឱ្យជួបប្រកួតជាមួយកីឡាករថៃឈ្មោះឃុំភិត ផ.ភិតសាយឈុន ដែលធ្លាប់ប្រកួត៧០ដង ឈ្នះ៥៥ដង ចាញ់១៣ដង ស្មើ២ដង និងធ្លាប់ផ្ដួលគូប្រកួតឱ្យសន្លប់២០ដង ។ កូយ ឡាយ ដែលបានបាត់មុខពីលើសង្វៀនរាងយូរក្រែលដែរមកហើយនោះមិនដឹងថាអាចស៊ូប្រកួតជាមួយកីឡាករថៃបានឬអត់នោះទ ។ ម្យ៉ាងវិញទៀតបើផ្អែកលើប្រវត្តិប្រកួតវិញនោះ កាន់តែពិបាកទុកចិត្តថែមទៀត ។ ចាំមើល កូយ ឡាយ អាចតស៊ូប្រកួតជាមួយអ្នកប្រដាល់ជើងខ្លាំងថៃម្នាក់នេះបានដល់ទឹកទី៥ឬអត់?
មួយគូទៀត កីឡាករ សួន ចាន់នី ធ្លាប់ប្រកួត១០៣ដង ឈ្នះ៨១ដង ចាញ់១៨ដង ស្មើ៤ដង និងធ្លាប់ផ្ដួលគូប្រកួតឱ្យសន្លប់៣៧ដង ត្រូវជួបប្រកួតជាមួយកីឡាករថៃឈ្មោះលីងលំ ប៉.យុទ្ធ ភូមិ ។ កីឡាករថៃរូបនេះធ្លាប់ប្រកួតបាន៧០ដង ឈ្នះ៥០ដង ចាញ់១៥ដង ស្មើ៥ដង និងធ្លាប់ផ្ដួលគូប្រកួតឱ្យសន្លប់បាន១៥ដង ។
យោងតាមប្រវត្តិ កីឡាករទាំងពីរអាចស៊ីសងគ្នាបាន ទើបពិបាកប៉ាន់ស្មានមិនដឹងថាអ្នកណានឹងក្លាយជាអធិរាជនៅលើសង្វៀនមួយនេះ។ ចំណែកគូប្រកួតមិត្តភាពធម្មតាវិញ កីឡាករ ណែម ហៀង មកពីក្លិបតាព្រហ្មមានជ័យ ប្រកួតជាមួយកីឡាករ ញ៉ាញ់ លីប៉េង មកពីក្លិបគុហារព្រហ្មមានជ័យ ខេត្តសៀមរាប ។ កីឡាករ គួនសុវណ្ណ មកពីក្លិបយុវវាលស្បូវ ខណ្ឌច្បារអំពៅប្រកួតជាមួយកីឡាករ ហូ សុភា មកពីក្លិបឃ្លាំងមឿងកីឡា។
គួររំលឹកថា កម្មវិធីប្រកួតប្រដាល់គុនខ្មែរជាលក្ខណៈមិត្តភាពអន្តរជាតិដែលមានឈ្មោះថាGanzberg Uber fighterនេះ ធ្វើឡើងនៅវេលាម៉ោង៨ដល់១០យប់៕
ចែករំលែកព័តមាននេះ